1 Nonta indaw ko la son si‐kayo ni pinsak, sinekitan koy nemnem jo jet angken si‐kak ngo, nandaringitak. Isonga ekak da etoloy, ta ekak koston mesekitan mowan i nemnem jo. 2 Ekak koston pandeshingit takejo mowan, ta enshi met i eshom ma mengi‐kan ni pan‐imdengan ko nem eg si‐kayo bengat. 3 Nansolatak et ngo mowan son si‐kayo tep piyan kon mesenok ka mebidin sota kait jon nanbasol, say no bilang ey metodoyak da, eg mesekitan i nemnem ko kabol son si‐kayon istay mengi‐kan koma ni pan‐imdengan ko. Naka namnama‐a ey sota pan‐imdengan ko, pan‐imdengan jo ngo. 4 Nansolatak da nontan tep piyan kon amta‐en jo koma ey ebadeg i semek ko son si‐kayo; aliẃen kowan ko ey say mandeshingit kayo. Agpayso, nonta insolat ko sota pemidin jo ni nanbasol la kait jo, ekak maynemneman, naka emankaisaysay‐i pay.

5 Agpayso, aliẃen si‐kak i engi‐kan ni daringit jo, nem eg sota kait jon nanbasol met laeng, si‐katoy engi‐kan ni nandaringitan ni eshom son si‐kayo. Aliẃen si‐kak i nanbasolan to, no diket singa si‐kayo met laeng. Nem say ẃared nemnem ko, ekak koston ida‐karan sotan; 6 isonga on‐anay sota inpasing jon emilin so nonta nanbasol la too. Kosto sota inpasing jon engibiyang nin son si‐kato, 7 nem niman mesepol la pakaẃaniyo et, jet atngiyo ma ni pansigshan to, say eg medismaya; nakol ni ebaken ni ebadeg ga daringit to et ngo mowan. 8 Jet kekshawen ko son si‐kayo, ey ipa‐sas joy semek jo pay laeng son si‐kato. 9 Sajay i kabol la insolatan ko so nontan na solat, ta piyan kon peshasen takejo, no pati‐en jo met laeng i ikowan ko son si‐kayo. 10 Siya, no pekawanan jo sotan na too — ono sota eshom ma toon nanbasol — pekawanan ko ngo ira. Nem no bilang ey ẃaray pinekawanan ko shita kad‐an jo, dingkak sotan tep pansigshan jo met laeng, jet sotan i ka‐aporbalin Cristo. 11 Sajay i inpasing ko ja emakaẃan say eg eẃisen nen Satanas sota kait tayo, ta amta tayo met i pangkep nen Satanas ja meneshal ni too.

12 Nonta indaw ko shi siyodad ni Troas kabol ni nak pengitosho nonta mapteng nga shamag pangkep son Cristo, eshakel i masi‐met ja mengitneng nonta naka pan‐itoro maypangkep so nen Apo Jesus. 13 Nem ekak maynemneman nontan, ta si Tito, ja agik shi pamati, eg nay‐aspol shiman ni inkalapo to did ta kad‐an jo. Isonga indekjas ko sotan na dogad jet dimawak shi Masidonia say nak sebi‐en shiman tep piyan kon pasiya ja amta‐en son si‐kato i kasesaad jo.

14 Nem naka man‐iyaman son Apo Shiyos ta si‐katoy emengitoshong son si‐katejo angken toway daẃan tayo, ni tayoka pansilbi son Cristo. Isonga eg kito ma‐ebak. Jet si‐kato met laeng i emengitoshong son si‐katejo ja mengikowan so ni eshom shi emin na dogad nonta mapteng nga shamag maypangkep so nen Cristo. Singa may‐eshig ey emanseng‐ew sota maypangkep son Cristo, jet emansesngaw shi intiron dobong. 15-16 Si‐katejon emengikowan ni maypangkep son Cristo, may‐eshig ey kitoka mengiweshis nontan na emanseng‐ew so nonta ira angken sipen too. Sota ira emantoshong shi kaysedakan, shaka ekoba et piyan sha tep mengi‐kan ni biyag son si‐kara. Nem sota ira emantoshong shi keshosa‐an sha, shaka ngo ekoba nem ngaaw sha et metodoy iren manda‐kam ni shosa. Sajay ya obda tayon mengikowan ni maypangkep son Cristo, ebadeg ga pasiya, singa eg mayposi, jet manmanoy kaonbaal so. 17 Nem si‐kami, mebedin mi, ta aliẃen inges mi ira sota eshom ma shaka panpidaki sota esel nen Apo Shiyos. No ikowan mi sota esel nen Apo Shiyos, eg kami man‐olbod tep mika nemnemnema ey si Apo Shiyos i emili son si‐kami ja mengikowan maypangkep so nen Cristo, jet tokamika os‐osshongi.