1 Te Sedekaia Juda king pedelali sogo, agai kibu be te 21 yia elalubadi, tama aga te Jerusalem king bidali te kibu be 11 kibu be bidai. Aga ida, te Hamutal, te gasa Jeremaiago wegi, aga te Lipna taun we me deli dao. 2 Sedekaiago te king Jehoiakimgo kolesaga wali pelama, tama agai Genuai Bidi gedude dwai kolesaga yai dao. 3 Te Juda dabe me Jerusalemgo dwai kolesaga ebogo te Genuai Bidigo haliga sębę dwai mu ilali, tibaso Genuai Bidigo te we bidi dabe augwali hagela ebaso, te augwa bulu tǫde sela sąnama, digibulu pai dao.

Sedekaiago homu te Babilon aga tonalubo hagela mu yai, tibaso aga munu me aga dologode me bidibeo. 4 Tialima, te nogo si poluade te kibu be 9 te Sedekaia king bidai, tama te polua dei nogo si wabode, king Nebukatnesar te Babilondu aga ami dabe dali aselama, te Jerusalem bagua sagaselama, te taun sainogo boi hwįani. Augwaligo te Jerusalem bagulama, tama te taun bobogelali masigigo nigai genuai obo pagede te tǫ selama, du holama, tama augwali tede dolalu, boi hwįainogo yai dao. [Ese 24:2] 5 Augwaligo te Jerusalem bagulali elaludubadi, te kibu be deli olama, polua a naga, me nogo deli tama bidai. Te kibu be 11 Sedekaia te bidai, 6 tama te kibu bede digi, te polua 4 wabode, te dei 9 wabo side, te Jerusalem we bidi augwali nasigo mu salio, magi baso meni, augwaligo nai tigidali silai dao. 7 Tama te dei wabo side Babilon augwaligo te masigigo nigai genuai obo habu me deli badu aluama, te Jerusalem tomoba pali. Tialima, te king Sedekaia dali, aga ami bidi dabe me, te Jerusalem tagalama, wi palio. Te hulide augwali pelayu, te kingo giba sabolama, tama augwa te obo ununani sunumidu taun taga soali. Te hauwa Babilon augwaligo te Jerusalem obo bagulali sę elalubadi, te Jerusalem ami bidi dabego Jerusalem tagalama, wi pelayu, te ąį Jordan odogo malu pesage buluba pabo sunumi wali pai dao. [Ese 33:21] 8 Tiali goli, te Babilon ami bidi dabego te king Sedekaia pobeasa pelama, te augwali agaba te malu tǫ bulu te Jeriko taun pageba sabolai. Te Sedekaiago ami bidi dabego aga tagalama, wi tedela palio.

9 Tialima, te Babilon dabego te Sedekaia pageabi elama, aga te Babilon kingba odasa pali. Te sogo Babilon king te taun Riplade bidali, te Hamat tǫ tomode dao. King Nebukatnesargo Sedekaia sulama, te po wai, Sedekaia te aga yali dwai kolesagade dwai dene somainu yaibao, wai dao. 10 Te Babilon dabego te Sedekaiago ogwa dabe me, te Juda tobolu bidi dabe me selama, te augwaligo augwali te Riplaba odasa asai. Tama te bulude Nebukatnesargo po obaso, te augwaligo te Sedekaiago ogwa dabe te Sedekaia aga gedude ela muai. Te augwaligo Juda tobolu bidi dabe me ela muai dao. 11 Te kingo po obaso, te augwaligo Sedekaiago gedu si guda sąwai. Te augwaligo aga nogo sągą te bomai aligabo bono sengo dunama, te aga Babilonba sela palio. Te augwaligo aga tede kalabusiba munama, te aga kalabuside bididubadi, te aga isibo sogoba usu nai dao. [Ese 12:13]

12 Te Nebukatnesar te Babilonde king 19 yia bidali, te waiya side, te a naga polua, te dei nogo si wabo te deli kibu bede naga, Nebusaradan, te Babilon king aga boi bidigo elidali weyu tonalubo bidi hani dabe augwa polalubo ofisa bidi, te Jerusalemba asali, te Babilon kingo sę tonaluagasai dao. 13 Tama agai te augwaligo Genuai Bidiba lotu wabo tempel be, me te Juda kingo be, me te Jerusalem gegunai bidi dabego be, tigidali isigo ula silali. Te genuai dila pai be me deli digi te Babilon dabego me ulubeo. [1 Kin 9:8] 14 Te Nebusaradan dali bidali hani dabe, te Babilon ami tigidaligo te masigigo nigali genuai obo alulama, dolai dao. 15 Tama Nebusaradango te Jerusalemde bidaluali doado bage meni yai we bidi meba te augwali Babilonba kalabus igibu odasa palio. Te hwįani sogo te Juda bage mebago Jerusalem tagalama, te Babilon dabego bidagasali pesageba wi pelama, bidigi pali. Te bage me agai te Babilonba kalabus igibu odasa pali. Tama te haniani nai dabe nigibo mu koneani kolesaga koneai bidi dabe, augwali te Jerusalemde bidalubadi, te agai augwali me sela pai dao. 16 Tialima, meba Juda te tigidali nai mu sǫą paibaso, augwali bidalumainogo tagalama, te wain gi dabe me gasa gi dabe tonalumainogo yai dao.

17 Tama te Babilon dabe te Genuai Bidigo genuai tempel beba pelama, te brasgo nigai genuai bobobage pos si tologali, te bidi dabego brasgo nigai wilkar te ąį ugwadu daide pobegabo nigali nai elaluali me tologolama, sali. Te genuai ąį sabo nai augwaligo te brasgo nigali nai me tologali. Tama augwa te bras tigidali te Babilonba sela pai dao. 18 Tama te Babilon dabego te sospen dabe, me savol dabe, me lam sula sabo nai dabe, me te genuai pou te ofa ebo kaneme mubo dis dabe, me te wiegi yai denami emainogo ulubo pauda ulubo dis dabe, me te tigidali gasa nai te polobadu Juda dabego brasgo nigilama, te Genuai Bidigo be tomode sę emainogo muani nai me, te sela pai dao. 19 Tama Nebusaradango te bidi dabego gol me silvago nigali nai dabe me sali, te dwasianu pou dis dabe, te sia sela pabo pou plet dabe, te ofa ebo nai kaneme mubo pou dis, me sospen dabe, me te ni dilide udalubo lam dabe, me te wiegi yai denami ebo pauda ulubo pou plet dabe, me te ofa ebo wain dabe muani pou dis dabe, te tama tigidali nai sela palio.

20 Polobadu te king Solomongo sę bidi dabego te bras selama, te genuai bobobage pos si nigali, te genuai tang wę nigilama, tama te nogo si olama, sągągo si bulmakau piksa dabe nigilama, te genuai ąį tang dologode elaluali te dwasianu daide ugwadu muabo nai wilkar elaluai. Te Solomongo po obaso, augwaligo te nai dabe Genuai Bidigo beba muani, polobadu mu. Tialima, megi da, te Babilon dabego te nai dabe alulama, te nai nigali bras sainogo tiali. Te brasgo sęgę te genuai mu, te bidigo skel me egobeo. 21-22 Te bras si nigali genuai bobobage pos augwaligo te deli tigi tobage sabi si naga nigai. Te nai sigo usu sabo bobage te 8 mita, te nai ugwade eda si genuai usu sabo te 5 mita me 30 sentimita dao. Augwaligo te pos si te genuai paip bras tiwai nigali, te bras tomoba bulubaso da, te usu nama te 7 me hap sentimita tiwai. Augwa te pos tobolu brasgo nigali, te tobolu dwasianu genuai gana yai. Te tobolu ugwaba igulali, te 2 mita me 20 sentimita elaluai. Te augwaligo bras selama, te au wiegi yai wa tiwai nigali, me te pomigranet ni du wai tiwaigo au yali. Tama augwaligo te ni du pomigranet te wade mubo tiwai yai. Tama augwaligo te pos tobolu si bagulama, te au tiwai ilai dao. 23 Te pos deli delide te pomigranet du wai bidi sese a naga 100 te aga tobolude munama, elaluai. Te 96 pomigranet du te tobolu me si me si badu bagulama te gasa pomigranet du aiyadu geana selama, dologoba bugulama elaluai dao. [1 Kin 7:15-47]

24 Nebusaradan, te Babilon dabego ami polalubo ofisa bidi, agai te tobolu bidi pris Seraia sobadi, me Sefanaia sali, te Seraia tudi badu daganalu sę ebo bidi, te gasa pris sela te Godigo tempel be sunumide tonalubo bidi me sela pali. 25 Tama te Jerusalemde agai te Jerusalem ami bidi dabe tonalubo ofisa bidi me sali. Tama agai te Juda kingba te wiegi yai homu kolesaga mabo bidi dabe te a naga olama, me si te sobadi yai. Te hani dabe te Jerusalemde bidaludubadi, te agai augwali pageabi yai. Tama agai te ami bidi dabego polalubo ofisa bidigo sę ebo kuskus bidi sali, te ami bidi pedalumainogo skul ola mabo sę iduali bidi. Te agai te kuskus bidigo sę ebo bidi te bidi sese sela te 60 bidi Jerusalemde bidibo sulama, tama agai te bidi dabe me sai dao. 26 Tialima, Nebusaradango te bidi tigidali selama, te Babilon king bidibo madi te taun Ripla, 27 te Hamat tǫba odasa pai. Te kingo po obaso, augwaligo te bidi dabe tede ela muai.

Te Babilon dabego tama kolesaga elama, te nosali augwaligo te gasa Juda dabe selama, tama digibulu mu pelama, te Babilonba kalabus igibu sela pai dao. 28 Te Nebukatnesargo kalabus igibu sela pali we bidi namba, e tiwai dao. Te kibu be 7 aga king bidali sogo, agai te 3,023 Juda we bidi sela pai dao. 29 Te aga kibu be 18 te king bidibo sogo, agai te 832 Jerusalem we bidi sela palio. 30 Te kibu be 23 aga te king bidali sogode, te polalubo ofisa bidi Nebusaradango te 745 Juda we bidi selama, te augwali kalabus igibu odasa pai. Te kalabus igi pali bage dabego namba e tiwai dao, te 4,600 mu dao.

31 Te Juda king Jehoiakin te Babilonde kalabus elaludubadi, te 37 yia bidai, tama te waiya si tomode Evil Merodak te Babilon king pedelai. Te 12 polua, te dei 25, te wabo kibu bede, Evil Merodakgo te Jehoiakin homu dene eyu, te aga kalabus bidali tagala palai dao. 32 Evil Merodakgo agabolo wiegi yai kolesaga elama, te agaba genuai nogi menama, tama te tiali kolesagade te Jehoiakin aga dali te Babilonde kalabus bidali king dabego genuai nogi aiyaba elaluai dao. 33 Tama tialima, te Jehoiakingo te kalabus bidi dabego mubo ugwa munu ma mubeo. Te tigidali sogo aga te Babilon king dali deli madi dugulama, nai tudu genama, te Jehoiakin aga isibo sogoba usu nigi pai dao. 34 Te Babilon kingo po obaso, te augwaligo tigidali side Jehoiakinba mone maduali, te Jehoiakin aga bugagia bidimainogo tiali. Te augwaligo te tiwai sę ela pidubadi, te Jehoiakin aga isibo sogoba usu nai dao.