5
Hay Luwalun nan Tatagun Apo Dios hi Pumpahpahmo'anda
1 Ya nunluwalu ami, ya inalimin Apo Dios di,
“Nomnomom ni' nan nun'appuhin na'at ay da'mi
ti nidugah ahan di nabainanmih nangat di buhulmin da'mi!
2 At nan nipaboltan ay da'mi ya nidat hi udum an tatagun nalpuh udum an babluy,
ya nan numpunhituwanmi ya nob'on di numpunhitu.
3 Ya numbalin amih nguhu an mi'id di hi amami
ti nun'abaluday o'ommodmin binabai.
4 Ya mahapul an la'uwanmi mahkay di inumonmi,
ya ta"on goh nan ayiw an panungumi.
5 Ya nidugah di pangidoldolan nan buhulmin da'mih tamu,
an ta"on hi un ami na"ablay mu adi da'mi pun'eblayon.
6 At hay inatmih din hopapna ya immuy ami immanad'addaw hi ononmih
nan i'Egypt ya nan i'Assyria ta olom ni' ya idatan da'mi.
7 Mu hay immannung hi numbahol ya din a'apumih penghana,
mu nun'a'atoyda.
At ten ad ugwan ya da'miy munholholtap hinan numbaholanda!
8 Ya hanan himbut hidin hopapna di numbalin hi a'ap'apumi,
ya mi'id ah mabalin hi mamaliw ay da'mih nan nidugah an abalinanda!
9 Ya ta"on un hinan umuymi puntamuan hi pangngalanmih ononmi
ya atata'ot ti wah diday pumatoy.
10 At dumalat hinan nidugah an hinaangmi ya numpundogoh ami
an nidugah an lumahuy odolmi an umat hinan punhaangan hi tinapay.
11 Ya nidugah ahan di nangat nan buhulmi an nonongan enelo'da nan binabai
an ta"on un nan i'iwoy hinan babluy ad Judah.
12 Ya pinatoyda nan a'ap'apumi,
ya nun'itayunda an agguyda ahan ene'gonan dida.
13 Ya pinilitda nan ungungan linala'in imbabaluymin nunggeleng hi bogah,
ya ta"on un nan ung'ungungnga ya nangayiwonda ta omodna atog hi unda mundapiw hi damotna.
14 Ya din nun'ala'ay an gun mangipanuh hinan ma'ma'at ya adida mahkay gun ma'amung an mumpanuh,
ya ta"on un din ungungan linala'i ya mi'id mahkay din gunda kumantaan.
15 Ya napogpog mahkay din umamlonganmi,
at numbalin din gunmi nanayawan hi nunlungdayaanmi.
16 Ya mi'id mahkay di alimid Jerusalem,
at mahmo' ami mahkay ahan an dumalat nan numbaholanmi!
17 At hiyanan ten un ami numanomnom ya kimmilakila
ta la'tot ya ten ma'unabbaan di pannigmi.
18 Ti ninganuy mahkay di babluy ad Zion,
at hay wah di mahkay ya nan animal an jakal.* Umat hinan atap an ahuh nan inalahan.
19 Mu ta"on un umat hina ya He"a damdama, Apo Dios,
di Ap'apuh nan tatagum hi enggana!
20 Mu anaad ta ingnganuy da'mih nabayag?
Undan adi da'mi mahkay nomnomnomon?
21 Pumbangngadon da'mi ni' ahan ay He"a,
ya imbangngadmu ni' din maphod an aatmi tuwali!
22 Ti undan ahan inaynayunmuy pan'ugam
ya nan bungotmun da'mi.”