116
Godigo te bidi me deli ma sobaso, tama aga te Godiba usu da wali
1 Genuai Bidigo eno i wabo odobo dao.
Tama tibaso, eno aga wei mu ebao.
Mu tama, agai eno gedu haluasa po wabo odobo dao.
2 Agai eno i wabo tigidali odali.
Tama tialima, tigidali sogo ena
bidibo ula dali bidibo sogo
te eno agaba gedu haluasa po waibao.
3 Isibogo te bonogo ena kębo tiwai yali.
Eno te isibo bidi dabego pesageba homu kone ebode,
tama tego ena wi mu ilama,
tama ena gasa homu tedali mu yai dao.
4 Tama tibaso, eno Genuai Bidiba i olama,
tama eno te tama po wali,
“Genuai Bidi, eno i wabo te nago ena somainu ebao,
tiyu ena isidalio,” wali.
5 Genuai Bidigo te olo tau sabo
wiegi yai kolesaga elama,
tama dabolo wiegi yai sę ebao.
Te dena God agai da homu dene eyu, tau sabo dao.
6 Genuai Bidigo te bidi dabe
augwa digi augwa tau sabo usu isąbo
bidi dabe seselalubo dao.
Polobadu gasa bidi augwaligo ena dolainu ebadi,
tama agai ena ma dobola sai dao.
7 Megi da, eno homu dua digi ma tegalubao,
magi baso meni, Genuai Bidigo enaba
wiegi yai sę mu yalio.
8 Genuai Bidi, nago ena ma selama, tama me isigobeo.
Nago eno gedu gela gua wa palama,
tama nago ena tonalubaso, tama ena me tulalubeo.
9 Tama ena te Genuai Bidi dali te tigidali sogo
ena te tǫde bidibo bilaibao.
10 Eno tama po wabo sogo,
te eno homu Godiba kęą pali,
“Te genuai sęgęgo mu ena mesegelalio.” [2 Ko 4:13]
11 Tama ena wi eyu, eno te po wabo sogo,
“Eno konealubo homu te mena bidi me
deliba me mugobeo,”
te sogo me eno konealubo homu te Godiba muanio.
12 Genuai Bidigo enaba wiegi yai sę mu yalio.
Tama tialima, eno magi nai agaba mawaibawe?
13 Te eno kap wain wę me deli te Genuai Bidi
selasa paibao, te Godigo ena ma salio weyu,
te dąį ebo ofa tiwai dao.
Eno te tama tiyu, te Genuai Bidigo ena ma salide
te puba hwi wabo tiwai dao.
14 Te aga we bidi tigidali sisinibo madi
te eno po dąų wali gilama te tama tiwai yaibao.
15 Te Godigo we bidi dabe aga gedude
te usu mu elaluali.
Tama me deli isibaso da, te aga magi homu me ebe,
te olo nai da homu ebeo.
16 Genuai Bidi, ena naga sę bidi dao.
Eno nago sę ebao, te polobadu idago yali tiwai.
Nago ena te kęąluali bono pisigina sąnama,
tama ena magi naigo me dąų wasiąma,
te olo wiegi yai pedelama bidibao.
17 Te eno nageba usu da wabo ofa eyu,
tama eno nageba gedu haluasa po waibao po wali.
18 Polobadu eno po nageba dąų walali,
tama megi da, eno te sę
nago we bidi tigidali gedude yaibao.
19 Genuai Bidi, eno te tama sę
te Jerusalemde, te nago tempel be
tomode, te sę yaibao.
Dago te Genuai Bidigo nogi ugwaba sao.