59
Vania na tinoni gehe linge: Na lingena David, tana bona Saul te nira vetena na lei tinoni kisumate na va righitaoniana na valena David ge kara matea. Lingea tana hulu, “Ko bei haurake.”
1 Ko lavi kehau itadira na lei ghagua na kana, ghe God,
mo ko pilu pungisiu itadira tara mai ge kara haurakeu.
2 Lavi kehau itadira na lei vure labu polo raeni;
vavolau itadira na lei vure mate tinoni raeni.
3 A gaira tara gonidilaa ghagua na mate.
Ara mamataghugha na lei ghagua na kana tara pitudilau.
Hauvaa, Ghe God, Inau tu mua gonia siki totobo ke hahi vanira.
4 Sakai vamua inau na tinoni marabu,
A gaira tara gonidilaa ni mateagu sono.
Ko tughuru dato mo ko hangau!
Ko vaevaneu mai ta nigua na vahola.
5 Ghe a Lord, God, puku ni maana,
Na God ni Israel ko tughuru dato
mo ko hera na vahaghitailira na lei kema tara kabu dika.
Bei righi arovira gea rana lei tinoni dika tara peropero tinoni.
6 A gaira tara mai tana bongi
Ra nguru salalaa vaghara na lei kau asi
tara mamaha tana bona tara tona kolili tana lei halautu.
7 Rongovighi na lei kokoe dika tara rughu horu mai tana mangadira.
Na isi te mamataghugha te lovo horu mai tana ghiludira.
Mara hurughi mara ghaghua, ahei ku tangomana na vahaghitailimami?
8 Mi ghoe nigua na laga,
Inau tu pitugho ge ke lavi kehau tana vahola vahaghitaili
nia ighoe, ghe a God, nigua na lei bona ni vola.
10 A nigua na God ke mai me ke hangau ta nina dolo te mua soko buto.
A gaia ke niu ge ku rei horura tara kanahaghiniu tana lagavule.
11 Ko bei matera, na pukuna gaira rana lei kulagu na vure kara mua hau na niani ponolio na vata ghana ni taraighi.
labu pogho poghotaola vaghini horura nia nimua na maana,
ma kara nia tuturi kauha na tuturudira.
Ghe a Lord a nimami na tako ni rerebe.
12 Nia na pukuna na lei bosa ni palugha tara bosai, nia na dika tana lei ghidudira,
lubatia didira na talunagho ke talura tana dete,
maia ghua didira na lei bosa ni vavaranga mana sorisori.
13 Ta nimua na rutu papara ko haurakera!
nira piri keha udolu!
Ge na lei tinoni togha tana maramana udolu
kara ghilala a God te vunaghi pungisia Israel.
14 Na lei ghagua na kana tara rughuhoru mai tana bongi, ra nguru salala vaghara na kau asi tara mamataghugha tana bona tara tona kolili itatana na lei halautu.
15 Ra kenea na vanga kara ghania,
ara mua mahu mara sosoko ni maturu.
16 Mi nau ku nia lingelinge nimua na maana.
Ku nia ghughu na togotogo tughu puipungi nia
na pukuna nimua na dolo te mua soko buto.
Ighoe a nigua na bona ni polo.
Na bona ni vola tana bongi ni kanoragha.
17 Ighoe, a nigua na laga,
Inau ku linge holohaba vanigho
vanigho ighoe ghe a God, a nigua na lei bona ni polo.
Na God te talutatea vaniu na dolo te mua soko buto.