18
Genuai Bidigo te bulu Sudande po elaluali
1 Te Sudan bulu wę u badu bidibo we bidi
hobede mu dao,
te haniani mano dabe hauwa ugwaba,
edaba bola biliyu ebo tǫde.
2 Augwaligo augwa po sabilibo bidi
dabe taga palama,
tama augwali te wę Nail dulu te augwaligo
wę sesegede holobo nosaigo nigai geba tiwai nai,
te naidu ibaba dulubo dao.
Dage Sudan dabego po sabilibo bage,
dage te po polo sela asobo bage dao,
dage duga bomai buluba ma piąo,
te wę hauwa elalubo bulu dao.
Te bulu we bidi dabe augwali bobobage
elama, tama augwaligo tigi sawi yai mu elalubo dao.
Tama dagego te bulu te wąbi hwįbode
genuai nogi elaluyu,
tama gasa bulu dabego dage mu wi ebo dao.
3 Dage te tigidali tǫde bidibo we bidi,
dagego odao.
Te dagego bulu dude magi me dodolai
yaibaso da, dagego bugagia suiąo.
Tama bu wabo nai biugel po wai da
wabo si da, dagego olo saganama, bugagia odiąo.
4 Magi baso meni, Genuai Bidigo
enabolo e tama po walali,
“Ena Genuai Bidi, ena ena bulu dagalude
bidiyu, tama eno we bidi dabego
ebo kolesaga subo sogo da,
ena haliga nagame elama, tama eno olo
tama tonaluaibao.
Eno homu polo hogodama,
augwali polo dolabo homu ebo menio. Meni.
Eno dua tonaluyu, tama te giliga
nanama, tama masigi sanede
bomona nanebo tiwai elama,
tama te agai posolo ugwaba dua holobo ąǫ ebo dao.
Tiali goli, isi mu dadala sabe.
Tama me ma, ena te hulide te nai ininama,
sabo magąde te tulubo u meni yai
tulubage tulubo tiwai ebo dao.”
5 Te mu tama, megi te bulu * Bidi mebago homugo te kantri Sudan po olama wali homu yali. Tiali goli, gasa bidi dabego homugo te kantri Asiria po olama wali da, homu ebao.
te ni wain bomona holama,
tama dudili elama, tama telega pelama,
te wain du tau yabo magą ebo tiwai dao.
Tialigo Genuai Bidigo te bulu dolaibao,
te bidigo sębę elama,
te ni wain nologo te wain du
tau isąbadi toga sabo tiwai yaibao,
te nedu du sabo magą isąbadi
toga sabo tiwai yaibao.
6 Genuai Bidigo te gasa bulu
bidi dabego te bulu dolagasomainu
elama, tama te bulu ami bidi dabego
tigi dabe te tǫde dabe olo munalua paibao.
Tama giligade da, te ba kemodage
dabego tuagasaibao, ma te kedau ebo sogo da,
te bulu hasa dabego tuagasaibao, te tigi pulu dabe.
7 Te sogo augwaligo te Tigidali Bomo
Elalubo Genuai Bidibolo
te olo maiabo wiegi yai nai
sela asaibao, te boma pai kantridu.
Te bulu te wę hauwa elalubo bulu dao.
Te bulu we bidi dabe augwali bobobage mu elama,
tama augwaligo sawi yai tigi mu elalubo.
Tama te bulu te wąbi hwįbode
genuai nogi mu elalubaso,
te gasa bulu dabego agade wi mu ebo dao.
Te bage augwaligo augwa olo maiabo
nai dabe te bulu du Saionba sesaibao,
te Genuai Bidigo te we bidi aga pąba aselama,
tama agaba lotu weyu emainu dąį ilai pesage dao.
[Sef 2:12]
*18:5: Bidi mebago homugo te kantri Sudan po olama wali homu yali. Tiali goli, gasa bidi dabego homugo te kantri Asiria po olama wali da, homu ebao.