24
Egvu-ọma, Dévidi deru
1 Mgboko; mẹ iphe, bụ iphe,
nọ iya nụ bụ kẹ Ojejoje;
mbụ mgboko;
mẹwaru ndu, bu iya nụ;
2 kẹ l'ọ bụ l'eli eze ẹnyimu;
b'ọ tọru ọkpa iya;
bya emekwaa ya phụ
t'o shihu ike l'eli ẹnyimu ime-alị.
3 ?Bụ onye a-dụ ike nyihu ugvu Ojejoje?
?Bụ onye a-dụ ike vudo
l'ẹke o doberu nsọ?
4 Ọ bụ onye doberu ẹka ndoo;
obu agụa ya iphoro;
onye ẹ-te woduru obu
ziberu iphe ẹ ta bụdu ire-lanụ;
too gudeje ụgho agụ ẹnwa.
5 Onye ono;
bẹ Ojejoje a-gọru ọnu.
Nchileke ono, bụ onye
adzọje iya nụ ono
ahaaru iya enge.
6 Ọ bụ ẹge ono; bẹ ẹphe adụje;
mbụ ọgbo ọphu l'achọ ngu nụ;
mbụ ndu achọ t'ẹphe phụ
ifu nggụbe Nchileke kẹ Jékọpu.
7 Unu gụhaa ọgu-nggamgbo ono t'o gheru ọnu!
Unu gụhashia ibo ndiche ono;
k'ọphu eze ono,
dụ biribiri ono a-bata.
8 ?Bụ onye bụ eze ono,
dụ biribiri ono?
Ọ bụ Ojejoje ono,
bu onye ha nshinu;
nweru agburu-ẹhu;
mbụ Ojejoje ono,
bụ onye ejeje ọgu lụ-gbua.
9 Unu gụhaa ọgu-nggamgbo ono t'o gheru ọnu!
Unu gụhashia ibo ndiche ono;
k'ọphu eze ono,
dụ biribiri ono a-bata.
10 ?Bụ onye bụ eze ono,
dụ biribiri ono?
Ọ bụ Ojejoje,
bụ Ọkaribe-Kakọta-Ike.
Ọ bụ iya bụ eze ono, dụ biribiri ono.