I̱naga wali agalirunaga bu miniha mo hongo habe.

Ti gi holene mo embeda howa elahe helo helabe, laya.

2 Yarusaleme wali agaliruhondo bi ogodagua lamilimu,

Anduane Homogohanda lalu, Tígua ko bialu harimigonaga tandaga karulapeore nalu harimigoni.

Tígua mana ko wiaru bialu harimigonaga mana lalu ai áyu ko birimiruni domo wahai hene kamigoni, laya.

3 Mbiralime ga̱lalu,✡ Md 3.3, Mg 1.3, Yo 1.23✡ Lg 3.4-6

Dindi ko wali agali nahaga ngagoria Anduane Homogo ibilo hariga ba hole manda bialu halimu.

Inanaga Ngode Datagaliwabe kago ibilo hariga tigabiore ba halimu.

4 Dindi ulini hombene ngaru mo dondelai halu✡ Ais 45.2

dindi hari emene timbunibi bibahende godogege biai halimu.

Hariga pidipodabi ngago tigatiga wilo bo tiga bialu

hariga ko ngago bayuwa mbaralalu mo tiga bilimu.

5 Ani biragola ogoningi Anduane Homogonaga wá taraore holene hapani holebira.

Wali agali dindi bibahendeha karume wá taraore holene ogoni de handai holebira.

Bi ogoni Anduane Homogo ibunime aniore bulebero lalu lowini.

6 Mbiralime ga̱lalu, Bi latagi ha, laya.✡ Ya 1.10-11, 1 Pi 2.24-25

I̱na ladai bialu lalu, I̱na bi ago latagi hoabe, laru.

Bi biagome lalu, Bi ogodagua latagi habe,

Wali agali bibahende karu datani minana anda hagadagua anda haga ka.

Tinaga yári bulene ngaru palawaya lini ale nga.

7 Anduane Homogohanda puyabu poboyogobi ibilarangi

datani gaulalu palawayaru abaleore dogolopebe biaga ka.

Ogonidagua dege wali agalibi heneneore tigi mbira hangu howa abaleore ereba haga.

8 Datani gaulalu palawayaru abaleore dogolopebe biaga.

Anigoyu inanaga Ngode Datagaliwabe ibunaga bi mana ngago dege wiaabo haga winigo nga, lalu latagi habe, lene.

9 Yarusaleme-o í̠na hari nene ngarunaga irigi howa

bi mana debene latagi habe.

Saiono-o í̠na bi mana debene ogoni bi hongo howa ga̱ lalu latagi habe.

Gi nahe howa latagi habe.

Yuda dindiha tinaga tano maru ngaruhondo lamialu,

Tínaga Ngode Datagaliwabe o ibiragonigo de handadaba labe.

10 Anduane Homogo Bibahende Haru Haame Ho Haga kago ibugua ibuninaga hongo timbuni heba o ibiragonigo de handadaba.✡ Ais 62.11, Mo 22.12

Agalime wai bialu ibunaga waitigiru bo podalu uruninaga dabudabu bayale ngaru mo yalu dai biagadagua

ibugua ibunaga wali agaliru ibuni pele mialu haru dai biyaru heba ibiragoni.

11 Nogo sibi haru hagarume tinaga sibiru haru hagadagua ibuninaga wali agaliru baya hanguore haru holebira.✡ Ese 34.15, Yo 10.11, Hi 13.20, 1 Pi 2.25, 5.4

Ibugua nogo sibi iginiru mo mogo buwa

ibuninaga gime igini emene biaru minu yalu bialu

angibuniru mandagi pelo baya hangu haru halu polebira.

12 Agali mbiralime iba solowara bedago gi habeni hambu yai habehebe.

Hari li ngago luni tubagila ogobiore nga lalu manda bibehebe.

Mbiralime dindi bibahendenaga dindi abalu mo mogo bialu gabo beha mo gambirai habehebe.

Mbiralime dindi haribi dindi hari hombene bare ngarubi uruninaga genda magi ogobi lalu manda bibehebe.

13 Wali agali mbiralime Anduane Homogohondo ogo ale mbira bia lalu lamulene karulape kabe.✡ Lm 11.34, 1 Ko 2.16

Mbiralime ibuhondo ogodagua bibe lowa mbirale ibu biawai halubi bibehe ai kabe.

14 Ibugua mana tigabi bayale ngaru bialu haabo helonaga pigane aiwa biawai henedabe.

Ibunaga mini mandabi baya burugule ngaruni agohayagi howa minidabe.

Uruni mbiralime biawai halu lawai henebi ndo ka.

15 Anduane Homogo ibugua dindi tara tarani hameigini kamaruni hondowa ina emene koore kamane hendeda.

Ina datani karunaga dadimba bedaru alebi kamane hendeda.

Solowara hanuni dindi podene mbira wuape karunaga genda magi bame yabiabi be abalu ale dege mandabu ka.

16 Lebanono dindi irabu timbuni ngagoha ema bialu piaga karu bibahendeore bai howa

i̱nanaga Ngode Datagaliwabe ibuhondo lomabu delolene nakarulape ka.

Irabu ogoni ira dewaore karubi bibahende dibai howa loma binirunaga dabuni delolene emene halu ndia holebira.

Uruni bame nahabane dege ngagoni.

17 Dindi bibahendeha hameigini tara tara bu karuni bibahendeore Anduane Homogo ibugua handalu karia uruni emeneore nahabane bu kane hendeda.✡ Iba 62.9, Dan 4.35

18 Ngode Datagaliwabe ibuore ai ale manda bibehebe.✡ Ab 17.29

Mbirale mbira ibu aleore agi ngabe.

19 Ibu agali gime mbirale bi pupu wulenaga wabinigo ale ndo ka.

Mbirale urunibi wabuwa bayale helo ngolo silibarume hira dambi henego ngago ogoni ale ndo ka.

20 Uruni bi pupu wulenaga wabule howa agali yagibano karume ngolo silibaru mibe nahe haga ka.

Anigo ibugua ira hongohe giambe togo nabiaga kago dabalu dibaga.

Ibugua dibalu bi pupu wulenaga ogoni ale wabiaga mandabi kago hai biaga.

Uruni ale wabiaga kagome mbirale ibira howa gingirulobaga nabilonaga ibugua wabiaga kagohondo wabia ha laga ka.

21 Ai tí manda nabiore kamibe.✡ Iba 19.1, Ab 14.17, Lm 1.19-20

Mbiralime ti langiabi nabi halebi nahe dege kamibe.

Piganengiore mbirale bibahende karubi ngarubi dindi ogo ogodagua bialu winida lowa bi te layanebi mbira hale naheore henedabe.

22 Uruni bibahende Anduane Homogo Kininaga biragane dagia hari daliga ngagoria biruwa ibunime uruni wabiai hene o bu ngaruni ndobe.

Ibugua hari li kagoni mo yanga lowa ibunaga balai anda ale helaga ka.

Ani biaga kagome ai wali agali dindini kamaru handa dali halu

ina bame uburuli emene ale kamaria hendeda ndobe.

23 Anduane Homogo ibugua agali haguane karubi kini karubi bibahende hengedape howa

ti mini lene ndo nagaloneore helaga ka.

24 Uruni ti tomo egene ale howa agalime áyu dege egene hengedagola dindiha pini nape wene ngaore dege

Anduane Homogohanda puyabu poboyogobi ibilaragola

egene abale gaulalu bame galone nabulene ngaligobi kagoni.

25 Anduane Homogohanda lalu, I̱ mini tigabiwi baya buruguleore kogonibi mendeali ai kabe.

I̱ aleore mbira ai kabe, laragoni.

26 Tígua hariha handa daga halimu.

Yakundi bu kane hendedamiruni aiwaore wabu helenedabe.

Uruni Anduane Homogo ibunime wabini ndobe.

Ti bibahendeore ibunaga wai biaga ami ale howa haru halu

ibunime ti ogodagua ka lowa dagalai halu

tinaga mini wiai halu manda biai ho kagoni.

Ibunaga hongo timbuniore kagome

ti mbirago mini nawi daga nalene yu wa naheore hai kagoni.

27 Yagaba waneigini Isaraele wali agaliru-o tí go̱mo̱go̱mo̱ lo kamigo agibe.

Tígua lalu, Anduane Homogohanda inanaga genda yu kamaru nahendebi

marume inahondo ko biragola ibugua ina biamogo nabi kagoni, lalu kami.

28 Ainde tí manda nabi kamibe. Halebi nahe dege kamibe.✡ Iba 147.5, Lm 11.33

Anduane Homogo ibu tínaga Ngode Datagaliwabe haluhe kagoni.

ibugua mbirale dindini ngarubi harini bu karubi bibahende wabiai henego ibuni hangu ka.

Ibunaga hongo holene emene mbira ibira nahagaore ka.

Mbiralime ibunaga mini ngaru handai habe naheore ka.

29 Anduane Homogohanda mbirali erekui halu hongo nahe ngo̱e̱le karu mo hongo howa helaga ka.

30 Igiri daliahe karuni tinaga tingini gedaore haga ka.

Igiri hongohe karuninaga hongo biba halu ibira haga kagoni.

31 Ai wali agali maru Anduane Homogohanda ti biamogo bilonaga mini mbiraore wuwa karu✡ Iba 103.5

ti ibira nahe hongo haho wiaabo holebira.

Ti ega hariawe ale babagane hongohe howa hari daligaore yagalagagobi ka.

Tigua gerai layaguabi ha̱ nalolebira.

Hariga luore piyaguabi pobe manga naholebira,