1 Murina eni, Yahweh te bosa vania Abram tana maturubole, mi lokana na mabubu eni te rongovia Yahweh te bosa me ghaghua, “Abram, ko bei mataghu. Inau so ku pilipilugho te vagha na tako, ge ke mua kalegho siki totobo dika. Inau ku hegho sakai na taba sule vahotua.”

2 Ma Abram te bosatughu me ghaghua, “Maghutu Yahweh, nimua na taba ke mua hangau na pukuna tu mua logho dalegu. A nigua na ghairau, A Eliezer eni, na tinoni ni Damascus vamua, gaia ke lavighi nigua na lologho. 3 Ighoe to mua heu siki dalegu, keri ke, asakai tadira nigua na ghairau igeva ke lavighi nigua na lologho.”

4 Keri ge Yahweh te bosa vania me ghaghua, “Nimua na ghairau Eliezer eni ke mua salapu i tatana siki nimua na lei lologho. A dalemu na mane heghemu mughua ke loghoi nimua na lei lologho.” 5 Ma Yahweh te lavi horua i paribebete ge bosa vania, “Ko reidato tana parako i kokou, mo ko tabotabo na idumiani na lei veitughu. Ighoe ko mua tangomana ge ko idumi sokoi! Gaighi ke vaghai na suboni na gari kara vahura tana kemamu.” 6 Ma Abram te taluutunia Yahweh, ma Yahweh te dete maemanea na pukuna nina taluutuni.

7 Keri ge bosa Yahweh vania Abram, “Inau Yahweh tu lavikehagho mai Ur tana bubulo i Babylonia, ge ku hegho na pari eni ke nimua heghemu.”

8 Ma Abram te huahuati me ghaghua, “?Maghutu Yahweh, ivei kea ge ku ghilala utoa te nigua na pari keri?”

9 Ge bosatughu Yahweh me ghaghua, “Ko lavighi vaniu mai sakai na buluka vaivine, ma sakai na goat, ma sakai na sheep mane, te tolu na niuludira tua, maia sakai na bola ma sakai na dalei bola.” 10 Keri ke Abram te lavighi mai na maumanu raini vania God, me matera ge pahelevui, me nei gaa e rua na levu ge talu alaala. Hauva me mua pahelevui na manu. 11 Na lei manukama tara lovo horu mai na ghaniani na lei maumanu mate raini, ma Abram te ghuru kehara.

12 Mi tana bona te tona ni huu na aho ka, ma Abram te maturu mate, me maturu bole bulebule, me righia na pungi sule ngangata me mataghuni. 13 Mana Yahweh te bosa vania me ghaghua, “Rana vaivarimu kara sinogho tana butonikomu keha, ma kara seka igaa, mi lokana e vati hangalatu na niulu kara kabu vahaghitaili. 14 Mi nau ku hea na totoro na butonikomu te nera igaa, mi tana bona kara sania na butonikomu keri ke, mana lei totobo uto igaa kara lavighi. 15 Ma Abram, ighoe ke daro na volamu, mo ko saravia na bona ko tonikama iga, keri vaho ge ko mate horu, ma kara tavughigho tana mabo. 16 Mi murina vaho tana vatini na vavata ge kara ghoi oli mai tana pari eni na lei vaivarimu, na pukuna ku mua tiva kehara mua na kemana Amor ritini ke dika haghata vaho tua na voladira, keri vaho ge ku hera na totoro.”

17 Mi tana bona te huu tua na aho me puikapu tua, Abram te righia na popo te loghoa na lake ni ahu, kolua na ghai te ruruhu moro tona haliu va ighobudira na pilepileni na lei maumanu. 18 Mi tana bongi keri Yahweh te baubahu vania Abram ge ghaghua, “Ku hera na lei vaivarimu na lei bona ni pari raini, te vuivuni tana kobekobena Egypt me va sara tana beti tina sule i Euphrates. 19 Aeni na bona ni pari didira na kemana Ken, kemana Keniz, kemana Kadmon, 20 kemana Het, kemana Periz, kemana Repha, 21 kemana Amor, kemana Canaan, kemana Girgash, mana kemana Jebus.”