55
Ẹ́vù, Dévidi raru nụ onye ishi egvu. T'a kpọru unu ye iya
1 Nggụbe Nchileke;
nụaru ekfukfu, mu ekfu anụ ngu.
Ba adahụkwa mu nkịchi
l'arọro, mu arọ ngu.
2 Ngabẹru mu nchị;
za mu oku, mu eku ngu.
Mgbamuche ejije mu ẹhu.
Yoo meje; meji te egvuru mu egvuru;
3 teke mu nụru iphe ndu ọhogu mu ekfu;
mẹ ẹge ndu akirishi anọduje ele mu.
Iphe ẹphe edzubejeru mu bụ ishi-ephuhu.
Ẹphe eshije l'iwe; gude ọnu
ẹphe l'egwe mu egwegwe.
4 Obu awa mu awawa;
anwụhu l'eyekwa mu phụ
egvu l'eyeshi mu iya ike.
5 Mu atsụ egvu l'atsụshi iya ike;
ẹhu l'anma mu anmanma.
Ẹhu anyịkwa mu ẹkpa-oyi.
6 Mu asụ l'ọ dụ mu t'a sụ lẹ mu
furu ẹ́bà l'ọ bụ ndo;
mẹ mu ephehu je achọo ẹke
mu a-nọdu tụta ume;
7 mbụ mẹ mu ephelephu phemihu
je eburu l'echi-ẹgu;
8 mẹ mu abahụ-kebe l'ẹke mu a-nọdu zee ndzụ;
l'oke phẹrephere; mẹ l'eyii-mini.
9 Byiko Nnajiufu;
mebyishinua idzu ndu akirishi ono.
Menua t'ẹphe ba amahẹ
iphe ẹphe ekfu ekfukfu;
kẹle iphe mu phụru lẹ
mkpụkpu ono bụ iphe-kpaa; mẹ nseku.
10 Ẹphe anọduje awụ-phe lẹ
mkpụkpu ono: eswe l'ẹnyashi.
Ẹjo iphe; mẹ iphe-ẹhuka
atụko ẹkemeke ọbule
dzuru lẹ mkpụkpu ono.
11 Ẹjo iphe nọduwa l'ẹke ono fua eru;
ọphu mkpamẹhu; mẹ ụgho
'agwụdu iya agvụgvu.
12 Ndẹge ọ -bụ l'ọo ọhogu mu
eme mu iphe-iphere;
mẹ mu atagbukwaa ya lẹ nshi.
Ọdumeka bụru l'ọo onye
mu dụ ashị; bẹ l'eku onwiya
o-ji-l'ẹka-tọgbo l'ẹke mu nọ;
mẹ mu edomikwaaru iya onwomu.
13 Obenu l'ọ bụ nggụbedua,
bụ onye ẹbo-ọ mu;
onye mu l'iya ayị ayịyi;
bya abụru ẹgiri ọnya mu;
14 mbụ onye mu l'iya nọkpoo lẹ ndzu;
bụru onye mu l'iya achịkoje
yịru eje l'eze-ụlo Nchileke.
15 Mbụkwa tẹ ọnwu tụ
ndu ọhogu mu ọtu l'ụkfu.
T'e likwaa ẹphe lẹ ndzụ;
kẹ l'ẹjo iphe nmaru ẹphe gidigidi l'ẹhu.
16 Obenu lẹ mbẹdua bụ
Nchileke; bẹ mu araku;
kẹle mu maru lẹ Ojejoje
e-mekochaa bya adzọfuta mu.
17 Ụtsu; eswe; l'ẹnyashi;
bụ ẹkwa-aphụ; bẹ mu adabujeru.
Mu marua l'oo-mekochaa nụa olu mu.
18 Ọo-gbafụta mu-a l'ẹka ndu
l'etso mu ọgu;
l'etso mu ọgu;
t'ẹ b'ọ dụ iphe e-me mu nụ;
mbụ m'o -ruhuru;
ẹphe ha l'igwe ịhagha mbụ ndu etso mu okfu.
19 Nchileke, bụ onye shi
l'ede-nwede nọduta
l'aba-eze iya a-nụa olu mu;
bya anụa ẹphe chịkikfuu;
kẹ l'ẹphe jịkaru agbanwe;
ẹphe ta atsụ Nchileke egvu lẹ phuu.
20 Onye mu l'iya ayị ayịyi
gbe tsowaru nụ ndu ọ̀nyà iya ọgu;
shi ẹge ono dakaa ndzụ, ẹphe l'iya gbaru.
21 Okfu, shi iya l'ọnu kwọru
akwọkwo l'ọ bụ manụ
nshi-lanụ;
nshi-lanụ;
ọbule iphe jiru iya obu bụ iwe.
Okfu iya atụ atụtu l'ọ bụ elaku;
ọbule ọotsu nkọ l'ọ bụ
ogu-mbeke, a baru tee ya nkọ.
22 Haaru Ojejoje iphe bụ iphe atsụ ngu l'ẹhu.
Oo-gudeshia ngu-a ike;
kẹ l'ẹ t'o nwedu l'ọ haa ndu
doberu ẹka ndoo t'ẹphe daa.
23 Obenu l'ọo nggụbe Nchileke
e-duru ndu ẹjo iya ono duba l'ime ili;
ẹke ẹphe a-nọdu rekashihu.
Ndu egbu ọchi;
mẹ ndu ntuphu-ire; b'ẹ tii
kwedu t'ẹphe kaa nka lẹ mgboko-a.
Obenu lẹ mbẹdua bụ nggu bẹ mu dakoberu.