57
Te Israel dabego hagoma me idu geyu, te tibo godiba lotu ma wali
1 Te bidi dabego te wiegi yai we bidi dabe
isibo sogo,
te augwa homu si me ebeo,
tede homu kone palobo menio.
Tama augwa te tiwai homu me sabeo,
‘Genuai Bidigo te bidi dabe isimainogo ilama,
te augwaliba pedelainu yali dwai sę
te geda mumainogo ebao,’ te homu egobeo.
2 Te doloba pai kolesagade bilali bidi dabe,
te augwa isibo sogo, te augwa gų pagede pila muyu,
te toma nabo wiegi yai sogo sai,
magi baso meni, te dwai sę ebo sogo
augwaliba pedelabo usu egobeo.
3 Genuai Bidigo te tiwai po wali,
“Dage te dwai kolesaga haniani ebo
we bidi dabe, dage edaba asiąo,
dage te pobi bidi dabe, me penani bidi dabe,
me penani ebo we dabe te augwaligo wai dabe dao.
4 Dagego po dwai deba wali,
dage te hagoma ebo bidi dabe,
me te po geagano pabo bidi,
me tibo po wabo bidi te augwaligo wai dabe dawe?
Dagego gesabidi dwai eyu, te dagego
hąę hąę elama, deba wabo dawe?
5 Te duga haligade dwai homugo
te bomonama hodolobaso,
te genuai ni dologo te lotu wabo pesageba pelama,
te penani ebo kolesaga ebao.
Dagego te duga wai puluba dabe elama,
te ofa tiwai eyu,
te odogo tǫ pesagede te genuai
masigi elalubo tomode ulubo dao.
6 Tama tede dagego te masigi dabe
selama, te augwa god tiwai pedelali.
Te augwali te masigi dabe duga god tiwai naga elama,
te dagego ofa eyu, te wain geliyu,
te wit ofa me augwaliba yali.
Te kolesaga ebo sę dagego elama,
te dagego homugo eno hasegelama,
dageba homu dene yaibao weyu ebawe? Mu menio.
7 Dage te lotu wabo bulu du bageba holama,
te ofa eyu, penani kolesaga yalio.
8 Dagego ena tudiba mu muanio.
Dagego te duga tibo godigo piksa dabe
te duga be tų dabo tomo badu bogo side muani.
Tama dagego te duga abagi wali weba te mone menama,
augwali dali piainu yali,
tama dagego te duga nigali
genuai bet sai daide te penani kolesaga ebo dao.
9 Dagego au ebo, te sanda me pauda,
te wiegi yai denami ebo naigo au elama,
te dage tibo god Melekba lotu wagi pali.
Dagego te bidi dabe digibulu buluba tagala palali,
te dagego lotu wabo god gegemainu yali.
Tama dagego te gų pagede me te tibo
god dabe gegebo kolesaga ebo dao.
10 Dage te god dabe gegebo sę dene mu eyu,
te dagego bomo silibao.
Tialima, dage tede gę neyu, te tiwai po me weyu,
‘Dago bomo te odolali silibao,’ po wabeo.
‘Dago te tebo kolesaga tagalinao,’
dagego te po wabeo. Menio.
Te duga dwai homu ebo kolesaga
te bomonama mu pedaliyu,
te dage kekasa mu pobao wabo dao.”
11 “Dage dede mu wi elama,
te dagego ena ili po ola mayu,
te ena tudiba munama, te ena homu kone mu
gegeda palobawe?
Te bobobage sogo eno dageba wado po wabe,
tama tiyu dagego enaba wi ebeo.
12 Tiali goli, te eno dagego ebo
kolesaga te pebeli diliba hanilaibao,
tama dagego homugo te wiegi yai
da olama wali pabo sę ebo kolesaga dabe,
te augwaligo dage dwasianu tau me sogobeo.
Mu menio.
13 Te dwai sęgo dage dolobo sogo,
dagego te pesage holama elalubo
godigo te dagego augwaliba i obaso,
te augwali aselama, dage tau sagasaiba, agawe?
Mu menio.
Augwa bomo me elalubeo,
te dwasianu waligo naga augwali sela paibao.
Tialima, te bidi dabe enaba aselama,
te eno augwali tau siyu, tonaluainu ebo bidi da,
augwaligo te tǫ eno sa muyu,
te eno we bidi dabego somainu yaibao,
te augwali me eno digi te sa muani
bulu dude bidimainu yaibao,” wali.
Godigo te we bidi dabego dwai sęgę sela sąnama, te augwaliba wiegi yai sogo mawaibao wali
14 Genuai Bidigo te tama po wali,
“Te eno we bidi dabe enaba ma asomainu yaibao.
Te augwa sunumi bugagia dodolama,
te sunumi paliabo nai tigidali sela sąwaibao,
tiyu te nai dabego augwali sągąde dolama,
te augwali tula muidalio,” wali.
15 “Ena digi ena God, te ena sesemane sogo bidibao.
Eno nogide te magi meda mu meni yai elalubao,
ena te Wiegi Yai Doloba Pai Kolesaga Mu Ebo God
dao.
Ena te ena wiegi yai bulude digi ugwadu bidibao.
Tiali, ena te augwa digi augwa aiyaba elaluama bidiyu,
te augwa yali dwai sęde homu dene ebo we bidi
dali bidibao.
Te eno augwa haliga dąų waliyu,
te augwa bidibo ula te wiegi yai
ma pedalumainu ebo dao.
16 Eno ena we bidi dabeba sesemane sogo wado eyu,
haliga sębę idugobeo.
Te eno tama tiyu da, eno koneani,
te augwa bidibo ula dolama, te mu silaibao,
te bidibo ula ena digi eno augwaliba mawai dao.
17 Eno wado po dwai mu augwaliba wali,
magi baso meni,
te augwa haniani dwai kolesagade te augwaligo
doado bage hauwa mu sabo homu yali.
Tama tialima, te eno augwaliba dene mayu,
te eno gesabidi augwaliba geme sesela sali.
Tiali goli, augwa me hagoma idu gęyu,
te augwa homu kolesaga wali piduai dao.”
18 “Eno te augwaligo ebo dwai kolesaga suali,
tiali goli te eno augwali me dologobeo. Menio.
Te eno augwaligo dwai sęgę sela sąnama,
te augwa usu yai ma pedelaibao.
Te ena digi eno augwali bilibo dodoliyu,
te augwali haliga dąų walaibao.
Tama te homu denede bidiyu, gela wabo we bidi,
19 te eno augwa te homu dene ebo tagalomainu elama,
te augwa enaba usu da olama,
wiegi yai pemene ebo po mimainogo ilaibao.
Ena Genuai Bidi, eno te po obao,
te eno nagame yai haliga ebo homu te pąde bidibo
we bidi dali,
me te digibulu bidalubo hani dabe dali me ebao.
Te augwali eno usu ma ilama,
te augwaliba wiegi yai sogo mawaibao wai dao.
[Ef 2:17]
20 Tiali goli, te dwai kolesaga ebo we bidi dabego,
augwa te dwai kolesaga ebo me tagalogobeo.
Augwali te tamu ąį sesemane sogo
dinigo te haniani pobele bage me dwai nai sela asu,
te nambis dolagasobo tiwai ebo dao.”
Genuai Bidigo te po wai.
21 Eno Godigo te tama po wali,
“Te dwai kolesaga ebo we bidi dabe,
te augwa bugagia bidabo wiegi yai sogo
me elalugobeo,” wali. [Ais 48:22 ]