33
Anduane Homogonaga mini yaraga halu iba gana lenego ogo
1 Tí mini tigabiwi kamiru bibahendeme
Anduane Homogohanda bigi biyagonaga turuore howa ga̱ lalu ladaga halimu.
Tí Anduane Homogohanda ledadagua hale halu biaga kamirume
ibunaga mini yaraga halimu.
Wali agali mini tigabiwi karume mana ogonibi bulene nga.
2 Ga̱wa̱ hiliyularume Anduane Homogonaga mini yaraga halu
ibuhondo iba gana lo milimu.
3 Iba gana gahenge wabuwa Anduane Homogohondo lo mialu howa
hiliyula ga̱wa̱ru lagane mugubeoreme lalu
turuore halu hongo howa ladaga halimu.
4 Anduane Homogonaga bi damenego bibahende henene hanguore lo nga.
Ibugua mbirale galone bigi bulebero ledagobi heneneore bulebira lowa
ibuha hanaho habehe kama.
5 Anduane Homogo ibu mana tigabi bulenebi henene lolenebi gubalini haga ka.✡ Iba 11.7, 37.28, 119.64
Ibunaga gubalini haabo holeneme dindi bibahendeha to̱lai ka.
6 Anduane Homogohanda hari daliga li kagoni✡ Pig 1.6, 2.1, Iba 104.30, Hi 11.3
ibunaga bime ani ha lowa
ni ege yakundiru li bu karunibi ani hadaba layagola heneru ka.
7 Ibugua iba dameneru mbiraore hanguni mo mogo buwa berelene.✡ Har 15.8, Yos 3.16, Iba 78.13
Iba solowaranaga guru kuyama
uli gibiruha panga payanda ho ngelama poradagua bini.
8 Dindi bibahendeni bu kamirume Anduane Homogo mitangi halu
ibunaga mini yaraga hadaba.
Wali agali dindi bibahendeni kamirume ibu daligaore ka manda bialu
ibunaga mini yaraga hai hadaba.
9 Ogoni irane ibugua bi hangu layagola✡ Iba 148.5
mbirale bibahende dindini ngaruni íbu helene.
Ibunaga bime mbirale ogoale tagira íbu ha laga biyagola
tagira íbu haga bini nga.
10 Dindini hameigini tara tara paluyu pedarume✡ Iba 2.1-3, Ais 8.10, 19.3
mbirale nagalone bule mandamanda bu wigi bidaru nabilonaga
Anduane Homogohanda mo pere laga.
Tigua bule miniha manda bu yidaru bualono burugu lelo
ibugua mini yaniho haga.
11 Anigo Anduane Homogo ibugua bule manda bu winiru✡ Yob 23.13, Iba 40.5, Min 19.21, Ais 55.8
mbira ereba nahe wiaabo holebira.
Ibugua bule manda bu yinigo
mbirale mbirame mo ereba habe nahe hongoheore wiaabo holebira.
12 Hameigini mbira tinaga Ngode Datagaliwabe mende nahe✡ Man 7.6, Iba 28.9, 144.15
Anduane Homogo ibuni hangu ka lowa yu tigabu karu
ti turubiore ka.
Wali agali Anduane Homogohanda ibuninagaore helo lowa dabene karu
ti turubiore ka.
13 Anduane Homogohanda dahuliya andaga howa de handadali halu
wali agali bibahende bu kamaruni handai ho ka.✡ Yob 28.24, Iba 11.4, 14.2
14 Ibugua kini howa haru kagoria howa de handadali halu✡ 1 Kin 8.39, 8.43, Iba 102.19
ina dindini wali agali bu kamaruni de handai ka.
15 Wali agali damene bibahendenaga mitangi bulene pigane ibugua mo wia howa✡ 2 Bit 16.9, Yob 10.8, Iba 119.73
tigua birago damene bibahende ibuni manda biai ho ka.
16 Kini ibunaga ami hongohe kago hangume agalila wai bialu ibu wayali haga ndo.✡ Iba 44.6, 60.11
Wai biaga ami agali mbira ibu wai bialu wayali haganego
ibuninaga hongo hangume ndo.
17 Wai biagane agalime nogo hosini biruwa wai biyaguabi wayali naholebira.✡ Iba 20.7, 147.10, Min 21.31
Hosi uruninaga hongo gibi ha kagome agali pele mia nabulebira.
18 Anduane Homogohanda wali agali ibugua bia ledadagua hale halu biaga karu
ibunime bayuwa de handayaho ka.
Ibugua ti gubalini haho wiaabo haga ka manda buwa
ibuhondo mini mbiraorewu karu
ibugua mamage halu handayaho haga ka.✡ Yob 36.7, Iba 32.8-10, 1 Pi 3.12
19 Wali agali urunibi karu homolilono✡ Yob 5.20, Iba 37.19, Ab 12.11
ibugua ti pele miaga ka.
Hina gari timbuni porangi
ti tomo karulape nalu helo mulebira.
20 Iname Anduane Homogoha hana howa✡ Iba 62.1, 115.9, Ais 8.17
ibuni mini dunu bia ho kamagoni.
Inanaga pabe tigibi ina biamogo biagabi
Anduane Homogo ibuni hangu kagoni.
21 Ibu kagome ina ibuha hanaho howa
turuho baya kamagoni.
Ibunaga mini baya buruguleore hongohe ngagoria
ina hanaho kamagoni.
22 Anduane Homogo-o ina í̠ni mini dunu bia ho kamagonigo
í̠na ina gubalini haho wiaaboore habelo hamelo kama.
✡33:5: Iba 11.7, 37.28, 119.64
✡33:6: Pig 1.6, 2.1, Iba 104.30, Hi 11.3
✡33:7: Har 15.8, Yos 3.16, Iba 78.13
✡33:10: Iba 2.1-3, Ais 8.10, 19.3
✡33:11: Yob 23.13, Iba 40.5, Min 19.21, Ais 55.8
✡33:12: Man 7.6, Iba 28.9, 144.15
✡33:13: Yob 28.24, Iba 11.4, 14.2
✡33:14: 1 Kin 8.39, 8.43, Iba 102.19
✡33:15: 2 Bit 16.9, Yob 10.8, Iba 119.73
✡33:17: Iba 20.7, 147.10, Min 21.31
✡33:18: Yob 36.7, Iba 32.8-10, 1 Pi 3.12
✡33:19: Yob 5.20, Iba 37.19, Ab 12.11
✡33:20: Iba 62.1, 115.9, Ais 8.17