17
Yeisu ina vatulúkwana
ana tosabokuli idi sinapu manuna
ana tosabokuli idi sinapu manuna
(Madiu 18:6-7,21-22; Maki 9:42-48)
1 E Yeisu ina tovatotowanayao ilatuwokoidi idigo kana,
‘Aba kapusi moitamo bei sisowóduwo yaimi go, avatauwa neta tovakapusi, adi toovalugo unana idi liuna gagaina toina bei sibabane! 2 Neta gurewa gagaidi sikabidi, nukotodi goi sisikoidi go, tauyadi silavedi sisou sina négwasa goi sisalili, moe adi dedevina sibabane, govila bego ame guna tonumisayao yaidi goi tayamo toosobuna sivakapusiye. 3 Ami dodōkana imi guinuwa goi! Neta siyami goyo iguinuwe, mami nuwokapisi koliwole.† Mad 18:15. Neta itugavila, konuwotāo. 4 Ago maliyalina tayamo goi neta siyamiyana sivanima sivayuwo goyo iguinuweko yaimi go, tuta tamo tamo ikaluvila iwo kana, “Atugavila”, e konuwotāo.’
5 Tuwo Tomoya ina vamoleyanayao sidigo kadi,
‘Tomoya, ima numisa kuvaitūwe.’
6 E Tomoyayana idigo kana,
‘Neta imi numisa beno kutukutuna nakiyana, itoboinemi gigiku ame kolatuwoko kami,
“Kutakubāla go, kuīwo kūna négwasa goi toinim kubagulīm.”
Bei ikabikaonemi.† Mad 17:20; Mak 11:23.
7 E avatauwa komi neta mami pakonayao totávina o sipi ana tomatakavata go, tayamo tánuwo goi ima, manakae? Bei kolatuwoko kami,
“Mainao kūma kutusōbu kwāika”?
Geya ae? 8 Go sem bei kolatuwoko ame nakae kami,
“Avagu kuvaipōlu. Ikavava, am kwama dedevina kulōsi, kuvaidēda bei akáika nakae anim. Akáika ikavava baige kom kwāika be kunīm.”
9 Kaga nakae imi pakonayao kolovinaedi to bei siguinuweyamo. Tauna manakae? Itoboinemi pakoninayana yaina kokauyagu gea geya? Geya. 10 Komi nakae itoboine pakonayaoyadi nakae koguinuwe. Tutayana kaga liliuna imi tomoya iloviinaemi bogina koguinuwedi, kodīgo kami,
“Kai im pakonayao, tauna taabu kuvaaiwowōima. Kaga nakae kulatuuwokoima bogina to kaguinuweyamo ame tauna.” ’
Yeisu tolepero yawou ikidedeevinedi tetelina
11 Tuwo Yeisu mana tovatotowanayao Yerusalema manuna sinonoina go, Samériya be Galili adi túwana goi siiketoiya. 12 Siiketoiya sina tayamo asa moetala goi koroto tolepero adi badabada yawou ivalobodedi; tauyadi tupwana masigava goi siitaoya 13 niyadi gagaina goi siduduwo kadi,
‘Tomoya Yeisu, kunuwokapisiyēma!’
14 Yeisu igitedi, ilatuwokoidi idigo kana,
‘Kōna Tonúwala yaidi goi kovagitakoēmi bei siyagoi sakavaimi bogina simavada.’† Vin 14:1-32.
Tuwo moitamo sinonoina go, enao goi sakavaidi bogina simavada. 15 E tolepero yaidi goi tayamo igite sakavaina bogina idedevina, tuwo itugavila, niyana gagaina goi Yaubada ina togaga ana káeyana ikamooitamoe go, ikaluvilamna ima Yeisu yaina. 16 Ima Yeisu aena goi ikanakabobo nakae ikauyagu. Go amo korotoyana guma Samériya! 17 E tomota matadi goi Yeisu idigo kana,
‘Maine tolepero adi badabada yawou sakavaidi simavada ae? Go adi tainima adi taivasi nakoidi? 18 Manakae? Geya latuwodi sima Yaubada ina togaga ana káeyana ana vagitákwana sikamoitamoe ae? Ame tauyana anetava ikaluvilamna ima go, tauyana Totuyoyowo!’
19 Tuwo korotoyana ilatuwoko idigo kana,
‘Kutāoya kūna. Im numisa pasina am yava bogina kubabane.’
Yeisu ina vatulúkwana
Yaubada ina kalibúbuna ina sowóduwo manuna
Yaubada ina kalibúbuna ina sowóduwo manuna
(Madiu 24:23-28,37-41,45-48)
20 E Parisi sima Yeisu silumadade kadi,
‘Yaubada ina kalibúbuna ava tuta be isowóduwo?’
Yeisu idigo kana,
‘Yaubada ina kalibúbuna ina sowóduwo goi geya kada tayamo aba kinana bei igimisowóduwo bego ina sowóduwo italavaite. 21 Nakae geya itoboinedeta kada,
“Kodobāla, Yaubada ina kalibúbuna goame!”
O kada,
“Goamo!”
Moitamo. Konōve! Yaubada ina kalibubunayana moe yaimi goi bogina ikaaiyaka.’
22 E Yeisu ina tovatotowanayao ilatuwokoidi idigo kana,
‘Tuta simamaima bei latuwomi Tomalatomota ina kaluvilamna ana tuta kogite go, geya bei kogiteyeta. 23 Tomota bei kadi,
“Kodobāla Guyau goamo!”
O kadi,
“Guyau goame!”
Nakae bei sibobore go, taabu kononōina, e tauyadi taabu kosabokuuliyēdi. 24 Guyauyana ina sowóduwo moe nakae geya. Moitamo. Ávila bogina tayagoi. Tayamo dadavina yábana goi ikávila ina ituli ta dadava. Tomalatomota ina tuta sowóduwo tauna nakae. Tomota liliudi bei sigite. 25 Go mainao Tauyana itoboine bei gedageda ibabane be tomota Parisiyadi nakae sikatae. 26 Nakonakae boi Nowa ina tuta goi mluwa ina sowóduwo,† Abv 6:5-8. e Tomalatomotayana ina tuta aluvilamna amo nakae. 27 Nowa ina tutayana goi tomota idi guinuwa siguuinuwedi. Nakae sikakáika be sinimnim be nakae sinainai ana kadókana Nowa mana bodayauwo sitaoya dedeoga gagaina goi sisowoya. Go tomotayadi idi sinapu tauna nakae go, mluwa ima ivatoopedi isamatedi.† Abv 7:6-24. 28 Loti ina tuta nakae.† Abv 18:20—19:25. Tomota madabokidi sikakáika, sinimnim, siigimona, sikaaigimona, sibagubágula, nakae vada siyowoyówana. 29 E tuta amo goi Loti itaoya Sodoma ikalave go, yeu be gurewa yaviyavidi yábana goi sisou tomota liliudi sivatoopedi sivailai. 30 Tauna nakae bei isowóduwo tutayana Yaubada Tomalatomota ikaiwoduwe. 31 Tuta amo goi avatauwa neta vada yatana goi sikaaiyaka go, konadi vada sinaena goi, e taabu sisousōu bego konadiyadi sikabidi, go sem sisiyāmo. Avatauwa neta tánuwo goi sikaaiyaka, taabu sikaaluvīla sīna idi kasa goi bego konadi sikabidi, go sem sisiyāmo.† Mad 24:17-18; Mak 13:15-16. 32 Loti monena konuuwāisi kaga boi isowóduwo tauyana yaina.† Abv 19:26. 33 Avatauwa neta sipoikiki bego yawoidi siyoisikavate, nava yawoidi vau bei sitagau. Go avatauwa neta yau pasigu yawoidi sitagau, e nava yawoidi vau bei siyoisikavate.† Mad 10:39, 16:25; Mak 8:35; Luk 9:24; Iyo 12:25. 34 Ame alatuuwokoimi konōve: Amo sabamgoyana goi Tomalatomota bei ikaluvilamna ima go, tomota adi taiyuwo kebadi tayamo goi sikaaiyaka. Tayamo Yaubada ikabi inave go, tayamo ikalave ikaaiyaka. 35 Vevina adi taiyuwo witi sikauveyetaveta. E tayamo Yaubada ikabi inave go, tayamo ikalave ikaaiyaka.’
36-37 Go kidi ina tovatotowanayaoyadi sidigo kadi,
‘Tomoya, moe nako goi bei isowóduwo?’
E Yeisu livalakaibala goi idigo kana,
‘Nako goi boyoboyo sitaligógana, e amoko goi tomata ikaaiyaka. E nakae tutayana Tomalatomota ikaluvilamna ima, kidi balomaidi kaamasidi takínona bogina bei sibabane.’‡ Nakona tomwana 36 Luke geya iginiyeta, go sem tokaidámana tayamo toinina ina nuwonúwana igini. Kopi maniyedi tomwana 36 ikaaiyaka ame nakae: Nakae koroto adi taiyuwo tánuwo goi sipaaisewa. Tayamo, Yaubada ikabi inave go, tayamo ikalave ikaaiyaka.
†17:14 Vin 14:1-32.
†17:31 Mad 24:17-18; Mak 13:15-16.
†17:33 Mad 10:39, 16:25; Mak 8:35; Luk 9:24; Iyo 12:25.
‡17:36-37 Nakona tomwana 36 Luke geya iginiyeta, go sem tokaidámana tayamo toinina ina nuwonúwana igini. Kopi maniyedi tomwana 36 ikaaiyaka ame nakae: Nakae koroto adi taiyuwo tánuwo goi sipaaisewa. Tayamo, Yaubada ikabi inave go, tayamo ikalave ikaaiyaka.