1 Do̱ru̱ no̱ bu̱-yo u̱n Shir remen no̱ ro̱ yakar-ye̱ u̱n wu̱, komo wu̱ ro̱ no̱ m-was de̱e̱n. 2 Co̱n no̱ hun-ne̱ ko̱yanda, u̱ntu̱n bo̱ Kiristi co̱nu̱ no̱ à. Wu̱ marag rem na. Wu̱ ya'aste̱ Shir ho̱o̱g-mo̱ u̱n wu̱ u̱t-seke̱ to̱ m-shi'igin, u̱n no̱m u̱n kaane̱ wu̱ gwu̱'u̱rsu̱te̱ Shir u̱r-hur.* 5:2 Hyen komo: Rwu̱u̱ 29:18; Bo̱ng 40:6.

3 Amba remen no̱ u̱n hun-ne̱ ye̱ Shir ye̱, no̱ jar no̱ no̱m rem-se ma saa ko̱ rii-yo m-'e̱ á, komo no̱ no̱m o-su̱u̱b á. Go̱ u̱n ka ba'as-to̱ depe̱ be-de u̱n hun-ne̱ ye̱ Shir á. 4 Komo no̱ jar no̱ no̱m ma-to̱ m-'e̱ ko̱ ma-to̱ o-hwaa, ko̱ ar-de u̱n ba u̱r-bon á. O̱tte̱ kaane̱ à, jiishte̱ no̱ se̱nge̱ bo̱ngo̱n-de Shir u̱n rii-yo wu̱ no̱me̱ à. 5 Nap no̱ o-nip u̱nze ko-wa-o-ás, u̱n ko-wan-no̱m u̱n saw-to̱ m-'e̱ ne̱, u̱n ko-wa-o-su̱u̱b ne̱, ye̱ ro̱tt u̱r-kwu̱ku̱r be-de u̱n rii-yo u̱r-bon yo u̱n gwo̱mo-u̱t Kiristi, u̱n gwo̱mo-to̱ u̱n Shir ne̱ á. Ko-ya-o-su̱u̱b u̱n ko-wa-m-gir ne̱ gaan-ye̱ ro̱, remen ye̱ kwu̱ktu̱te̱ ka rem-se u̱n ho̱no o-dak se. 6 No̱ jar no̱ yage̱ hun-ne̱ raks no̱ u̱n ma-to̱ o-saa to̱ ye̱ m-rwo̱r á. Remen go̱ u̱n ka rem-se ro̱ m-hante̱ u̱n ryaab-se Shir be-de u̱n ye̱ no̱me̱ ko̱o̱b-de o-do̱ro̱tte̱ à. 7 Remen kaane̱, no̱ jar no̱ mo̱sse̱ u̱r-hi u̱n go̱n ka hun-ne̱ ye̱ ro̱ u̱n no̱m u̱n go̱n ka rem-se u̱n ba u̱r-bon se ne̱ á. 8 N-ga no̱ ro n-te̱ o-comb, amba m-mo̱ka no̱ co̱wo̱g be-de m-cecar be-de u̱n Wan-Ko̱yan. Káane̱ she'et no̱ she'et-de m-cecar. 9 Me̱ u̱n ze̱e̱ kaane̱ remen u̱rege̱ hun-ne̱ ro̱ u̱r-she'et be-de m-cecar, ye̱a no̱m she'et-de u̱r-bon, she'et-u̱r kashi, u̱n no̱m u̱n o-nip ne̱. 10 No̱m no̱ bo̱ u̱n no̱m-m no̱, no̱ nept rem-se Wan-Ko̱yan co̱ne̱ no̱ se̱nge̱ m-no̱m à, komo no̱ no̱m ka rem-se. 11 No̱ jar no̱ mo̱sse̱ u̱r-hi u̱n no̱m u̱n rem-se o-saa ne̱ se ye̱ ro̱ m-no̱m o-comb á. O̱tte̱ kaane̱ à rwu̱ntu̱ no̱ ye̱, u̱nze go̱n ka rem-se ye̱ ro̱ m-no̱m à, se ro̱tt u̱r-bon á. 12 Rii-yo m-'e̱ yo a ru̱ru̱t rem-se ka hun-ne̱ ye̱ ro̱ m-no̱m wukuse̱ à. 13 Amba da-o̱ a hante̱ u̱s-rem be-de m-cecas, ka da-de, ko̱wan he se m-nap bo̱ se ro̱ à. 14 Cu̱car-m rwu̱ntu̱te̱ ko̱ yo ke rii-yo cas cas. O̱ a zette̱,

15 Remen kaane̱ no̱m no̱ ce̱n u̱n she'et-u̱r no̱ ne̱. No̱ jar no̱ she'et u̱ntu̱n raag-ne̱ á, amba she'et no̱ u̱ntu̱n ya-u̱s-nap. 16 Myet da-o̱ no̱ kume̱ ke̱e̱r-de u̱n no̱m u̱n kashi u̱n rii à, no̱m no̱ yo. No̱m no̱ remen ka ho̱-to̱ atte̱ m-mo̱ka à, hun-ne̱ ro̱ m-no̱m u̱n rem-u̱s yo̱-se.† 5:16 Hyen komo: Koro 4:5. 17 Remen kaane̱ no̱ jar no̱ warag raag-ne̱ á, amba no̱m no̱ bo̱ u̱n no̱m-m no̱, no̱ nept rii-yo Wan-Ko̱yan co̱ne̱ no̱ no̱m à, komo no̱ no̱m yo.

18 No̱ yage̱ ke̱-m ho no̱ á. Yo ka co̱w-yo m-sabre̱ yo. U̱n su̱ge̱-de u̱n kaane̱, shi no̱ u̱n Ku̱kt-o̱ Shir. 19 Te̱pse̱ no̱ o̱r no̱ ne̱ u̱n Se̱p-to̱ u̱r-Bo̱ngo̱n to̱ Shir. Komo no̱ hu'e̱ Wan-Ko̱yan u̱t-se̱p u̱t-dum ne̱ to̱ u̱r-bo̱ngo̱n u̱n hur-u̱t no̱. 20 Ko̱yanda no̱ bu̱m Shir Tato na u̱n ko̱ yo ke rii-yo, remen Wan-Ko̱yan na Ye̱so Kiristi.‡ 5:19-20 Hyen komo: Koro 3:16-17.

21 No̱me̱ no̱ o̱r no̱ ne̱ o-do̱ro̱tte̱ remen se̱k-mo̱ no̱ u̱n m-'ya u̱n Kiristi à.

22 Ne'a-ne̱ no̱me̱ no̱ campo̱ no̱ ne̱ o-do̱ro̱tte̱, bo̱ no̱ m-no̱me̱ u̱n Wan-Ko̱yan à.§ 5:22 Hyen komo: Koro 3:18; 1Bit 3:1. 23 No̱m no̱ yo ka remen campo̱ ro̱ co be-de u̱n ne'a u̱n wu̱, bo̱ Kiristi ro̱ co u̱n be-de u̱n yan-dor Ye̱so, ye̱ ro̱ wu̱r-o̱ u̱n wu̱. Wu̱ u̱n hi u̱n de u̱n wu̱, wu̱ ro̱ Wan-Gwu̱ u̱n ka wu̱r-o̱. 24 Bo̱ yan-dor Ye̱so ro̱ o-do̱ro̱tte̱ be-de u̱n Kiristi, kaane̱ o̱ no̱ ne'a-ne̱ he no̱me̱ u̱n campo̱ no̱ ne̱ o-do̱ro̱tte̱ u̱n ko̱ yo ke rii-yo.

25 No̱ campo̱-ne̱ co̱n no̱ ne'a no̱ ne̱, bo̱ Kiristi co̱ne̱ yan-dor à, komo wu̱ ya'asu̱ru̱ hi u̱n de u̱n wu̱ be-de m-mar rem yan-dor.* 5:25 Hyen komo: Koro 3:19; 1Bit 3:7. 26 Wu̱ u̱n no̱m kaane̱ remen wu̱ muuté̱ ye̱ cas cas be-de Shir, wu̱ so'os ye̱ m-ho̱ u̱n Ma-to̱ u̱n wu̱. 27 Wu̱ u̱n no̱m kaane̱ remen da-o̱ wu̱ he deke̱ u̱n hi u̱n de u̱n wu̱ yan-dor à, ye̱ waragté̱ m-se̱ps ne̱, ba u̱t-ri'in, ko̱ hiin, komo ba m-ku̱ko̱p, ye̱ warag po̱r po̱r, ba a u̱n kum be-de a he m-pyap à. 28 Kaane̱ depe̱ komo campo̱-ne̱ cu̱n ne'a u̱n ye̱ ne̱ bo̱ ye̱ m-co̱n u̱n hi u̱n de u̱n ye̱ à. Wu̱ co̱ne̱ ne'a u̱n wu̱ ne̱ à, hi u̱n de u̱n wu̱, wu̱ ro̱ m-co̱n. 29 U̱r-ko̱m, yatt-wu̱ take̱ yage̱ u̱n wu̱r-o̱ wu̱ á, amba wu̱ ro̱ u̱n m-was u̱n o̱ ne̱ u̱r-bon ne̱. Kang-o gaan, Kiristi ro̱ u̱n co̱n u̱n yan-dor ye̱ u̱n wu̱. 30 Wu̱ waste̱ u̱n na ne̱ remen na do̱k-to̱ u̱n wu̱r-o̱ u̱n wu̱ to̱. 31 Bo̱ to̱ ro̱ gense̱ u̱n Ma-to̱ Shir à, “Ne̱t a yage̱ inu u̱n wu̱, u̱n tato-o̱ u̱n wu̱ ne̱, wu̱ mo̱msu̱te̱ ne'a u̱n wu̱ o-wu̱r, ne̱n yoor-mo̱ u̱n ye̱, ye̱a warag wu̱r-o gaan.”† 5:31 Hyen komo: Taka 2:24. 32 Caari-to̱ u̱t-ma ro̱ wuke̱ kane̱. Me̱ me̱n de̱k to̱ u̱n e̱sse̱nte̱-de u̱n Kiristi u̱n hun-ne̱ yan-dor ne̱. 33 Kap u̱n kaane̱ ne̱, ka ma-to̱ rem no̱ to̱ kap. Yage̱ ko̱ wu̱ ke campo̱-wu̱ cu̱nu̱t ne'a u̱n wu̱, bo̱ wu̱ ro̱ u̱n co̱nu̱ u̱n hi u̱n de u̱n wu̱ à. Ne'a ne̱, komo wu̱ 'ye campo̱ u̱n wu̱ u̱t-go̱s.