145
Anduane Homogonaga mini mo yaraga halu iba gana lenego ogo
1 I̱naga Ngode Datagaliwabebi i̱naga kinibi í̠ kegonigo
i̱na wali agali bibahendehondo í̠ daliga gibiore ka lalu lamulebero.
I̱na í̠hondo ka̱i̱ lalu laaboore holebero.
2 Horo bibahendengi i̱na í̠hondo turu halu ka̱i̱ laabo halu holebero.
I̱na í̠naga mini mo yadagadaga haabo haluore holebero.
3 Anduane Homogo ibu mini lene daliga gibiore kago
bibahendeme ibunaga mini mo yaraga holene nga.
Ibu daliga gibiore haruagoni
iname ogobiore ka lowa manda biai habe nahe kama.
Inanaga manda bulenego emene ko tubagi kamagoni.
4 Í̠naore mbirale bigi biriruni wali agali áyu karume agua bigi biya lalu í̠naga mini mo yaraga halu ka.
Wali agali dabane mani hararu tiguabi nde
tinaga waneigini lamiragola uruni tiguabi nde
í̠naga mini mo yaraga halu dege holebira.
Tigua í̠na biabe hongoheore gibi bigi biriruni agua bigi biya lalu
bi te lalili bima puabo holebira.
5 Wali agalime í̠naga hongo baya gibi holenenaga lalubi
í̠ kini gibi kego lalubi bite laabo holebira.
Í̠na biabe hongohe gibiorebi agalime nabibeheru bigi birigonaga
i̱na miniha mitangidangi bialu haabo holebero.
6 Í̠naga hongo gibioreme biabe bigi birigonaga wali agali tigua bite laga bulebira.
I̱nabi nde í̠ daligaore gibi kagoni lalu maru karu lamulebero.
7 Tigua í̠naga mana baya gibiore biaga kegonaga maru lamialubi
í̠naga dara holene ngegonaga garea lalubi iba ganaru lalu holebira.
8 Anduane Homogo ibugua ina gubalini timbuniore hagabi dara howa biamogo biagabi ka.
Ibu keba abale tungulope nahaga howa
ibugua ibunaga gubalini haho wiaabo holeneme ina yaniho wiaabo helowa haga kagoni.✡ Dag 14.18, Iba 103.8
9 Ibugua wali agali bibahendehondo mana bayale ogobi degedege bialu mbirago bume hembome nalagaore kagoni.
Mbirale tara tara ibunime wabiniru bibahendeore dara howa ibuni handayaho haga kagoni.
10 Anduane Homogo-o mbirale mbirale ema bialu piaga í̠ni wabini karu
bibahendeoreme í̠ninaga mini mo yaraga haiore holebira.
Í̠naga wali agali bibahendeoreme í̠nihondo turu halu ka̱i̱ lalu lai holebira.
11 Í̠na dindi bibahende de handame howa baya buruguleore haru kegonaga tigua maru hale helo lamialu
í̠naga hongo holene gibiore ngegonagabi lalu lamulebira.
12 Wali agali karu bibahendeme Anduane Homogo í̠na biabe hongohe gibi bigi biriruni manda biai helo ani lamulebira.
Í̠ kini baya buruguleore hongohe howa
í̠naga mini daliga gibiore ngegoni manda biai helobi ani loyogo lalu holebira.
13 Í̠naga handame holene wiaaboore howa
wali agali bibahende haru haho wiaaboboore haga kini holebere.
Anduane Homogo ibugua mbirale mbira bulebero laga bialu lo wigi binigo
mbira pugua nabi lo beregedabi nabi
ibu mini bilinahe howa bulebero lenedagua biaiore haga kagoni.
Ibugua ina dara gibi haga howa mbirale bigi biraru ina biamogo bulenaga dege bigi biaga kagoni.
14 Wali agali genda yu howa mini burugulo karu bibahende biamogo bialu
wali agali yangoneme hengedope haragola dindiha haga karubi
ibunime ti mo yaragaho helolebira.
15 Mbirale dindini emabu bedaru damene bibahendeme í̠naga gi hangu hondole hanaho beda.
Ti tomo noa harangi í̠na ti karulape nelo miaga kegoni.
16 Í̠na ti bibahende tomo karulapeore nelo mialu
ti mbirale maru buru pada alebi mulene ngadagua miaga kegoni.
17 Anduane Homogo ibu mini tigabiore howa ibugua mbirale bigi biraru damene tigabi bialu
ina daraore howa biamogo bigi biaga kagoni.
18 Wali agalime ti miniha tigabi howa heneneorenaga Anduane Homogo olalu karu
ibuni ti kagoria kawareore íbu haga kagoni.
19 Wali agali Anduane Homogohondo giho haga karu
ti burupale ngaru ibunime tiga handaga haga.
Ti genda yu howa ibuhondo bi laragola ibunime hale halu gi miaga ka.
20 Wali agali Anduane Homogo ibuore gubalini haga karu
ibunime ti baya hanguore handayaho halu mamage haga ka.
Wali agali mana ko biaga karu ibugua ti bibahende bo mburi lai holebira.
21 I̱na Anduane Homogonaga mini mo yaraga haabo holebero.
Ibugua mbirale ema bialu piaga ibuni wabini karu bibahendeoreme
ibunaga mini baya buruguleore kago mo yaraga haaboore holene nga.