61
Te Godigo aga we bidiba wiegi yai sę ilabo sogo te pedelalio
1 Tigidali Bomo Elalubo Godigo Mobo Noma
Bidi enaba bidagasali,
magi baso meni, Genuai Bidi aga
digi eno toboluba wel gelali,
te ena dąį sa muyu,
te aga wiegi yai po te magi
doado bage meni yai bidi dabe selasa pomainu yai.
Te agai ena tagala palali, te haliga sęgę genuai elalubo
bidi dabego sęgę silimainu yai,
te kalabuside bidibo bidi dabeba po pusu,
te augwa kalabus tagalama,
olo pao po omainogo yai. [Mt 11-5; Lu 7:22]
2 Agai ena tagala palu, te tama po pusao wali,
te dago Genuai Bidi, Godigo sę yabo
sogo pedelalio,
te aga we bidiba wiegi yai sę bugagia ilama,
te boi bidi dabeba dwai dene mawaibao, wai.
Te agai ena tagala palali, te homu dene eyu,
gela wabo we bidi dabego haliga dąų walomainu
tagala palai dao. [Mt 5:4; Lu 4:18-19]
3 Te Saionde gela udubo we bidi dabeba
eno te nagame yai haliga dua eyu,
pemene ebo homu me selasa asaibao,
te augwa bomo silali bageba tama tiwaibao.
Augwali homu dene ebaso,
te sia keli augwa toboluba muani.
Tiali goli, eno te nai hasegelama,
tama dwagi yai au yabo nai augwaliba mueibao.
Awe, eno augwaligo tigiba te wiegi yai
denami ebo wel mawaibao,
tama augwali homu dene ebo tagalama,
dwagi yai homu pemene eyu bidaibao.
Te augwa bomo ma selama,
te Genuai Bidiba pemene ebo balia waibao.
Augwa tigidali te doloba pai kolesaga
naga ebo sę bomo yaibao.
Te gasa bidi dabego sueibao,
augwali te Genuai Bidigo digi
bulali ni kali tiwai elalubao,
tama augwaligo Genuai Bidigo nogi ugwaba saibao.
4 Te dage we bidi dabego te polobadu
dolali taun ma nigiyu,
tama dagego te kibu be hauwa dolai elaluali nai
tigidali ma dodolaibao.
5 Te gasa bulu tǫ kantri bidi dabe aselama,
dagego sę yagasaibao.
Te dagego sipsip dabe augwaligo tonalu,
te augwa tǫ elama, nai bulaibao.
Tama augwaligo te dagego wain gi me tonaluaibao.
6 Tiali goli, duga digi dage te Genuai Bidigo pris bidiyu,
te augwaligo dage nogi weyu,
te dena Godigo sę bidi da waibao.
Te duga nai hauwa elaluaibao,
te gasa tǫ kantri bidi dabego sela asai.
Te augwaligo wiegi yai nai hauwa dageba mobaso,
te dage wiegi yai homu mu pemene yaibao.
7 Polobadu te dage hale dwai mu elama,
duga gesabidi seselaluali.
Tiali goli, dage te duga tǫde digi bidaibao,
te dagego nai hauwa mu siyu,
te dagego polobadu elaluali nai mu edelaibao,
te dage pemene umabo mu yaibao.
Tama dagego te ebo homu pemene
sesemane sogo elalua paibao.
8 Magi baso meni. Genuai Bidigo te po wai,
“Eno te doloba pai kolesaga naga godolo ebao.
Eno te bidi elama nai wi sabo kolesaga,
me te gasa bageba dwai sę ebo
kolesaga, te hagela mu ebao.
Te eno we bidi dabe te gasa bidi dabego
augwaliba mani dwai sę ebo sęgę hauwa tolali,
te mu tama te megi eno augwaliba
wiegi yai nai mu mawaibao.
Te eno bomo yai po me deli augwali dali dąų walaibao,
tama te dąų walali bomo yai po
sesemane elalua paibao.
9 Te eno we bidigo bulai wąį wai dabe
te gasa tǫ kantri hani we bidi tomode
genuai nogi elalueibao.
Te augwali subo we bidi dabe,
te augwa te tiwai koneaibao,
te hani dabe te eno hani dabe dao,
Genuai Bidi, ena digi eno augwali wiegi yai ilaibao,”
wali.
10 Te eno pemene ebo wiegi yai balia
Godiba waibao, eno Genuai Bidi dao.
Te eno pemene umabo mu yaibao,
magi baso meni, agai ena ma sali.
Te aga wiegi yai sogo te aga doloba pai kolesagago ena
te bobobage wiegi yai ugwago mesega sabo
tiwai yali,
te ena te we sabo bidigo au ebo tiwai eyu,
te we aga bidigo aga kębo sogode au ebo tiwai yai
dao. [Ped 21:2]
11 Magi baso meni. God, Genuai Bidigo
doloba pai kolesaga dali,
te aga nogi ugwaba sabo kolesaga dali,
te we bidi dabe tomode pedelaibao,
te gide bulali nai wai kulubi pedelama,
te genuai ebo tiwai yaibao.
Tama te gasa Israel hani isąwai we bidi dabe tigidaligo
sumainogo yaibao.