1 Ani leagola i̱na handalu hewaria dahuliyali marialime dindi bibahendenaga gibuni maria ngagoniha howa puyabu maria dindinibi iba solowaranibi iranibi pu nalelo minu yania ho hearia handaru.✡ Yar 49.36, Dan 7.2, Seg 6.5 2 Ani hondowa handalu hewaria dahuliyali mende ni tagira ibiragohayagi howa Ngode Datagaliwabe holenehe kagonaga magi yalu ibiyaria handaru. Ibugua dahuliyali mariali biaru ti dindi bibahende mo ko halu iba solowarabi mo ko halu bilo Ngode Datagaliwabehanda hongo miyaru tihondo bi dalimu olaamu halu lalu, 3 Iname wali agali Ngode Datagaliwabenaga biabe bia haga karunaga wanakuini Ngode Datagaliwabenaga magi ala heloloma̱ya tígua dindi bibahendebi iba solowarabi irabi mo ko nahalimu, laya.✡ Ese 9.4-6, Mo 6.6, 9.4, 14.1, 22.4 4 Wali agali Ngode Datagaliwabenaga magi ti wanakuini helayaru daosini handari mbirani pira mariani maria (144,000) ka lalu langiyagola hale haru. Ti Isaraele hameigini homberiaha (12) howa heneya.✡ Mo 9.16, 14.1-3 5-8 Hameigini mbira mbiraha daosini homberia (12,000) dege dege Yudabi Lubenebi Gadabi Asabi Nabadalaibi Manasebi Simionobi Libaibi Isagabi Sebulunubi Yosebebi Beniyaminibi hameigini uruni tini wanakuini Ngode Datagaliwabenaga magi ogoni helaya.

9 Ani biagola i̱na handalu hewaria wali agali au lolebe tobahe mbiralime daga labe naheore heago handaru. Ti tingini tara tara karubi hameigini tara tara karubi dindi tara tarani bu karubi bi tara tara laga karubi uruni ti Ngode Datagaliwabenaga handame ho biragane dagia wiagoria Nogo Sibi Igini biago heagoriabi buhayagi heyu heneya. Ti bibahendeme aga pele karulalu turu howa ira magane yunihe tini giha yu hearia handaru.✡ Lm 11.25, Mo 3.5, 3.18, 4.4, 5.9

10 Ti ani hearia tigua bi hongo howa laraga halu lalu, Pele mulene inanaga Ngode Datagaliwabe ibunaga handame ho biragane dagiani bedagoha howabi Nogo Sibi Igini biagoha howabi ibaga, lalu laya.✡ Ais 43.11, Yar 3.23, Hos 13.4, Mo 4.2, 4.10, 5.13 11 Dahuliyali biaru bibahendebi dahuliyali haru haga biarubi holenehe mariali helene biarubi ti handame ho biragane dagia wiagoria ho mabu bupe haya. Ani bialu tigua handame ho biragane dagia biagoria buhayagi bulu palu ibira howa Ngode Datagaliwabe mini yaraga halu 12 lalu, Aniore bibe. Mini yaraga holenebi wá taraore holenebi mini gigabiwi holenebi ka̱i̱ lolenebi mini lene holenebi hongo holenebi hongo tara timbuniore holenebi ina Ngode Datagaliwabenaga wia dege bidane wia ho wiaabo helo. Aniore bilo larama, lalu laya.✡ Mo 5.12-14, 11.17 13 Ani layagola dahuliyali haru haga biaru aria mbiragome i̱hondo lalu, Wali agali aga pele bu karuni ti ai kabe. Ti ani howa íbu kabe, laya.✡ Mo 3.18

14 Ani layagola i̱na ladai bialu lalu, I̱ manda nabi kogo í̠nime manda bidegoni, lalu ladai biru.✡ Ais 1.18, Dan 12.1, Md 24.21, Mg 13.19, Hi 9.14, 1 Yo 1.7, Mo 1.5, 6.9

Ani larugola ibugua i̱hondo lalu, Wali agali uruni tigua ga̱i̱ mangabi gibiore wiagoria handalu howa pi nale ha ho wialu anda íbu kagoni. Uruni tigua tinaga aga Nogo Sibi Igini biagonaga daramame wayawaya bialu mo pele hayagola íbu kagoni. 15 Irane ogoninaga Ngode Datagaliwabenaga handame ho biragane dagia wiago wanakuihayagi howa tigua horombe mbiragabi ibunaga anda ogoniha howa ibunaga biabe biaabo haga hea. Mbirali handame ho biragane dagia ogoriani bereago ibugua ti hondo haga hea.✡ Ais 4.5-6, Mo 4.2, 4.10, 21.3 16 Ani bidagome ti mani hina garibi lolenebi iba noa holenebi nawulebiraore. Nimebi dolene tandagabi tara ngarumebi ti nadolebiraore.✡ Iba 121.6, Ais 49.10, Mo 21.4 17 Ani nabulebirago irane Nogo Sibi Igini ibu handame ho biragane dagia ngagoria hanuni howa ibugua tinaga haru haga howa ti haabobo holene miagane iba duguaragoria haru polebira. Ani buwa Ngode Datagaliwabehanda tinaga de iba ibiraru domo waholebira.✡ Iba 23.1-2, Ais 25.8, 49.10, Ese 34.23, Yo 10.11, 10.14, Mo 5.6, 21.4