1 “Me sogo dage Israel dabe bidi si te jas pageba pelama, wado po wali dodoligi peyu pelama, tama jas te po tų ebo bidigo te po dodola suali madi te bidi me deligo te sęgę sai suaibao, tama mego te sęgę meni yai suaibao. 2 Tama tialima, te po tų odobo jas bidigo te po obaso da, te sęgę elalubo bidi augwaligo bidi elebo bį selama, te bidi tudi ela obaso da, teda te bidi te bet saiba piao olama, augwaligo aga te aga dwai sę yaliba usu nama tama elao, te jas bidigo gesabidide. 3 Tiali goli, agai dwai sę mu yai baso da, te dąį me elalubo, augwaligo aga te bidi sese si olama tama naga elemainao. Tiyu, augwaligo te 40 edelama, aga hauwa sogo mu elebaso, aga hale mu yabuo, te we bidi hauwa gedude. Te dolo menio,” wali. [2 Ko 11:24]

4 “Te dagego kau kibugo te wit ge agayu, te bo tama sela sąbo sę edubadi, tama dagego aga penane paninamo dao, agai te wit ge meba tumainao,” wali. [1 Ko 9:9; 1 Ti 5:18]

5 Tialima, Mosesgo po wadolama ma weyu, te po wali, “Tialima, aga ama name si deli tǫ pedai badu bididuama, tama aga ama mego wai ogwa me ame nisąma, tama aga isibaso da, teda te bidigo we te gasa bidi hani dali me pelamo dao. Menio. Te isali bidi aga amago te we somainao. 6 Tama gomunai ogwa te wego ame nobaso da, teda augwaligo te isali amago wai dao po waibao. Tama tiyu da, te isali bidi agai hani sibi nogi da Israel hani tomode hagasiąwaibao. [Mt 22:24; Mk 12:19; Lu 20:28] 7 Ma, te isali bidi aga amago te we sabo hagela ebaso da, teda te we te po tų ebo madiba pelama, te tobolu bidi dabe sugi pelama, te po wagi pao, ‘Te eno bidi aga amago te bomai po wali pabo hagela yalio,’ po wao. ‘Agai ena selama, tama wai ame nenama, tama aga amago wąį pedelemainu ebo hagela yalio. Tiyu, agai amago wai hani da Israel hani tomode menia sabuo,’ tama po wao, te wego. 8 Tialima, te hanude tobolu bidi dabego te bidi i olama, aselama, tama te bidi dali po dodolomainao. Tama tialima, agai te we sabo hagela me ebaso da, 9 teda te bidi isai wego aga salego sągą su me deli sela sąyao, te tobolu bidi dabego geduba sabolama tiao, tama agai gesabidiba pesą sąyao, tama te po wao, ‘Dago te tobage kolesaga te bidigo aga ama tau selama, aga amago wai dalabo homu isąbo bidi dolo te tobage kolesaga ebo dao,’ po wao. 10 Tama dage Israel dabego te bidigo we wai dabe nogi te augwaligo agai sągą nadoba pisiga sąwai bidigo wai puluba hani dao po waibao,” wali. [Rut 4:7-8]

11 Mosesgo po geninama weyu, te po wali, “Tialima, te bidi si hwįbadi, te bidi me aga wego aga bidi tau selama tama me bidigo sogoli kegebaso da, 12 teda dagego te we hobede me elamo dao. Agai nogo togolama, sąyao.”

13-14 “Tialima, te we bidi dabego dagego nai dabe abelagasobaso da, teda dagego te nai meba ma buga selamo dao. 15 Dolo tama mao. Tama tiyu da, dage e tǫde bobobage sogo bugagia bidaibao, te Genuai Bidi dago God agai dabolo mawainogo ebo te tǫde. 16 Godigo te tibo kolesaga ebo bidide dwai homu mu ebo dao,” Mosesgo te po wai. [Prs 19:35-36]

17 Tama Mosesgo po geninama ma weyu, te po wali, “Dagego te Amalek dabego dage Isip bulu tagalama asobadi yali dwai sę koneiąo, te gegeda pigimio. 18 Augwaligo God dali wi me ebo menio. Tama tiyu, augwali tudi badu aselama dage dali hwįagasali. Dage meba te dili telega elama dobadi, te pabo usu isąbadi, tama augwaligo te bidi dabe te omagia polo pabo usu isąma nosali asali bidi dabe augwaligo elama muai dao. 19 Tama tialima, Godigo te bulu dagebolo mabo sogo tama bugagia bagulama, tama boi bidi dabe pąde bidalubo bagego dage me dologobeo. Teda dagego Amalek dabe tigidali elama isilao. Tama tilama da, te bidi dabego augwali kone me egobeo. Dagego te tama tiyąo. Dagego munu me gegeda pelamo dao,” Mosesgo te Israel dabebolo te po wai. [Sai 17:8-14; 1 Sml 15:2-9]