47
Genuai Bidigo te Babilon dolaibao po wali
1 Genuai Bidigo te tiwai po Babilonba wali,
“Babilon, nago genuai nogi mu elalubo,
te kwin we aga sia kingde dugulalubo tiwai ebao.
Tama nage te gesi wegi bidigo sisąwai
bugagia mu bidibo tiwai ebao.
Tiali goli, megi da, te nage sia kingde
bidali tagalama,
te nage olo tǫ bulude dugulalueibao.
Te nago tigi te polobadu elaluali tiwai gilama
sawi yai me elalugobeo.
Tama te bidi dabego nage te au bugagia elama,
bilibo ma sugobeo.
Mu meni yaibao. [Ro 14:11; Fl 2:10-11]
2 Te nage olo mu sę ebo we tiwai gilama sę yaibao.
Te nago tobolude ugwadu banualuali ugwa nami,
me te nago sawi yai ugwa dabe me dagala sąnama,
nago te wit halubo masigi dabe hogogo belebo sę
yao.
Tama nago gudali ugwa sugua selama,
te ąį dabe nogwaibao.
3 Te bidi dabego nago ugwa peda sąnama,
te nago habu olo elalueibao.
Te eno nageba dwai dene wei ponabo sę mu ebaso,
te mena bidigo ena me togologobeo,” te po wali.
4 Te Israelgo God, te agai da tudi badu pogwalu
ma dobola sabo bidi,
aga te Wiegi Yai Doloba Pai Kolesaga Mu Ebo God
dao.
Agai nogi da, te Tigidali Bomo Elalubo Genuai Bidi dao.
5 Genuai Bidigo Babilonba te tiwai po wali,
“Babilon, nago te naga pedauwali pania selama,
te be hulia sai pesageba duagi pao,
magi baso meni, te gasa hani we bidigo nageba
te nogi munu ma wasiąyu,
‘Te tigidali bulu tǫ kantri kwin da,’ po me wagobe.
6 Eno wado po dwai mu te ena we bidi dabeba wali,
te eno augwali te ena we bidi da
te tiwai homu kone munu ma ebeo.
Te eno nage aselama, augwaliba dwai sę
yagasomainu ilali,
te nago augwaliba homu dene
dwasianu me ebeo. Menio.
Nago augwaliba dwai dene mu ilama,
te augwaliba genuai sęgę mawai.
Te nago monu dabeba me te augwali
genuai sęgę mu tolomainu ilalio.
7 Nago homugo nage te kwin sesemane
sogo bididuaiba homu yali,
tama tiyu, nago te nageba nosali pedelabo sę te
bugagia homu kone palobeo.
Mu tama, tede nago homu kone palobeo.”
8 “Nage te wiegi yai sogo naga gegelama bidabo homu
ebo we, te po odao.
Nago homugo nage bugagia bidaiba homu eyu,
te dwai sę nageba me pedalugobe da homu elama, te
naga digi nago te po wali, ‘Enaduba deligo eno
tigidali bomo elalubao,
te ena tiwai gasa me meni,’ wali.
‘Te ena te tiwai we, te aga bidi isama,
te aga wai puluba me isai,
te tiwai me pedalugobeo,’ homu yalio.
9 Tiali goli, hobede ya, te deli sogo naga te sę si
nageba pedalaibao.
Naga bidi dali, naga wai puluba tigidali me,
te deli sogo naga isaibao.
Nago te naga digi naga tonalubo haniani
bomai pobi po elaluba homu yaibao,
tiali goli te pobi pogo nage tau me sogobeo. Menio.
Te dwai sęgo isaboba kegebao.” [Ped 18:7-8]
10 “Nago tama homu yali, te naga dwai kolesaga
dabego te nage dąų walama, bidaiba homu yai.
Tama nago homugo te nago ebo sę
te bidi dabego sube da homu yai.
Te nago koneani tobage hauwa kolesagago,
te nago homu kone tuą palama,
te nagaba digi nago te tiwai po wali,
‘Enaduba deligo naga tigidali bomo elaluba,’ homu yali,
‘te ena tiwai gasa me elalubeo,’ wali.
11 Tiali goli, te dwai sogo mu nageba pedelaibao,
te nago geda muabo bomo meni yaibao.
Deli sogo tama mu te dolabo genuai sę nageba
pedalubaso,
te magi sę me deligo nago te dolobo sę paliabo
usu meni yaibao.
Te dwai nai dabe te nago homugo
nageba pedalugobe da homu yali,
te pedaliyu, nage mu dolaibao.
12 Wiegi yai da, nago te haniani bomai pobi usu sidu,
te nage gesi sogo gesi tigi elalubo
sogo usu selama, konea sali.
Te augwaligo nage tau sabo homu yali.
Te augwaligo nago boi bidi dabe wi ilama,
wi paibao homu yali.
13 Te kolesaga koneani bidi hauwago
te nageba homu kolesaga mayu,
te nago homu mu dąų walali.
Tiali goli, nago te kolesaga koneai bidi dabego
te hǫba tonomainu i ola suali,
te bidi dabe te tigidali poluade nageba aselama,
te nageba mena sę pedelabo po wali.
Te augwaligo nage tau sabo homu egobewe?
14 Tiali goli, menio.
Augwali te sasia pai nosai tiwai elalubao,
te nage dolainu ebo siago te augwali tigidali daibao,
te augwa digi augwa tau me sogobeo.
Mu tamao, nago homugo nage te isi pąba duagi pelama,
sia gogo naiba homu me egobeo. Menio.
Te siago nage tigidali daibao.
15 Mu tamao, nageba te homu kolesaga mani bidi dabe,
te nage gesi tigi elalubo sogo
te bidi dabego nage tau sali bidi dabe,
te augwali homu kolesaga umuna palama,
te me deligo nage tau me sogobeo,”
Genuai Bidigo te po wai dao.