48
Yakobo tubunao ikaipaakuyedi tetelidi
1 E sikaaiyaka, sikaaiyaka, aaa, tomota maniyedi sima Iyosepa silatuwoko sidigo kadi,
‘Iyosepa, tamam ikatówana.’
Tuwo natunao Manase be Eparaim ikabidi, taiyao sina tamana sigite. 2 Tuwo sina sisowóduwo, e tomota sisiu Yakobo ina vada goi silatuwoko sidigo kadi,
‘Yakobo, natum Iyosepa bogina ima.’
Tuwo livalayana inove, e ina togaga igidigidi, ina kaba masisi goi itusobu. 3 Ikavava, Iyosepa isiu go, tamana idigo kana,
‘Iyosepa, boi nimatu asa Lusi goi Kenani sinaena, Yaubada Tokalika toinina isowóduwo yaigu,† Abv 28:13-14. e ikaipakuyegu, 4 idigo kana,
“Kunōve. Bei akisailim, e bei tubumowo badabadaidi. Tauyadi goi boda ituli ituli bei sisowóduwo. Ame poyapoyayana tubumowo bei avinidi; ikaiyako vata yaidi.” ’
5 Yakobo tuwaina kana,
‘Iyosepa, tutayana nava geya amaita ameko, kom natumowo Manase be Eparaim Itipita goi sibíbina, e adi taiyuwo ame tuta avanatunedi, tauna tauyadi natugowo nakae Rubeni be Simion. 6 E ava gogomanava tuwaina sibíbina yaim, e kidi kom natumowo. Amo natumowoyadi tubudiyao adi kaiguyau poyapoya moe Manase be Eparaim idi poyapoya goi sikabidi. 7 E ame nakae aguinuwe sinam ina kámasa pasina. Boi asa Padani akalave ama Kenani asiu. Ego Eparati kenaoina goi sinam Reitiyeli ikámasa.† Abv 35:16-19. Tuwo amoko goi tauyana avaliwoge. Ego nuwogu imou gagaina, tauna ame pasina natumowo akabidi.’
(Ego niga Eparatiyana sivayou Bedeliyema.)
8 E tutayana Isileli ikandobala, Iyosepa natunao igitedi idigo kana,
‘Ame ava gogomanava?’
9 ‘Ame natugowo Yaubada ivinigu’, Iyosepa kaena.
Isileli idigo kana,
‘Kumēdi matagu goi bei akaipakuyedi.’
10 Ego Isileli matana bogina sikau unana bogina ikaitomoya, tauna giyaina igita. Tuwo Iyosepa natunao imedi tamana matana goi sitaoya. E Yakobo iyowoiidi be ivayavaudi. 11 Isileliyana idigo kana,
‘Iyosepa, boi anuwonúwana geya tuwaina bei agitem go, Yaubada bogina itagona bego kom ma natumowo agitemi.’
12 E tuwo Iyosepa natunao ikabimneidi ikaibaledi go, kina aena ivatugúyala, ikanakabobo tamana yaina. 13 Ikanakabobo ikavava, natuna Eparaim ikaibale Isileli kekelina goi itaoya go, Manase ikaibale Isileli kakataina goi itaoya. Moe unana Manase botomoya. 14 E Isileli nimakakataina iyosale, e Eparaim dabana iyoisi go, Eparaimyana bogomane. E nimana kekelina iyosale Manase dabana iyoisi‡ Idi sinapu tutayana koroto natuna ikaipakuye ame nakae: Nimakakataina goi botomoya iyoisi. go, Manaseyana botomoya. 15 Ikavava, Iyosepayana ikaipakuye,‡ Ikaipakuye: Yakobo natuna Iyosepa ikaipakuye moe nakae Iyosepa natunao ikaipakuyedi. Neta Yakoboyana tubunao ikaipakuyedi moe nakae tamadi Iyosepa ikaipakuye. idigo kana,
‘Boi nimatu tamagu Aisake be tubugu Eberamo
idi ketoiya dedevina Yaubada matana goi.
Yawoigu ana madabokina goi Yaubadayana guna tomatakavata
nakae sipi adi tomatakavata.
16 Boi Tauyana anerose nakae vailai goi iyavegu.
E guna kawanoi amo Yaubadayana yaina goi
bego natumowo ikaipakuyedi,
e bei tomota yau yoigu siyagoi
be nakae tamagu Aisake be tubugu Eberamo yoidi
siyagoidi gogomanayadi pasidi.
E tutayana sisusáila,
tubudiyao badabadaidi poyapoya ame goi.’
17 E Iyosepa ikandobala tamana igite ibágala unana nimakakataina goi Eparaim dabana iyoisi. Tuwo ona ikai, e nimanayana iyoisi, ikigagi bego ikaidamane Manase dabana goi, 18 e idigo kana,
‘Tamagu, moe nakae geya. Ame Manase botomoya. Itoboine nimakakataim goi dabana kuyoisi.’
19 Go kina tamanayana ikatae idigo kana,
‘Natugu, bogina ayagoi. Tauyana nakae bei isusáila boda tayamo gagaina nakae ina lovina bei itogaga. Go sem kina bogomane bei ivakaigagasave be nakae tauyana yaina goi boda badabadaidi bei sisowóduwo.’
20 Tuwo ikaipakuyedi, idigo kana,
‘Neta tubugowo sikaipaku,
yoimi goi bei sikaipaku kadi,
“Yaubada bei ivaitem nakae boi Eparaim be Manase ivaitedi.” ’
Tauna moe nakae Eparaim siyana Manase ivakumgoiye.† Ibe 11:21.
21 E Isileli Iyosepa ilatuwoko idigo kana,
‘Iyosepa kunōve. Giyakainava bei akámasa go, Yaubada bei ivakitaum. Tubumowo bei ikaluvilemneidi sina tubudao idi kasa goi. 22 E amoko goi poyapoya yoina Sekem semowoyadi geya avinidita, go sem moe kom avinim. Asayana boi yaviya goi akabi Emori tubunao yaidi.’