62
Mukizi biika umulangaaliro imwa Rurema
1 Imwoꞌmwimangizi waꞌbimbi. Izaburi ya Dahudi. Luli mu yimbwa ngeꞌnyimbo za Yedutuni.
2 Ndi mu kizibwa mu kati ka Rurema naaho.
Munali mwoꞌmutima gwani gugweti gugaluhuukira.
3 Yenyene naaho ye lwala lwani, ye nali mu ngiza.
Ye siribo yani, ndanâye ki hubagale.
4 Kundu kwokwo, ndyagagi mundu ngana.
Aahago! Mugagenderera ukukizi ndeera halinde mangoki?
Emwe! Halinde mangoki mugakizi ndimba haashi?
Si ngola nga kigo íkikoli kongamiri, kinakola bu hongoka!
5 Yaba bandu basiimiri ukukizi deta ibibeesha.
Keera banashungika kwo bandyose ho ndi mu simbahwa.
Ehee! Ku tunwa twabo, bagweti bagagashanirana.
Halikago mu mitima yabo, bagweti bagadaakana naaho.
6 E mutima gwani, ukizi luhuuka mu kati ka Rurema naaho.
Mu mwage, mwo ngakizi biika umulangaaliro.
7 Yehe naaho, ye lwala lwani, ye nali mu ngiza.
Yehe, ye siribo yani. Kwokwo, ndâye ki hubagale.
8 Ubukize bwani noꞌlushaagwa lwani, bilyosiri imwa Rurema.
Mukuba, ye gweti úganjuutira, ye na lwala lwani.
9 E bandu, mukizi biika umulangaaliro imwa Rurema.
Munamúyerekage byoshi íbiri mu mitima yinyu.
Mukuba, ye mu tushuutira.
10 Si abandi booshi, balyagagi nga muuka naaho!
Abatwali naꞌbagunda, booshi bali busha ngana.
Nga booshi bangaleziibwi ku lugero,
umuuka gwo muzito.
11 Kwokwo, mutakizi ki biika umulangaaliro ku bulyalya.
Mutanakizi yihayira ubuzimba.
Kundu ibindu biinyu byangayushuuka,
bitakizi ba byo mugabiika kwoꞌmutima.
12 Rurema keera akadeta amagambo,
nanayuvwa kwo gali gabiri.
Ubwa mbere: wehe naaho, we Rurema woꞌbushobozi.
13 Noꞌbwa kabiri: We Nahano, we mu kundana.
Ku kasiisa, ugahemba ngiisi mundu,
ukukulikirana na ngiisi kwo âli kizi kola.* 62.13 Barumi 2.6; Migani 24.12.