Apaiti Bosikopuman
Den sani di den apaiti bosikopuman fu Masaa Jesesi du
Wan wowtu a fesi
Da na Dataa Lukasi di sikiifi a Bun Nyunsu fu Lukasi, ne en sikiifi a buku ya. Da soseefi a sikiifi a buku ya gi Teyofili, wan bun mati fi en. Da a sikiifi den sani ya 80 te go miti 90 yali baka di Masaa Jesesi be meke kon a goontapu.
A mama fu a toli fu a buku ya e soi wi fa den bakaman fu Masaa Jesesi be e paati a Bun Nyunsu fu Masaa Jesesi a den kondee kondee anga a kaakiti fu a Jeje fu Masaa Gadu di be kon a den tapu. Den bigin a Jelusalem anga den taa kondee fu Judeja de, te go miti Samaliya Kondee. Na so den go a den kondee kondee di be de a goontapu na a pisiten de. Leisi 1:8.
U kai a buku ya Apaiti Bosikopuman, ma efi i luku en bun, da a nen ya á bun. Den be mu kai en, Den wooko fu a Jeje fu Masaa Gadu. Bika a ná den apaiti bosikopuman du den foondoo wooko, ma na a Jeje fu Masaa Gadu du den foondoo wooko ya. Da a á taki sani fu ala den apaiti bosikopuman fu Masaa Jesesi, ma a taki sani fu Peitilisi anga Pawlesi moo ipi.
Da den toli fu a buku ya paati a tu gaan pisi. Bigin wan te go miti di fu twalufu ede maiki, da Peitilisi nen e moo kai. Ma fu bigin tin na dii te go miti a kaba pisi, da Pawlesi nen e moo kai. Bika a Jeje fu Masaa Gadu be e wooko anga Peitilisi e paati a bosikopu a Judeja Kondee gi den Dyusama. Ma anga Pawlesi a be e wooko fu paati a bosikopu gi den sama di á de Dyu.
Da den sani di Lukasi sikiifi ya, na sani di a be yee sama be e taki anga san enseefi be akisi sama tu. Ma efi i leisi bun, da yu o si taki a somen peesi, da enseefi be de a ini tu.
1
Masaa Jesesi fika wooko gi den apaiti bosikopuman fi en
1 Mi lobi mati Teyofili! Na mi Lukasi e sikiifi a buku ya gi yu. A taa buku di mi be sende gi yu kaba, be soi san Masaa Jesesi be du, anga fa a be leli sama. 2 Mi be sikiifi fa a wooko te doo a dei di Masaa Gadu puu en ya libilibi go poti ne en kondee a tapu anda. Ma fosi dati, da a Apaiti Jeje di teke en hii libi abaa be piki en fa fu taigi en apaiti bosikopuman, fu wooko go doo. Na den dati a teke poti fika a baka ya, fu paati en bosikopu. 3 Bika di a dede weki baka, da na den ai soi enseefi libilibi somen leisi. Hii fotenti dei, fu den si fa a dede weki tuu. Soseefi ai leli den moo sani, fu sabi fa Masaa Gadu poti fu tii sani.
4 Wan fu den leisi di a soi den enseefi, namo a tapu den taki, den á mu komoto a Jelusalem Foto ete. Bika na ape den o fende a gaanbigi bun di Masaa Jesesi be taigi den kaba taki, en Tata be paamisi. 5 Bika a ná o langa, da san o pasa de sa bigi moo fa Johanisi be e teke wataa dopu sama. Bika na Masaa Gadu o teke en Apaiti Jeje dopu den.
6 Wan fu den taa leisi di a soi den enseefi, ne den akisi en efu na a pisiten ya kaba, a o tii Dyu Kondee enke fa Masaa Gadu be paamisi, fu sende a edeman de kon enke kownu. Efu na a pisiten ya a o meke Dyu Kondee toon a moo hei kondee fu goontapu. 7 Namo a piki taki: “U ná abi fu sabi ala dati. Mi Tata, Masaa Gadu á gi u pasi fu dati. En wawan namo sabi. Bika ne en poti a dei anga a ten fu ala dati. 8 Ma sabi namo taki, Masaa Gadu Apaiti Jeje o teke u hii libi. A o gi u kaakiti, fu puu mi toli taigi taawan a Jelusalem Foto doo Judeja pisiwataa. Soseefi Samaliya pisiwataa doo ala taa uku fu goontapu.”
Fa Masaa Jesesi komoto a goontapu gwe a Masaa Gadu Kondee
9 Den be taampu makandii di Jesesi kaba soi den so. Ne den si en futu e opo komoto a doti, da ai gwe a tapu, te pasa den woluku anda. Ne wan woluku wai tapu en. Na so Masaa Gadu opo en tyai gwe ne en kondee a tapu anda. 10 A kon fu den de ape e luku tapu naamo, fa a gwe so. Te fu den denki, tu Basiya fu Masaa Gadu Kondee*f1* anga weti koosi taampu a den mindii de. 11 Namo den Masaa Gadu Kondee Basiya taigi den taki: “Den manengee fu Galileya pisiwataa ya! San u taampu e luku ete? A Jesesi di opo gwe a tapu tide ya, na leti ya a o saka wan dei baka komoto a tapu anda.”
San den apaiti bosikopuman fu Masaa Jesesi du di a gwe?
12 Namo den be taampu makandii na a mongo di abi a nen fu Oleifi. A á de faawe fu Jelusalem Foto, ma na wan kilomeiti faawe so. Da di sani waka so kaba, ne den komoto de gwe a Jelusalem Foto. 13 Di den doo anda, ne den subi go a tapu sodoo na a kambaa pe den be e tan na a yuu di den de a Jelusalem Foto de. Den be de ape:
Peitilisi
Johanisi
Jakowbesi
Andeleyasi
Filipi
Towmasi
Baatomeyosi
Mateyesi
Jakowbesi, a manpikin fu Alefeyosi
Simon Selotu*f2*
Judasi, a manpikin fu Jakowbesi.
14 Somen leisi den be e miti makandii, fu tei ati oli doo anga begi. Maliya, a mma fu Jesesi anga den taa baala fu Jesesi be de ape tu. Wan duupu taa uman seefi.
Fa den apaiti bosikopuman poti wan taa man a Judasi peesi
15 Namo wan fu den dei, ne Peitilisi opo taampu a den mindii. Den be de ape wan ondoo anga twenti biibisama so.
16 Namo a taigi den taki: “Biibiwan! U ala sabi taki, na Judasi tyai sama go kisi Masaa Jesesi. Dati waka enke fa a Apaiti Jeje fu Masaa Gadu be piki Kownu Dafeti a fositen, fu sikiifi. 17 Da a kon, na Masaa Jesesi seefi be teke Judasi makandii anga wi taa elufu poti fu du en wooko.”
18 A Judasi ya na di be tyai sama go kisi Jesesi. Ne a teke a moni di den pai en fu dati go bai wan hii pisi doti. Ma bakadati, a teke tetei tei lenge lenge enseefi kii. Namo a koti komoto anda kai kon anga mindii fesi a doti, basi en hii bee tutu komoto a doo. 19 Di sama fu Jelusalem Foto yee a toli de, ne den kai a doti pe a moni fi en bai, Akeldama. Dati taki, a ini den tongo, Buulu Doti.
20 Namo Peitilisi taki ete taki: “Fa a de, a hii peesi fu Judasi fika fu busi goo tapu. Sama á de fu go tan ape moo wanten. Dati waka enke fa Masaa Gadu be piki Kownu Dafeti a fositen fu sikiifi na a singi buku den e kai Psalm. Bika a be sikiifi taki:
‘Ala a peesi fi en fika fu busi goo tapu.
Sama á de fu go tan ape moo wanten.’
Ma a be sikiifi tu taki:
‘Poti wan taawan ne en peesi, fu du a wooko.’ ”
21 Namo Peitilisi taki ete taki: “Da wi fanowdu wan taawan a u mindii ya fu poti na a wooko a Judasi peesi. Ma a mu de wan man di be waka makandii anga wi na a hii yuu di u be e lontu makandii anga Masaa Jesesi. 22 A be mu waka makandii anga wi komoto fu a ten di Johanisi be e dopu sama go doo a ten di Masaa Jesesi opo gwe a tapu ya. Bika na sowan man namo sa fiti, fu poi taampu makandii anga wi taa elufu, fu bali a nyunsu taki, a dede weki kon a libi ya baka tuu.”
23 Namo, den wegi go kon. Ne den fende tu man di fiti fu teke Judasi peesi, Jowsef anga Matiyasi. A Jowsef ya be abi ete tu taa nen, den be e kai Balisabasi anga Yestesi. 24 Namo den begi Masaa Gadu taki: “Masaa! Gaantangi, soi wi on di fu den tu u mu teke poti na a wooko! Bika na yu e si ala sama ati. Da yu sabi on di fiti fu du a wooko. 25 Te i soi wi, da u sa teke dati poti a Judasi peesi, fu du a apaiti bosikopuman fu Masaa Jesesi wooko. Bika a dede komoto a u mindii, fu go na a peesi di fiti en, fu san a du.” 26 Namo, den daai wan sowtu sani, fu koti luku on di fu den tu man ya mu wini a wooko. Matiyasi wini, ne den poti en a den taa elufu apaiti bosikopuman fu Masaa Jesesi kon toon twalufu apaiti bosikopuman baka.