1 Te Jisasgo te genuai we bidi hani aga wali asobo suali, tama aga te bulu du me deli bageba holai. Tama aga te bulu dude dulalubadi, tama aga wali bilali bidi dabe augwali aga pageba asali. 2 Tama agai po augwalibolo weyu te po ola mani,

11 “Tama dagebolo sęgę mabo bidi dabe augwaligo suali dagego ena wali pabo subaso da, te augwaligo dage dali dwai posobo po weyu, tama dene mobadi augwaligo te kedu meni yai tibo po haniani weyu ebaso da, teda dage homu pemene wiegi yai yao. [1 Pi 4:14] 12 Tama dage homu bugagia wiegi yai elama, pemene mu eyu bidiąo. Te genuai wiegi yai nai mugo dage dagalude tonalubao. Te tiwai naga te bidi dabe augwaligo te Godigo po pusali profet bidi dabebolo hasia polobadu dene mawai tiwai dagebolo me tama tibao.” [2 Sto 36:16; Tpi 7:52]

13 “Te dage konealubo po dąų wabo we bidi dabe, dage e tǫde bidibo we bidi tomode bidiyu, tama dage te tamu aga sę ebo tiwai eyu bidiąo. Te tamu aga pusu te tubo naibolo mabo dao. Tama dagego dwagi yai kolesaga ebogo te gasa we bidi augwaligo ebo kolesaga dwagi yai ilao. Tiali goli, tamu halia peyu pusu ebo tagaliyu da, teda dago magi ilama te tamu aga pusu yali ma saibawe? Menio, te tamugo da, te sę ma egobeo. Te bidi dabego sela sąyu naga eyu, tama augwaligo sągągo agabo dao.”

14 “Te dage te tigidali tǫde ula tiwai dao. Te hanu me deli te bulu du bagede elaluyu, tama be hulide te augwaligo sole lam ula ebadi, tama te hanu aga duala sabo te usu egobeo. 15 Tama te bidi dabe augwaligo te sole lam domonama te baket dologoba me mubo menio. Te meni. Augwaligo te sole ula te tebol saiba munama, tama te sole ulago te bede bidibo we bidi ula mabo dao. 16 Tama te tiwai naga dagego wiegi yai kolesaga ebo te sole ula ebo tiwai dao. Tama tibaso dagego ebo dwagi yai sę te we bidigo sumainao. Tama augwaligo sulama, tama augwaligo duga Aya te dagalude bidibo bidi nogi ugwaba saibao.”

17 “Dagego homugo ena asali eno te Godigo bomo yai po me te Godigo po pusali bidi profet dabego ola mani po dali sela sąwainogo asali homu egimio. Menio. Te eno te po sela sąwainogo asobe, te eno te po mu usu nainogo ena asai dao. 18 Te eno mu po dagebolo obao. Te dagalu dali tǫ si silisąbadi da, tama te asęani bomo yai po dwasianunu me deli munu me siligobeo. Menio. Te po tigidali augwali elaluaibao. Tama elalubadi te bomo yai pogo aga sę tigidali silaibao. Tama aga sę silibaso da, te sogo naga te bomo yai po me silaibao. 19 Tama tibaso bidi me deligo te bomo yai po dwasianunu me deli tagaliyu, tama agai gasa bidi dabebolo te tiwai kolesaga ola mobaso da, teda te bidi aga nogi me te Godigo we bidi tonalubo sogode, te bidigo nogi dwasianu pedelaibao,. Tiali goli te bomo yai po wali pelama te we bidigo te po wali pomainogo ola mabo bidi, agai nogi da te Godigo we bidi tonalubo sogo genuai pedelaibao. 20 Tama tibaso, eno dagebolo obao, te dagego doloba pai kolesaga ebogo te bomo yai po koneani bidi me te Farisi dabe dali augwaligo kolesaga dagego aiyaba me elalusiąbaso da, teda dage te Godigo we bidi tonalubo obo tomoba pogobeo.”

21 Te Jisasgo te po wai, “Te Mosesgo dagego wąį dabebolo polobadu ola mani po te po dagego odai dao. Agai te po wai, ‘Te nago bidi me ela mugio. Tama bidi mego bidi me deli ela mubaso da, teda dagego te bidi aga te po tų ebo bidiba odasa pao,’ te po wai. [Sai 20:13; Bom 5:17] 22 Tiali goli megi eno po dagebolo obao: Tama bidi mego aga ama dali sębę eyu da, te bidi aga po tuba odasa paibao, tama dene saibao. Tama bidi mego aga ama dali dwai po obaso da, teda te bidi aga te polalubo kaunsil bidibo digiba pelama, po tų emainogo yao. Tama bidi mego aga ama dali nogi posobo po weyu, nage sę isiąbo homu meni yai dwai bidi dao weyu da, teda te bidi aga te dwai madigi sia dabo dene sabo buluba paibao. 23 Tama tibaso, nago Godibolo maiabo nai ofa te Moni Lotu Be tempelba sela aselama, tama te maiabo nai muabo saide bidibadi, tama te sogo polo ma homugo koneani naga amago po me deli elalubo homu nago ebaso da, 24 teda nago te Godibolo mawainogo yali nai ofa tede munalubadi taga soao. Tama nage pelama, hasia naga ama dali po bolo dodolao. Te po dodola silama, tama megi da nage pelama, tama Godibolo ofa nai magi pao.”

25 “Tama bidi me deligo nage po tų ilainogo ebaso da, tama te po tų yabo sogo dage si tųdu pidubadi, tama polo nago po duga si te po dola sao. Te sogo nago aga dali dodola sisąwani da, te po tų yabo bidigo nage te po tų dodolobo bidi jasgo nogoba muaibao, tama jasgo nage enesigi bidigo nogoba munama, tama enesigi bidigo nage kalabusiba muaibao. 26 Tama eno mu po dagebolo obao, nago te po tųde sali negeli wei tigidali masiąbadi, teda nage kalabuside bidibo tagalogobeo,” Jisasgo te po wai.

27 Te Jisasgo te po wai, “Te Mosesgo dagego wąį dabebolo polobadu ola mani po te po dagego odai dao. Agai te po wai, ‘Penani egio.’ [Sai 20:14; Bom 5:18] 28 Tiali goli megi eno po dagebolo obao: Te bidi me deligo agai te we me deli olo naga agai homude godolo ebo homu eyu, tama te we dali penani sę yabo homu eyu tonono eyu da, te bidi agai homude te bomo yai po bolama, tama agai homude te penani sę ebo tiwai yali dao. 29 Tama tibaso, nago dolo nogo badu elalubo gedugo nage te dwai sęgęba kegebaso da, teda nage hagaidali weyu nago te gedu gudama sąyao. Tama nago tigi me badu te tiwai hagabaso, te dwai dao. Tiali goli nago tigi sese bidibadi tama nago dwai sę edubaso da, teda augwaligo nago tigi sese te dwai dene sabo madiba sąwaibao. Te dwai mu dao. 30 Tama nago dolo nogogo me nage te dwai sę ilibaso da, teda nago te nogo togolama sąyąo. Tama nago tigi me badu te tiwai hagabaso, te dwai dao. Tiali goli nago tigi sese bidibadi tama nago dwai sę edubaso da, teda nago tigi tigidali te dwai dene sabo madiba paibao. Te dwai mu dao,” Jisasgo te po wai.

31 “Po me polobadu augwaligo te po wai dao: ‘Te bidi me deligo aga we tagalobaso da, agai te we tagalobo po page asęnama, tama te pepa te webolo mao.’ [Bom 24:1-4; Mt 19:7; Mk 10:4] 32 Tiali goli megi eno dagebolo te po obao: bidigo aga sai we tagaliyu, tama te wego dwai penani sę me isąbadi, teda te bidigo te wego te penani sę ilibao, te we gasa bidigo siyu da. Tama te tobage we sabo bidi me agai te penani sę tama ebao.”

33 Jisasgo te po wai, “Te Mosesgo dagego wąį dabebolo polobadu ola mani po me te po dagego odai dao, agai te po wai, ‘Nago te Genuai Bidi Godibolo te eno te sę mu yaibao po weyu, tama nago te po dąų olama, tama nosali nago te dąų wali po togogio. Menio. Nago te po dolo wali peyu te sę yao,’ Mosesgo te po wai. [Prs 19:12; Nam 30:2; Bom 23:21] 34 Tiali goli megi eno e po dagebolo obao: dagego te duga nosali yabo sęde po weyu, tama we bidi augwaligo te mu po dao homu emainogo dagego te po dąų wabo po munu me wagio. Mu menio. Dagego po me deli dąų waliyu, dagalu me nogi ilamuo. Magi basowe, dagalu da, te God dulalubo sia sai dao. 35 Tama dagego te tǫ nogi elama, te po me deli dąų waligio. Magi basowe, tǫ te dwasianu sai te Godigo sągą mubo madigi dao. Tama dagego te moni hanu Jerusalemde te po me deli dąų waliyu te nogi wagio. Magi basowe, te Jerusalem te genuai tuni bidigo moni tedali hanu dao. 36 Tama nago naga tobolu nogi elama te nago po wabo me deli te me dąų waligio. Magi basowe, te nago tobolu nisi me te tedela yai me te sisi yai te pedalainogo ilibo te me nage usu egobeo. Te Godigo sę naga dao. 37 Tama dagego ‘Awe’ obaso da, teda ‘Awe’ naga waiyąo. Me ma, dagego ‘Menio’ obaso da, teda ‘Menio’ naga waiyąo. Teda usu yaibao. Tiali goli dagego duga wabo po mu dąų omainogo te gasa po me obaso da, te po te dwai bidi Satan aga te po page bidi dao,” Jisasgo te po wai.

38 “Te Mosesgo dagego wąį dabebolo polobadu ola mani po me te dagego odai dao, te po e dao, ‘Te bidi me deligo nago gedu dolobaso da, teda nago agai gedu me dolao. Tama bidi me deli agai nago kele me deli togobaso da, teda nago aga kele me deli me togwao.’ [Sai 21:24; Prs 24:20; Bom 19:21] 39 Tiali goli megi eno dagebolo obao, te bidi mego dwai sę dagebolo ebaso da, te dagego agabolo te sę ebo wei ponogio. Menio. Te bidi me deligo nage nabo gede me badu nogogo elebaso da, teda nago gasa me badu nabo ge me te begelao, agai tede elemainao. 40 Tama bidi mego nage dali po tų elama, tama nago holobo ugwa sainogo ebaso da, teda nago holobo ugwa te agabolo mao, te nago kedau sogo gudubo kol siot te me mao. 41 Tama bidi me deligo bomonama nage dali nago agai walu te dąį deli te digibulu gana sela pina obaso da, teda nago agai walu te dąį deli wali tagalama tama nage aga dali te dąį si ugwanu gana mu pao. 42 Tama bidi me deligo nage dali te nai me deli po hanalu obaso da, teda nago te nai aga mao. Tama bidi mego nage dali negeli sainogo homu ebaso da, teda nago te bidi aga tudiba munama tama nage gesabi gasaba gegi pigio. Agabolo te nai osogo mao,” Jisasgo te po wai.

43 Jisasgo te po wai, “Te dagego odai, polobadu augwaligo te po wai dao, ‘Nago naga abagi godolo eyu, tama nago naga boi bidi dali dwai homu yao.’ 44 Tiali goli megi eno dagebolo obao, dagego duga boi bidi dali dwagi yai homu eyu tama godolo eyu yao. Tama bidi meba augwaligo dagebolo dene mobaso da, teda dagego gedu haluasa po Godibolo wao, te agai augwali dali dwagi yai sę emainogo. 45 Tama tiyu da, dage te duga Aya dagalude bidibo bidigo wai puluba mu bidaibao. Agai te tobage dwagi yai sę naga eyu, tama agai sia nanobo te dwai sę ebo bidi dabeba me te dwagi yai sę ebo bidi dabeba dali si te sia nanobo ula ilibo dao. Tama te tulubage tulubo me te doloba pai bidi dabeba me, te doloba pesiąwai bidi dabeba me te tulubage tuluyu ilibo dao. 46 Tama te bidi dabe augwaligo dage godolo ebo bidi dabe te augwali dali naga dagego dwagi yai homu elama godolo eyu da, te Godigo dagebolo dwagi yai nai magi baso mawaibawe? Te takis mone sabo bidi dabe augwaligo te tiwai sę ebo dao. Tiali goli dagego homu augwali dwai bidi dabe dao. 47 Tama dagego duga abagi dedebolo naga te siade da po weyu da, teda dagego te sęde te gasa bidi augwali aiyaba elaluaibawe? Te menio. Te Godigo po odosiąwai we bidi augwaligo me te tiwai kolesaga ebo dao. 48 Tiali goli dage, te dage wiegi yai kolesaga dali bugagia doloba pai mu bidiąo, te duga dagalude bidibo Aya aga bugagia doloba pai mu bidibo tiwai gilama yao,” Jisasgo te po wai.