1 Dyimom madāyaw a Teopilo.

Āro dana saw nangpādas a naytolas so maynamot do natongpalaya do payayahatangan taya. 2 On, no intolas daw, ki akmas nakaiparawat daw dyamen yapo do kasiknan na pa no mismo saw a nakaboya kan nangasaba so maynamot di Jesos. 3 Aran yaken, maynamot ta kinaganay ko kan nabisādo ko a nachinanawan a tabo nya saya napariparin a yapo do kasiknan da, naktokto ko pa a maganay an itolas ko sa dyimo nyaya sigon do kosto a kasarosarono da, 4 tan sakangwan mapatakan mo a oyod iyaw no nainanawo saya dyimo.

5 Do chimpwaw no kapagāri ni Herodes do Jodya,* 1:5 Iyaw nya Herodes, ki Herodes a pinangaranan das “Mabīleg,” kan intorayan naw tabo tana dan Jodyo. ki myan daw asa a pādi a mayngaran so Sekarayah a asa mimbro no bonggoy no papādi saw a inpangpangōlwan Abidyah do kaychowa. Iyaw nyaya Sekarayah, ki myan baket na a mayngaran so Elisabet a yapo do kapotōtan ni Aaron.† 1:5 Sira tabo papādyaw no Jodyo, ki naychakarwa sa do dadwa poho kan apat a bonggoy da. 1 Kron. 24:10. Si Aaron, ki iyaw ākangaw ni Moyses, as kan iyaw no nanoma a pādi a pinidi no Dyos do Israel.

6 Siraw nya maychabahay, ki mayengay sa malinteg do salapen no Dyos, as kan kinapyā da a inononotan tabo bilbilin kan paglintegan no Dyos.

7 Ki abaw anak da, ta hopes si Elisabet. Asa pa, malkem kan baket dana sa.

8 Asa karaw, narapit arawaw a batang no bonggoy da Sekarayah, kan iyaw magsīrbi do Dyos do Timplo do dawri. 9 Sigon do dadakay daw no papādi, si Sekarayah nabonot a somindep do Timplowaw ni Āpo a maysosoh so insinso.

10 Do nakarapitaw no ōras a kapaysosoh na so insinso, naychipeh saw āro a tawotawo a maydaydasal do gaganaw no Timplo. 11 Sinpangan na, myan nagparang di Sekarayah asa a anghil ni Āpo, kan naytēnek do makanawanaw no altar a paysosohan so insinso. 12 Ki do nakaboyaw syan Sekarayah, sominryam, as kan oltimo nakamo na.

13 Ki binata dya no anghilaw a kāna, “Mamo kabam Sekarayah, ta nadngey no Dyos dasal mwaw. Dawa, maymanganak anchis Elisabet a kabahay mo so mahakay, kan pangaranan monchis Juan. 14 Ay, āngonchya kasoyot mo, as kan āro sanchiw masoyot do kaiyanak naw! 15 Ta iya, ki maibidang anchi a masisīta do salapen no Dyos. Machita dya polos a minom so palek mana aran āngo a makabok,‡ 1:15 Leb. 10:9-11 as kan makneb anchi so panakabalin no Ispirito Santo a aran myan pad bodek ni ānang na. 16 Aronchi dyirad kapotōtan Israel paybidyen na di Āpo a Dyos da. 17 Manmanmanchi kan si Āpo, as kan iyaw panakabalin na, ki akmas intorohaw no Masantwan a Ispirito di propīta Elyas§ 1:17 1 Ār. 18 do kaychowa. Paychachapyahen na sanchiw may-aāmang.* 1:17 Mal. 4:6 Pagbabawyen na sanchiw masosōkir saw a tawotawo tan mangtokto sanchi a akmas siras malinteg saw. On, nyayaw parinen nanchi tan isagāna na saw tawotawowaw do kawara ni Āpo.”

18 Ki binata ni Sekarayah do anghilaw a kāna, “Maypangonchiw kapatak ko sya a maparin saw nya, ta malkem ako naya kan koribetbet danaw si baket ko?”

19 Ki tinbay no anghilaw a kāna, “Yaken si Gabriel a pachirawatan ni Āpo Dyos, kan maytēnek ako do salapen na. Tinoboy na yaken a mangay a mangibahey so nya maganay a dāmag dyimo. 20 Maynamot ta inanohdan mwabaw binata ko saya, makapaylilyak ka paba a mandan arawaw a maparin saw inbahey kwaya, ta sigorādo a maparin anchi anchan marapit ōras na.”

21 Ki siraw tawotawo saw do gagan a mangnanaya di Sekarayah, chinasdaaw da an āngo chinahay na do irahemaw no Timplo. 22 Sinpangan na, do nakahtot naw, oyod a omel dana, ta makapaylilyak paba. Nyaw nakatonngan da sya a myan naipaboya no Dyos dya do irahem. Yapo do dawri, sininsinyasan na saw tawotawo, ta polos a dya makapaychirin dyira.

23 Do nakakabos danaw no arawaw no nakapagsīrbi nad Timplo, somnabat danad bahay na.

24 Oyod a nahay aba, as nakapanginaw ni Elisabet a baket na, as kan do dawri, minohbot paba do bahay na do dadima a kabohan.

25 Binata na do inawan na, “Pinarin no Dyos dyaken nya sichangori a maynamot do kāsi na dyaken. Sichangori, pinakaro naw nya pakasnesnekan ko do salapen tawotawo.”

26 Do chanemaw a kabohan bogyaw ni Elisabet, tinoboy no Dyos si anghil Gabriel do idi a Nasaret do probinsya a Galilya. 27 Nangay do asa balāsang a birhin a naitōlag a machikabahay di Jose a kapotōtan ni simna Āri Dabid. No ngaran nya birhin, ki si Maria.

28 Do nakapagparangaw no anghilaw di Maria do bahay na, binata na dya a kāna, “Komosta ka! Masoyot ka, ta machitatārek parābor dyimo no Dyos, kan ay-aywanan naymo.”

29 Maynamot do dyaya naparin, taywara chinariribok ni Maria an āngo inbaheyaw no anghilaw, kan iniktokto na an āngo chakey na batahen.

30 Ki binatan anghilaw dya a kāna, “Mamo kabam Maria, ta pinidi naymo ni Āpo Dyos a kaipaboyan parābor na. 31 Mabogi kanchi kan iyanak monchiw asa mahakay, kan pangaranan monchis Jesos. 32 Mabīleg anchi, kan matawagan anchi so Anak no Katotohosan. Pagārihen anchi ni Āpo Dyos a akmas kapoonan na a si Āri Dabid. 33 Itorayan na sanchi a abos pandan kapotōtan sayan Jakob, kan abanchiw pandan kapagāri na.”

34 Ki tinbay ni Maria iyaw anghilaw a kāna, “Maypāngo a maparin nyaya dyaken a asa kwa birhin?”

35 Tinbay no anghilaw a kāna, “Mangay anchi dyimo Ispirito Santo, as kan pongosan nanchimo so panakabalin no Manakabalin a Dyos. Nyaw paynamotan na a iyaw masantwanaya a adekey a iyanak monchi, ki matawagan anchi so Anak no Dyos.

36 “Chiban mo pas Elisabet a kabagyan mo a aran batabatahen da a hopes, ki maymanganak anchi. Changori, anem dana kabohan kabogi na a aran bakbaketan dana. 37 Ta aba polos dya maparin ni Āpo Dyos.” Nawriw binatan anghilaw.

38 Ki binatan Maria a kāna, “Cha ko dya a pachirawatan Āpo Dyos. Maparin pakono sa dyaken akmas binata mo saya.” Sinpangan na, komnaro danaw anghilaw.

39 Do dawri, nahay aba as nakapagrobwat ni Maria, kan nakalyalisto a nangay do katokotokonanaw do asaw a idi do Jodya. 40 Nangay a somindep do bahay daw da Sekarayah, kan kinablaawan na si Elisabet. 41 Ki do nakadngeyaw ni Elisabet so kablaawaw ni Maria, minlon adekeyaw do bodek na, as kan nakneb si Elisabet do panakabalin no Ispirito Santo.

42 Do dawri, nakalyak a kāna, “Ay, imo kagagasātan do tabo a mababakes, as kan magāsat anchiw iyanak mo a adekey! 43 Chasdaaw kwaya, ta sino ako a yangay a sarongkaran ānangayan Āpo ko? 44 Chiban mo, do nakadngey kwaw so nakakablaaw mwaw dyaken, ki minlon adekeyaya do bodek ko do kasoyot na. 45 On, magāsat ka, ta nanganohed ka a matongpal sanchiw inbaheyaw no Dyos dyimo!” binata ni Elisabet.

46 Sinpangan na, naychirin si Maria a kāna,

56 Minyan si Maria so malabit a tatdo a kabohan do yanan da Elisabet, as nakapaybidi nad bahay naw do Nasaret.

57 Sinpangan na, do nakarapit danaw so ōrasaw a kapaymanganak ni Elisabet, inyanak naw asaw a mahakay. 58 Do nakadāmag daw syan karoba da saw kan siraw kakabagyan da saw so makaskasdāawaya a pinarin Āpo Dyos dya, ki nachipagragsak sa dya.

59 Do chawawaho naw a araw no adekeyaw, yangay da inpakogit, ta nyaw sīgod a dadakay da, kan chakey da pangaranan so Sekarayah tan mayengay sa kan āmang na. 60 Ki nachiengga si Elisabet a kāna, “Engga, Juan ngaran na.”

61 Ki binata da dya a kon da, “Naon, ki abayaw mayngaran so Juan a kabagyan nyo.”

62 Do dawri, sininyasan das Sekarayah, ta yahes da an āngo chakey na ngaran adekeyaw.

63 Sinpangan na, nangdaw si Sekarayah so paytolasan na, as kan nyaw intolas na: “Juan iyaw ngaran na.” Chinasdaaw da a tabo no myan saw daw. 64 Do dawri, nyeng a napakaro kaomelaw ni Sekarayah, kan naychirin so pangidāyaw na so Dyos.

65 Nasdaāwan sa tabo karoba da saw daw, as kan nakarakarapit nya dāmag do tabo a tawotawo do katokotokonan no Jodya.

66 Nyaw iniktokto dan tabo tawotawo saw a nakadngey sya a, “Āngo paronchiw payparinan nyaya a adekey anchan mayparakoh?” Nyaw binata da, ta madlaw da a myan panakabalin ni Āpo do dawri a adekey.

67 Do dawri a nakapakalilyak dana ni Sekarayah a āmang ni Juan, nakneb dana do panakabalin no Ispirito Santo, kan inpadto na a kāna,

80 Do dawri, nayparakoh kan naypayit adekeyaw do inawan kan do kapakatoneng so maynamot do naispiritwan a byay. Minyan do let-ang a nandad nakapaboya naw a nangnanawo dyirad tawotawo saw a kapotōtan Israel.