14
Erodi ina tainasi be nakae
Iyoni tosayóyova ina kámasa tetelidi
Iyoni tosayóyova ina kámasa tetelidi
(Maki 6:14-29; Luke 3:19-20, 9:7-9)
1 Amo tutayana da Galili adi tolovina Erodi Yeisu ina guinuwa valena inove. 2 Tuwo ina pakonayao yaidi goi Yeisu manuna idigo kana,
‘Amo korotoyana moe Iyoni tosayóyova. Tokámasa yaidi goi Yaubada bogina ikaitáoe. Ame pasina tauyana itoboine guinuwa toogagaidi iguuinuwedi.’
3 Kina go Erodiyana ina nuwonúwana nakae Iyoni ina kámasa pasina. Iyoniyana ina kámasa ame nakae: Boi Erodiyana ina lovina goi ina tovayaviyayao sina Iyoni siyoisi, nimana aena siyowóidi, e deri goi sivaisiu siyana Pilipo monena Erodiyasi manuna. 4 Boi mainao Erodiyasiyana moe Pilipo monena go, kina Erodiyana siyana monena tubitubina igagi. Go kina Iyoni tuta liliuna Erodi ilaatuwoko kana,
‘Erodi, kom geya am tagonamo bei amo vavinayana kunai!’† Vin 18:16, 20:21.
Kina Erodiyasiyana inove, gamona igoyo, tuwo Erodi ilovina bego Iyoni deri goi sivaisiu. 5 Erodiyana latuwona bego Iyoni ikaumate go, boda sinuwonúwana Iyoni moe Yaubada ina tokabivalavala tayamo, tauna bodayadi imatoitedi. 6 E tuwo ina bíbina ana maliyalina isowóduwo, e boda sima áika manuna. Aikayana goi Erodiyasi natuna vavina isiu ima boda matadi goi iláusa go, ina lausayana Erodi ivauyaone. 7 Tauna woiyaiyana yaina ikatótula idigo kana,
‘Iyagoida! Kaga kukawanoiye yaigu, bei avinim.’
8 E woiyaiyana ina sinana ilumadade ikavava, ikaluvila ina Erodi ilatuwoko idigo kana,
‘Iyoni tosayóyova bulubuluna noko goi kudodōi kuvinīgu.’
9 Livalayana tolovina Erodi inove, nuwona imou go, ina katótula pasina be nakae ina ogaoga pasidi, tauna ilovina ina topaisewayao sina nakae siguinuwe. 10 Tuwo ina topaisewayao ietunedi sina deri goi Iyoni nukotona sibobo. 11 Sibobo ikavava, bulubuluna sikabi, nokoyana tobuna goi sidodoi sime woiyaiyana sivini. Tuwo ikabi inave sinana ivini. Moe pasina tauna Erodiyana itainasi inuwonúwana Yeisu moe Iyoni go, bogina itaoyamna. 12 Ikavava, Iyoni ina tovatotowanayao sina wowona sikabi sinave valiwoga tukubu goi siyato. Siyato ikavava, sina Yeisu silatuwoko.
Boda ainima tausani (5,000)
Yeisu ivakanidi tetelina
Yeisu ivakanidi tetelina
(Maki 6:30-44; Luke 9:10-17; Iyoni 6:1-15)
13 E Iyoni ina tovatotowanayao idi livalayana Yeisu inove, ikabima amo dadavayana kakalave go, oga goi ametava kasowoya kakailova kasaidámana kana yoyowo tayamo goi. Go boda livala sinove bego Yeisu isaidámana, tuwo idi kasa sikalavedi aedi goi siketoiya sina Tauyana sisabokuliye. 14 Go kai kama kavaiu, Yeisu isou, boda gagaina igitedi inuwokapisiyedi, tuwo idi tokatowanayao ikidedevinedi. 15 E bogina lavilavi toina kai Yeisu ina tovatotowanayao kama Tauyana kalatuwoko kadigo kama,
‘Ame yoyowo go! Aiyuwoina níyala giyakainava bei isaliu. Neta boda kuvalilivēdi bego sina asa goi avadi sigimona.’
16 E kina go Yeisuyana idigo kana,
‘Tuwo, ameko sikaaiyaka. Komi kovakanīdi.’
17 ‘Manakaema? Ama beredi ainima be ama íyana aiyuwo, taudi go!’ kai kaema.
18 ‘Kokabīdi komēdi’, Tauyana kaena.
19 Tuwo moitamo kana kakabidi go, Yeisu boda ilovinaedi náuna goi situsobu. Ikavava, berediyadi ainima be iyanayadi aiyuwo Yeisu kai ina tovatotowanayao kavini. Tuwo ikabidi, ikandolaga yábana goi, manudi ikauyagu Yaubada yaina. Ikavava, ikivisidi, ivinima go, kai kakabidi kana kakaiguyauyedi bodayadi yaidi. 20 Tuwo tomota madabokidi sikáika gamodi. Sikáika ikavava, kai ina tovatotowanayaoyama valala kakatunokunokudi go, moe bayao yawou aiyuwo sikayaoda. 21 E kidi go tokaikayadi yaidi goi vevina be gogómana geya kakatuyaividita, go sem koroto kaka kakatuyaividi; adi badabada moe ainima tausani (5,000).
Yeisu Galili Bwaena yatana goi iiketoiya tetelina
(Maki 6:45-56; Iyoni 6:16-21)
22 Amo ikavava, mainao kai Yeisu ina tovatotowanayao ilatuwokoima idigo kana,
‘Oga goi kosowōya, kovakūmgo kotavīla kōna ta dadava go, yau boda bei alatuwokoidi sisáwala sina idi kasa.’
23 Ivalavema ikavava, bodayadi ilatuwokoidi sisáwala. Ikavava, ituko koya goi anetava ikawanoi. E níyala bogina isaliu, Tauyana anetava ikaaiyaka. 24 E kai ina tovatotowanayaoyama oga goi kasowoya, kabéuta. Kabeubéuta go, bogina kana aduwanau, e aivaya oga sikaugavigavile. Bogina kuyagoi. Yágira matama goi.
25 E botomotomo goi Yeisu bwae yatana goi iketoiya imamaima. 26 E kai go ina tovatotowanayaoyama kakandobala Tauyana kagite bwae yatana iketoiya imamaima, tuwo kamatoita kadigo kama,
‘Baloma goamo!’
Ima matoitayana goi kapodeda. 27 E mainao Yeisu idigo kana,
‘Kokatepātu! Yau Tauyagu.† Tat 3:14. Taabu koomatōita!’
28 E kina Pita idigo kana,
‘Tomoya, neta moitamo kom, e kulatuwokōigu bwae yatana goi awokoim.’
29 ‘Kūma!’ Yeisu kaena.
Tuwo Pitayana oga goi isou go, bwae yatana goi iketoiya inonoina Yeisu yaina. 30 E inonoina go, yagirayana igite, imatoita, tuwo ivatowo isalili. Tutayana iisalili, iduduwo kana,
‘Tomoya, kuyavēgu!’
31 E kina Yeisuyana mainao nimana ibisisobu, tauyana iyoisi idigo kana,
‘Kom to moitamo geya kunumisedokoiguta ae? Kaga unana kunanayuwo?’
32 Ibóbwara ikavava, oga goi sisowoya go, yagirayana idaúmwara. 33 E kai oga ana tokaiyakoyao kasakululu Tauyana yaina kadigo kama,
‘Kom moitamo Yaubada Natuna.’
34 Bogina kasaidámana kana Genesareta dadavina goi kavaiu. 35 Kavaiu, kasou go, toni kasa sikandoiwo Yeisu sikinane, e livala sietune ina asa liliudi amo dadavayana goi bego idi tokatowanayao liliudi simedi Yeisu yaina goi. 36 Go sikawanoi makimaki Tauyana yaina kadi,
‘Kutagonema am kwama kikina kaka kabisikone?’
Tuwo moitamo itagonedi go, avatauwa neta sibisikone, e siboboina.