1 ‑A "tʋ̈ng do bha‑ 'gü, 'yö ‑gblüdë Edhodö ‑yö zun Atanna ‑bha 'kɔdhigümɛ ‑nu 'bha ‑nu ‑wëëdhɛ bho ‑sü ‑bha, 2 'yö‑ pö ‑wo Zan dheebhang Zakö zë, 'yö 'wo‑ ‑gɔ ‑kan. 3 ꞊Dhɛ 'ö ꞊yaa‑ 'wɔn dɔ ꞊dhɛ Zakö zë ‑sü bha‑ 'gü ‑wɔn ꞊ya dhi Zuifö ‑nu ‑dhɛ, 'yö Piɛdhö kun 'pö. (‑Yö ‑kë "dhʋ̈ Zuifö ‑nu ‑bha ꞊niidadhe 'wo‑ ‑dhɛ 'bluu‑ 'ö "sɛkɛ 'yaa‑ ‑bha ‑a ‑bhö ‑ta ꞊niidadhe bha‑ ‑ta.) 4 ꞊Dhɛ 'ö ꞊wa Piɛdhö 'kun, 'yö Edhodö ‑ya ‑da ‑kaso 'gü, 'yö "sɔdha ‑nu ‑kaɔng do ga "saɔdo sü, 'yö‑ ‑nu dan ‑yiisiö ‑yiisiö, 'yö 'wo wo 'ko ‑ta kun Piɛdhö ‑maa kë ‑sü ‑bha, ‑a ‑gɛn ‑mü ꞊dhɛ ‑yö ‑gun Edhodö "piʋ̈ ꞊dhɛ Pakö ꞊niidadhe bha ꞊ya "kan, kö 'ö 'dho Piɛdhö 'ka "sɛgümɛ ‑nu ‑kuu "dhiʋ̈ kö ‑wa zë ‑wɔn ‑ya 'kwëë‑. 5 ‑A ‑kë "dhʋ̈ ‑sü bha‑ 'gü "sɔdha ‑nu ‑wo ‑gun Piɛdhö ‑gɔ "dhiʋ̈ ‑kaso 'kɔɔdhö mü, "kɛɛ kö Atanna ‑bha 'kɔdhigümɛ ‑nu ‑zë ‑wo bhɛa" sië Atanna ‑dhɛ ‑a ‑wɔn 'gü wo faan ꞊gban 'ka "dhʋ̈ ‑kpɛawo.

6 ‑Dhɛkpaɔyi 'ö Edhodö dho 'dho Piɛdhö 'ka "sɛgümɛ ‑nu ‑kuu "dhiʋ̈‑ 'ka bha‑ 'ka gbeng, kö Piɛdhö ‑yö yi zë sië "sɔdha ‑nu ꞊plɛ 'wo wo "yan to‑ ‑bha bha‑ ‑nu ꞊zinng 'gü, kö ‑wo lɔɔga ꞊plɛ ‑kplü ‑sü 'ka‑ ‑bha, kö "sɔdha 'bha ‑nu ‑wo 'kɔdhi 'wo Piɛdhö ‑da 'gü bha‑ "dhi "dhiʋ̈ 'pö. 7 'Wo dho "kan wo ‑ta kö kwa Dëmɛ ‑bha "kië do ꞊ya ‑wo "yɛa‑, kö ‑dhɛpuudhɛ ‑ya ‑da 'kɔdhi bha‑ 'gü ‑dhɛ ꞊gban "pɛpɛ 'gü, kö Atanna ‑bha "kië bha ꞊ya 'pa Piɛdhö ‑bha ꞊yaa‑ pö‑ ‑dhɛ: «‑Bhö "wlü "vaandhö!» ꞊Dhɛ 'ö‑ pö "dhʋ̈, 'yö lɔɔga ‑nu 'wo gun Piɛdhö ‑bha bha 'wo ‑kan, 'yö 'wo go‑ ‑kɔ ‑nu ‑bha. 8 'Yö Atanna ‑bha "kië ‑ya pö Piɛdhö ‑dhɛ: «‑Bhö kwi "pɛn ‑ya i ‑ta kö 'i i ‑bha ‑sabha ‑ya i ‑gɛan!» 'Yö Piɛdhö ‑ya ‑kë ꞊dhɛ ‑kɔ 'ö‑ pö‑ 'ka‑ ‑dhɛ bha‑ 'dhö. 'Yö‑ pö 'zü‑ ‑dhɛ: «‑Bhö i ‑bha ꞊gbauu ‑da kö 'i nu 'ko 'dho!»

9 'Yö Piɛdhö ‑yö ö ‑bha ꞊gbauu‑ ‑da, 'yö ‑ziö Atanna ‑bha "kië bha‑ ꞊keng‑, 'yö 'wo go ‑kaso ‑kɔdhi bha‑ 'gü kö Piɛdhö 'yii 'dhang bho ꞊kö‑ "dhiʋ̈ ꞊dhɛ 'wɔn 'ö kë sië bha tɛan‑ ‑mü. Kö ‑yö ‑tun ꞊kö ö ‑zʋ 'gɔn ꞊dhɛ ö "yan 'gü ꞊në ‑da sië, 10 'yö 'wo ‑ziö "sɔdha kpö ‑blɛɛsü ‑ta, 'yö 'wo dho 'wo ‑ziö ‑a ꞊plɛ ‑naa ‑ta, 'yö 'wo dho 'wo ‑wo ‑da ‑dhɛ 'kpii‑ 'ö‑ "kwɛɛ 'dhö ‑piö 'kpong 'ka ‑wo "kpɛnng ‑dhɛ 'gü bha‑ "dhiʋ̈, 'yö 'kpong bha 'ö ‑pʋ ö ‑dɩ kaɔ ‑a ‑nu wëëdhö, 'yö 'wo zun "kpɛnng. ꞊Dhɛ 'wo "ta sië ‑kpinngga do "piʋ̈, Piɛdhö dho "kan ö ‑ta kö Atanna ‑bha "kië bha ꞊ya ꞊dhɛng kö ꞊ya 'to ö do 'ka.

11 'Yö Piɛdhö ‑yö gun ‑na ‑a 'wɔn dɔ ꞊dhɛ 'ö "yan 'gü 'yii ‑da, "kɛɛ tɛan‑ ‑mü. 'Yö‑ pö: «'Ma‑ 'wɔn dɔ ꞊tɔn ꞊dhɛ n Dëmɛ ꞊në ö ‑bha "kië bɔ kö ‑yö n bho Edhodö ‑bha mɛ ‑dhɛ waa‑ 'wɔn yaa 'ö Zuifö ‑nu "piʋ̈ 'wo‑ kë n 'ka bha‑ ‑gɔ ꞊dedewo tɛan‑ 'ka!»

12 ꞊Dhɛ 'ö ö ‑dɩ ‑wɔn 'gü yö ‑së 'ka, 'yö ‑ziö 'ö dho Zan 'wo‑ 'tɔ ‑ya ‑ta ‑dhɛ Makö bha‑ dhe 'wo‑ ‑dhɛ Madhi bha‑ ‑gɔ 'kɔɔdhö. Mɛ 'gbɛ ‑wo ‑gun bhɛa" sië Atanna ‑dhɛ Piɛdhö ‑wɔn 'gü 'kɔ bha‑ 'gü. 13 ꞊Dhɛ 'ö Piɛdhö ꞊ya 'dho ꞊ya ꞊loo mü, 'yö "kwɛɛ ‑ta ‑ma, 'yö gwëëdhe do 'wo‑ ‑dhɛ Dhodë bha 'ö ‑wo mü kö ‑ya ‑mɛ dɔ. 14 'Yö Piɛdhö ‑wʋ dɔ. 'Wɔn bha‑ ‑dhidhɛ ‑kɔ yaa bha‑ 'gü, 'yii 'dho kö ‑yö "kwɛɛ ‑zë "pʋ ꞊yën Piɛdhö ‑gɔ, 'yö dɔ ‑bɛang ‑bha 'ö dho‑ pö 'mɛ 'wo 'kɔɔdhö ꞊në‑ ‑nu ‑dhɛ ꞊dhɛ: «Piɛdhö ꞊ya ꞊loo 'kɔdhi "dhiʋ̈ yö!» 15 'Yö 'wo‑ pö‑ ‑dhɛ: «Slaa" ꞊në yöö i 'kun 'yö Piɛdhö 'ö ‑kaso 'gü bha 'i‑ pö ꞊ya nu ‑ee?» "Kɛɛ ꞊dhɛ 'ö nëng ‑kë ‑pö "dhʋ̈ ‑sü 'gü 'yö 'wo‑ pö: «Atanna ‑bha "kië 'ö Piɛdhö ꞊keng‑ ꞊në bha.

16 Kö Piɛdhö ‑yö "kwɛɛ ‑ta ‑ma sië ‑kpɛawo. ꞊Dhɛ 'wo "kwɛɛ ‑pʋ 'wo Piɛdhö yö, 'yö‑ 'wɔn ‑ya ‑nu kɔn ꞊dedewo. 17 "Kɛɛ ꞊dhɛ 'ö ‑kë "dhʋ̈, 'yö Piɛdhö ‑yö ö ‑kɔ "paa 'gü zë‑ ‑nu ‑dhɛ kö ‑wo wo "dhi ta, 'yö ‑kɔ 'ö kwa Dëmɛ ‑ya bho‑ 'ka ‑kaso 'gü 'yö‑ ‑gɛn dɔ‑ ‑nu ‑dhɛ kö ‑wa ‑gɛn dɔ Zakö waa‑ 'dhang ‑bho Yesu "dhiʋ̈ ‑mɛ ‑nu 'wo to ‑a ‑nu ‑dhɛ 'pö, 'yö zun "kpɛnng 'yö dho zian "wɛɛ 'ka.

18 ꞊Dhɛ 'ö ‑dhɛ ꞊ya kpaɔ, 'yö "suʋ̈ ‑ziisü ‑yö ‑da "sɔdha ‑nu 'wo gun wo "yan 'to sië Piɛdhö ‑bha ‑kaso 'gü bha‑ ‑nu 'gü, 'yö 'wo dɔ bunnggɛɛdhö; ‑a ‑gɛn ‑mü ꞊dhɛ ‑dhɛ 'ö Piɛdhö ‑yö bɔ‑ ‑bha "ɛɛn 'pë 'ö‑ ‑kë 'wii‑ dɔ. 19 'Yö Edhodö ‑ya pö ‑wa mɔɔ‑, 'yö 'wo‑ ꞊mɔɔ "kɛɛ 'wii‑ yö. 'Yö "sɔdha ‑nu 'wo wo "yan to Piɛdhö ‑bha bha‑ ‑nu dhɛɛ" kpɔ Piɛdhö ‑wɔn 'ka. ꞊Dhɛ 'ö ‑kë ꞊dhɛ ‑dhɛ 'ö Piɛdhö 'dhö‑ ‑bha "sɔdha ‑nu bha 'waa‑ ‑dhɛ dɔ bha 'yö‑ pö ‑wa ‑nu zë.

꞊Dhɛ 'ö ꞊ya kë "dhʋ̈, 'yö Edhodö ‑yö go Zude ‑sɛ 'gü 'yö dho Sezadhe 'plöö, 'yö "tʋ̈ng 'në 'bha ‑kë mü.

20 'Wɔn‑ ‑gun ‑siö ‑sü 'ka Edhodö ‑dhɛ ꞊dedewo Tii ‑mɛ ‑nu waa‑ Sidɔn ‑mɛ ‑nu "glʋʋ "piʋ̈. 'Yö 'mɛ 'wo bha 'wo wo ‑wʋ ‑kë do kö 'wo 'dho Edhodö ‑kuu "dhiʋ̈ 'wo za dhi‑ ‑gɔ, 'yö 'wo bɔ ‑gblüdë ‑bha 'kɔ ‑maakëmɛ 'wo‑ ‑dhɛ Blasöti bha‑ ‑ta, 'yö 'wo dho Edhodö "piʋ̈ kö 'wo dhi wo 'ko ‑dhɛ, ‑a ‑gɛn ‑mü ꞊dhɛ ‑a ‑nu ‑bha "sɛgümɛ ‑nu ‑bhöpë ‑gun 'go sië yö ꞊në‑ ꞊kwɛɛ‑.

21 Yi 'wo‑ ‑ya bha ꞊dhɛ 'ö ꞊ya ꞊loo, 'yö Edhodö ‑yö ö ‑bha ‑gblüdëdhɛ ‑sɔ ‑da, 'yö dho 'yö ‑ya ö ‑bha ‑blüdëdhɛ ‑gbloo 'gü, 'yö ‑ya dhiang zë ‑sü ‑bha mɛ ꞊gban "pɛpɛ ‑dhɛ. 22 'Yö "sɛgümɛ ‑nu 'wo zun "gbla ‑sü ‑bha 'wo‑ pö: «'Mɛ 'ö dhiang zë sië bha mɛ "bhɩɩ‑ 'yaa ‑mü, ‑zlan do 'bha ‑mü!» 23 "Kɛɛ ‑yö ‑to ‑dhɛ do bha‑ 'gü, 'ö kwa Dëmɛ ‑bha "kië do ‑yö 'wɔn bho‑ 'gü, 'yö "yua 'dhö ‑da 'gü, 'yö ‑dhiasɛɛ 'në ‑yö ꞊gɔɔn‑ 'gü 'yö‑ ‑bhö, 'yö ga Atanna ‑bha 'tɔbhɔdhe 'ö‑ to ö ‑dɩ ‑gɔ ('ö ö ‑dɩ sü Atanna 'ka bha‑ ‑wɔn 'gü.) 24 'Yö 'mɛ 'wo 'dhang bho Atanna "dhiʋ̈ 'wo ‑kë 'gbɛ ‑kpɛawo 'ö dho‑ 'ka.

25 ꞊Dhɛ 'ö Banabasö waa‑ Sɔdhö ꞊wa bo ('wëë‑ 'ö 'dhang ‑bho Yesu "dhiʋ̈ ‑mɛ ‑nu 'wo Angtiɔsö 'wo‑ bho 'ko ‑ta bha‑ "kplëng ‑bho 'mɛ 'wo Zedhizadhɛmö ‑a ‑nu ‑bha ‑sü 'ka), 'yö 'wo wo yee ‑kë 'wo dho Angtiɔsö. 'Yö Zan 'wo‑ 'tɔ ‑ya ‑ta ‑dhɛ Makö bha 'wo‑ ‑da wo ꞊keng‑.