1 Joas aga Juda dabego king pedelali sogo, agai kibu be 7 naga elaluali, aga gesi ogwa naga dao. Tama aga Jerusalemde king bidibadi kibu be 40 yali. Joas aga ida te Sibia dao, te taun Berseba we dao. 2 Te pris Jehoiada bidibadi da, Joasgo Genuai Bidigo gedude wiegi yai kolesaga iyu yai dao. 3 Tama Jehoiadago Joasgo we si odolali. Tialima Joasgo augwali si selama, tama augwali sigo ogwa me wegi ame nani.

4 Kibu be meba bidama nosali Joasgo Genuai Bidigo tempel be ma dodolabo homu yali. 5 Tama agai pris dabe me Livai dabe sisinama, tama augwalibolo e tama po wali, “Dage tigidali Juda dabego taunba pelama, tigidali we bidibolo dena Godigo be dodolabo mone maiąo po wao. Dagego te sę tigidali kibu bede iyąo. Tama megi da, dage polo pelama, te mone dabe polo sigi piąo,” wali. Tiali goli Livai dabego te polo ebeo. 6 Tialima Joasgo pris Jehoiada i wali, te pris dabe me Livai dabego polalubo bidi, tama agabolo e tama po hanalu wali, “Magi baso nago te Livai dabebolo te takis mone te Juda dabe me Jerusalem dabede mone polo sao po wabewe? Dagego koneani, polobadu Moses te Genuai Bidigo sę bidigo me Israel we bidi augwaligo po dąų weyu, te Genuai Bidigo ugwa sel be sę tonaluabo mone mawaibao po wai dao. Tama tialima, te Livai dabego te takis mone magi baso polo sigi pabo homu ebewe?” te po hanalu wali. [Sai 30:11-16]

7 Joas agai te sę yainogo yali, te magi baso meni, te dwai we Atalia aga kwin bidali sogo aga hani meba te Genuai Bidigo tempel be tomoba tula pelama, tama meba nai dabe dolai dao. Tama me augwaligo Genuai Bidigo nai dao olama sa muani nai dabe sese sela pali. Te nai dabe sela pelama, te tibo god Balba lotu wainu sela pali.

8 Tialima kingo Livai dabebolo walama, augwaligo te mone muabo halobage me geselali. Tama augwaligo te halobage te Genuai Bidigo be tomoba tula pabo sunumide te halobage muani. 9 Tama augwaligo Jerusalem we bidibolo me gasa Juda bulu we bidi dabebolo te takis mone Genuai Bidiba sesao olama po ola tolali. Augwaligo polobadu Moses Godigo sę bidi augwalibolo te nai meni yai wa pai bulude bidiyu ma wali, te tama tiwai naga maiąo po wali. Te Israel we bidibolo wali gilama tama tiąo po wali. 10 Te tobolu bidi dabe me te we bidi augwaligo te po odama, augwali homu deli mu yali. Tama augwaligo mone seselama, te halobage muagasali, tama te halobage pągąna pali. 11 Tama tialima, tigidali sogo te Livai augwaligo suali madi te halobage pągąwai baso da, augwaligo te halobage te kingo ofisa dabeba sela peyu ebo dao. Tama tialima kingo kuskus bidi me polalubo pris bidigo ofisa bidi sigo te halobagede mone sabo si, tama te halobage augwaligo aga munaluali pesageba ma mugi peyu ebo dao. Te tama tiali kolesagago augwaligo Genuai Bidigo be dodolabo mone hauwa mu sali.

12 King Joas de hetpris Jehoiada augwali sigo te mone selama, augwaligo te be dodolobo sę ebo tonalubo bidi dabebolo mayu ebo dao. Te sę tonalubo bidi dabe augwaligo te kamda me te masigi dugo be sę ebo koneai bidi dabe siyu, me augwaligo te ain me brasgo nai dabe geselebo koneai bidi dabe me siyu yali. Tama augwaligo augwalibolo te Genuai Bidigo be ma dodolao po wali. 13 Te sę bidi dabe augwaligo sę bomo elama mu elama, tama Godigo be wiegi yai mu pedelama, tama boma pai polobadu elaluali tiwai yali. 14 Te sę bidi dabe augwaligo Genuai Bidigo tempel be dodolobo sę silali, tama te gol me silva bugai munaluali. Tama tialima te bos bidi dabego te gol dali silva dali si selama, augwali king de Jehoiada sibolo mani. Tama augwali sigo selama, gasa sę bidi dabebolo menama, augwalibolo te ofa yabo nai plet dabe, te wiegi yai denami ebo pauda ulabo plet dabe geselao po wali, tama te plet dabe me kap dabe me geselao po wali, tama Genuai Bidigo be tomode sę yabo nai meba me geselali.

Te Jehoiada bidibadi te we bidi augwali Genuai Bidigo beba pelama, augwaligo isigo mu dela silibo ofa mu iyu yali, te tigidali sogo. 15 Tama nosali Jehoiada aga monu dabe mu yali, tama aga 130 kibu be elama, tama aga nosali isali. 16 Tama te we bidi augwaligo te Jehoiadago Godigo gedude wiegi yai sę dabe yali kone palali. Agai te we bidi tau sabo sę hauwa mu eyu, me Godigo be tau sabo sę me hauwa mu yali. Tama tibaso, augwaligo aga te king dabego gų pagede pubulali, te Devitgo Taunde.

17 Te Jehoiada aga polo isai madi, te Juda dabego tobolu bidi dabego king Joas homu begelabo po wali, tama agai augwaligo po wali pali. 18 Tama king dali te Juda we bidi me Jerusalem we bidi augwaligo Genuai Bidi augwa wąįgo God tudi ola mani. Tama augwali Genuai Bidigo bede lotu po me wayu ebeo. Menio. Augwaligo tibo god dabeba lotu weyu, me god we Aserago piksaba lotu po weyu yali. Augwaligo te dwai sę Godigo gedude yali. Tama tibaso Godigo augwali dali sębę yali. 19 Tama Genuai Bidigo profet dabe tagala palali, tama bomai po dabe augwalibolo olama, augwali agaba ma asomainu ilali. Tiali goli, te we bidi augwali po sela sąbo sę genuai mu yali, tama augwaligo te profet dabego po odobeo.

20 Tama tialima, Godigo Spirit Mobo Bidi bomo elama mu te pris Jehoiadago ogwa Sekaraiaba pedelali. Tama Sekaraia aga te we bidigo suabo pebeli diliba ugwa doligi pali, tama agai augwalibolo e tama po walali, “God Genuai Bidigo te po walio. Dagego agai bomai po polo bogi palio, tama dage bugagia munu me bidigobeo. Magi baso dagego te tobage kolesaga yaliwe? Dagego Godiba tudi ola manio. Tama tibaso, agai me dage polo tudi ola manio,” Sekaraiago te po wali. 21 King Joas aga ofisa dabe dali augwaligo te Sekaraiago wali po wei ebeo, tama augwaligo aga ela isilabo po miani. Tama tialima kingo pode te bidi dabego masigigo Sekaraia enani, tama aga te Genuai Bidigo tempel be bagulali obo tomode sisinibo pesagede elama isilali. [Mt 23:35; Lu 11:51] 22 Kingo pris Jehoiada aga ayago yali te wiegi yai kolesaga aga dali yali te konebeo, te Sekaraia aga ayago yali kolesaga. Menio. Agai Sekaraia olo dali mu elama isilali. Tama Sekaraia aga isainu te po wali, “Genuai Bidigo dagego te ebo sę sulama, tama aga dage dene mayabuo,” wali.

23 Tama te kibu be silama gesi kibu be pedelainu ebode, teda te Siria ami bidi dabego king Joas dabe dali boi hwįagasali. Augwali te kantri Juda tomoba asiyu, me genuai taun Jerusalemba asiyu elama, augwali hwįnama, tama Joasgo ami aiyaba elaluali. Tama te Siria dabego augwaligo tobolu bidi dabe sese ela silama, tama augwaligo wiegi yai doado bage sese selama, tama Juda dabego wiegi yai nai dabe selama, tama Damaskus taunba ma sela pelama, tama Siria king bidibolo magi pali. 24 Te sę dabe pedelali, magi baso meni, te Juda dabe augwaligo Genuai Bidi augwa wąį dabego God tudi ola mobaso. Tama tibaso, Genuai Bidigo te Siria ami bidi dabe dwasianu hanigo Juda dabego ami bidi genima bage mu aiyaba elalumainu ilali. Tama te kolesagago naga Genuai Bidigo king Joas dene mani. 25 Te hwįani sogo Joas tigide genuai mu selali. Tama te hwįbo silama, te Siria dabe augwa buluba ma pabo side, te king Joasgo ofisa dabe mebago te Joasgo te pris Jehoiadago ogwa ela muani te kone palali. Tama augwaligo Joas ela muabo po pesela sali, te aga dwai kolesaga yali wei ponoyu. Tama nosali augwaligo aga te aga betde pila mubadi augwaligo aga ela muani. Tama bidi dabego agai tigi te Devitgo Taunde pubulali, tiali goli augwaligo aga te king dabego gų pagede pubalubeo. 26 Te king ela muani bidi sigo nogi, te Sabat, me Jehosabat si dao. Te Sabat aga ida te Simeat dao, te Amon hani we me deli dao. Te Jehosabat aga ida te Simrit dao, te Moap hani we me deli dao. 27 Te king Joasgo ogwa dabego po dabe, me te profet dabego Joas dolaibao wali te po dabe, me Joasgo Genuai Bidigo tempel be ma dodolali, te po me, te tigidali te po dabe te buku me augwaligo nogi ebo te buku nogi King Dabego Po Page Elalubo Buku, tede elalubo. Joas aga polo isai madi aga ogwa Amasiago aga pesage selama, tama aga king pedelali.