1 Yesu kana kivikivina yavata Gariri tokana idamani ma iwota. Dobuna kana vava Gerasa. 2 Yesu wakiiyai iororu na yaghiyaghinai tomowa sago iverupotei. Tomowina na kanuma berona gwabinai irunuma ma karawaga kamonai ikiibau. 3 Mara nonowa karawaga bubana kamosiyai ivivi makiiyana ma wawaya ikutatana kavai. 4 Mara ipeyari imana ma kaena ikutatani ma kegha da chein imanai iyaraghi ma kirama sawarisi kaena ipatumi na ivi kiigiiyana. Ma ke kovokovoghina da wawaya ita kuvipikapikai. 5 Didibarai ma mariyai tomowina na karawagai ma koyiyai ikiikiirara yawara ma tuna mani wakimiyai irigharigha meyei.

6 Tomowina ikitataweyana da Yesu ikitai. Iverau da ku maghinona ma ivi tuwaporeruruwana ma maghighina ioru ku tano. 7 Ma ikiirara bo, “Yesu, tam God Kiidamo Makamakiina Natuna. Avi kuna berai kuriku? Ainowi kurim da God avanai kuni vaghinei da kovogha ke kuna vereku.”

8 Nakanani ivi sisiya iyamna Yesu namada ivona bo, “Kanuma berom, weni tomowina kekiibutawei.”

9 Ma Yesu ivi tarakiiyana bo, “Kam vava iyai?”

Ma ivonapotei bo, “Kakii vava Koroto Ghamana, iyamna kapeyari kirakai weni tomowina gwabinai karunuma.”* ‘Koroto Ghamana’ na Lidiyoni ivi sisiyei. Lidiyoni sago na Rome damsi i seri wawayisi 6 tausan. 10 Ma ivi nowi kirakai da Yesu ke ita kwavinisi da nani dobuna ita kuyowei.

11 Ma poro yavona ghamana ke ita rabaraba, ti na koya baranai ikamkam. 12 Ma kanuma beroberosi Yesu kurina ivi nowi bo, “Nani porosi kurisi kuna vonatawekai. Ma kuni vaghinekai da gwabisiyai kana runuma.” 13 Ivi vaghinei na peyarisi tomowina ikiibutawei da inae poro kurisi. Ma nani porosi ivi 2 tausan na iverau ioru ku kiiyagirina ma itawesi ku okowa da iuma dodo.

14 Ma poro kii koyakoyagha iverau inae da wawaya kwanatu kamonai ma bade dipiiyai ivonaveresi. Ma peyarisi ikiibau da aviyavisina itupuwa na matasiyai ita ikitai. 15 Yesu kurina inekiibau ma tomowina kanuma beroberosi ikiibutawei na ikitai da tuna Yesu ririnai imakamakai, ivi gara ma gayamina ibiibai. Ikitai na peyarisi iyabumana. 16 Ma iyavo kava bera kudubina ikitai na turaturasi ivi mamataresi da aviyavisina itupuwa tomowina kurina ma bade poro kurisi.

17 Ma peyarisi ivi karei da Yesu ivonavonei da i dobu ita kiibukuyowei.

18 Yesu ku waka igerugeru da ita nae ma nani tomowina kanuma beroberosi ikiibutawei na ivi nowi da yavata ita nae.

19 Ma Yesu ke iti vaghinei, ivonapotei bo, “Kegha, kenae am ku numa ma am rakaraka kuna vonesi da aviyavisina Bada iberai kurim. Kevi akovisi da ivi kamyuyuwem.”

20 Ma vaghina, tomowina inae ma Dekapolis dobunai ivivi mamatara meyei da Yesu ivi yawasi.† Dekapolis: Dobuna kana vava Dekapolis, Grik gamosiyai iyamna kwanatu imaruwa. Ma wawaya peyarisi ivi deyei.

21 Yesu idamaname ku Gariri tokana nevana na toka baranai koroto ghamana iriyei kurina da imiirigwagwari. 22 Ma bade kiki numana badana sago kana vava Jairas ipisi. Tuna Yesu ikitai na maghinonai itawotei da ivi tuwaporeruruwana, 23 ma ere nuwadugarina natuna gisina kubiine ivi nowi kirakai, ivona bo, “Natuku wavinena igubaga kirakai da gisina kava ina rabobo. Kade kuta pisi, imam ku tepana kuta terei da ita yawasa.”

24 Ma Yesu ivomiiri da yavata inae. Ma koroto ghamana ikivinisi da ivi kiitabitabirana.

25 Ma wavine sago gubagubagina nani korotona kamonai. Kana gubaga na nawaravi iviiya ma tarana iverau da madegha 12 ikovi. 26 Yaboyabo ipeyari ivi miiyesi ma ibunama kavai, ke ita yawasa. Ina mura kudubina ivi kovini ma kegha da kana gubaga irakata. 27 Ivi yanei da Yesu wawaya ivivi yawasisi, tuna kubiine koroto kamonai tuna murinai ipisi ma kana gara ivotovoni. 28 Inotai bo, “Kana gara kava ana votovonotei na ana yawasa.”

29 Yaghiyaghinai tarana veru ivoterei ma damina iviiya da iyawasa. 30 Ma bade Yesu damina iviiya da rewapana gwabinai ikiibau. Wawaya kamosiyai imiiritavire ma ivi tarakiiyanesi bo, “Iyi kaku gara ivotovoni?”

31 Ma kana kivikivina ivonapotei bo, “Kekitai da koroto ikiitabitabirana. Avi kubiine kuvi tarakiiyana da iyi ivotovonim?”

32 Ma Yesu patana da ikitakitavirevire da iyi iberai. 33 Ma wavinena iakovi da aviyavisina itupuwa kurina ma ipisi Yesu kurina da maghinonai ivi tuwaporeruruwana ma maghighina ioru ku tano. Iyabumana kirakai ma ere kirokirorona vonavaghata kudubina ivi mamatarei. 34 Ma Yesu ivona bo, “Wavine, am vitumaghana kubiine kuyawasa. Nuwanubiiyai kenae. Weni gubagina kamonai kuvovokwarakwara na karako kukiibutawei.”

35 Yesu ivivi sisiya ma nani kamonai Jairas turaturana ipisi ma ivonei bo, “Natum namada irabobo. Ita vibeyebeyena wawayina kitinaviravirai. Kevoterei ma tanae.”

36 Ma Yesu ivi yanatawesi ma Jairas kurina ivona bo, “Ke kuna yabumana. Kevi tumaghaneku.”

37 Ma Yesu koroto ivonatanisi da ke ita kivini ma wawaya aroba kava ivinesi da yavata ita nae. Ti na Pita, Jemes ma Jon (tuna na Jemes tina kikei). 38 Jairas ina ku numa inekiibau na Yesu nipu ghamana ivi yanei, wawaya itutuwenoweno ma isiyasiyapa. 39 Irui ma ivonesi bo, “Avi kubiine kotutou ma kosiyasiyapa? Kovoterei! Wawaya kikei ke ita rabobo, ekenakena.”‡ Yesu iakovi da irabobo ma ini yawasi, tuna kubiine nakanani ivi sisiya.

40 Ma wawayisi Yesu ivi namei. Ikwavinisi ikiibau da wavine kikei ina mamai, ina maduwa, ma kana kivikivina ivi aroba na ti kava irutinisi da irui wavine kikei kurina. 41 Imana iviini ma ivonei bo, “Talitha, koum” iyamna “Wavine kikei, kevomiiri.”

42 Yaghiyaghinai ivomiiri ma ibaba tovotovona ma peyarisi inotakavakavai. Ma wavine kikei iyawasa na kana madegha na 12. 43 Nani murinai Yesu peyarisi ivonatanisi da aviyavisina itupuwa na ke ini mamatara. Ma ivonesi da wavine kikei vavai ita verei da ita kam.