1 Genuai Bidi Godigo homugo te Elaija deli sogo te pobege ebo waligo dagaluba selasa holaiba homu yali. Tama te sę pedalabo elalubadi yaide, te Elaija dali, te Elisa dali, augwali sabi name si te Gilgal bulu tagalama pai. 2 Tama Elaijago te aga sabi Elisabolo e tiwai po wai, “Nage ede tama bidiyu, tonaluao,” wai. “Magi baso meni, Genuai Bidigo ena Betel buluba pao wai,” wali.

Tiali goli, Elisago e tiwai po wei ponani, “Genuai Bidi bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali paibao,” wali. Tama tibaso, te augwali te Betel taunba talua si pai.

3 Te Betelde te Godigo po pusubo profet bidi hani me badu tede bidai. Tama augwali aselama, te Elisa sabi name si sisinagaselama, tama augwaligo Elisabolo e tiwai po ola mani, “Megi te Genuai Bidi Godigo te naga genuai bidi Elaija selasa paibao,” te tiwai po Elisabolo ola mawai, “te nago koneaniwe, ma meniwe?” wali.

Tama Elisa agai augwalibolo te po wei ponoyu, e tiwai po wai, “Eno me te konea palio. Dagego te nai po me wagio,” wali.

4 Augwali si te Betel bulude me bidibadi yaide, tama Elaijago te Elisabolo e tiwai po tama wai, “Nage ede tama bidu tonaluao,” wai, “magi baso meni, Genuai Bidigo ena Jeriko pao walio.”

Tialima, Elisago te po wai, “Genuai Bidi bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali mu paibao,” wali. Tialima, augwali si te Jeriko taunba talua si pai. 5 Te me badu te profet hani te Jeriko taunde bidalubo bidi dabe, tama augwali te Elisa pageba aselama, tama augwaligo agabolo e tiwai po tama wali, “Megi te Genuai Bidi Godigo te naga genuai bidi Elaija selasa holaibao,” wali. “Tama nago teda koneaniwe, ma meniwe?”

Tama Elisago augwalibolo te po wei ponoyu, e tiwai po augwalibolo wai, “Eno koneanio,” wali. “Te sę yabo po dagego munu ma wagio,” wali.

6 Augwali si te Jerikode me bidibadi yaide, tama te Elaijago aga sabi bidi Elisabolo e tiwai po tama wai, “Nage ede tama bidiyu, tonaluao, magi baso meni, Genuai Bidigo enabolo ‘Te nage te Jordan ąįba pao,’ walio.”

Tiali goli, te Elisago te po wai, “Genuai Bidi tigidali sogo bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali paibao.” Tialima, aga sabi dali talua si pai.

7 Tama bidi sese si olama, te nogo si, 50 profet bidi dabe te sabi name si wali pai. Augwali pelama, te Jordan ąįba sabolama, tama te ąį pąde dolaluali. Tiali goli, te 50 profet bidi dabe te digibulu ganama dolaluali, tama te sabi name si tonaluali. 8 Tialima, Elaija aga bobobage bulubo ugwa dilama, tama te tomagelama, tama te bulubo ugwago te Jordan ąįba elali. Tama te ąį tomode si bugasa pelama, tama te ąį tomode tǫ dila pai mu elaluali. Tama augwali si tedu pelama, te Jordan ąį uba pedai badu sabolali.

9 Augwa si peyu, tama te Elaijago te aga sabi Elisabolo e tiwai po tama wai, “Pąde tama megi Genuai Bidigo ena saibao,” wali, “tama eno nage taga paibao. Tama tibaso, nago homugo eno nage magi naigo nagebolo hasia tau sagawe?” wali.

Elisago te po wei ponoyu, e tiwai po tama wai, “Nago te Godigo bomo mu selama, tama nage te profet sę yai dao. Tama eno homugo nago te sę yali bomo ena mao,” wali, “te ayago aga gomunai ogwa umabo nai mabo kolesaga tiwai gilama yao. * Te Bom 21:17 tede elalubo po suao. Tama eno te nago bidali madigi bidiyu, te usu nama, tama te profet sę yaio,” wali. [Bom 21:17]

10 Elaijago te po wei ponoyu, e tiwai po tama wai, “Te nai nago enabolo hanalu wali, te eno tama polo nagebolo polo magobeo,” wali. “Tiali goli, Genuai Bidigo ena sela holobo sogo, te sogo nago ena subaso da, teda te sogo nago te bomo sagameo, tama tialima, nago ena pabo sogo susąyu da, teda nago sabo usu egobeo,” wali.

11 Tama augwali si te po mimi pabo sę ela peyu pali, tibadi yaide, polo tama te isi bogoli te bidi si tomo agebelede isi bogoli pedalali. Te isi tomode augwali sigo tonobadi yaide, te kibu hosgo te ni namego sai yai madigi bidi dugabo karis kegasa asobo suai. Awe, tama tialima, te pobege ebo waligo te bidi Elaija te dagaluba selasa holali. 12 Elisago te Elaija pabo sulama, tama te Elisago agai i weyu, e tiwai tama wai, “Eno aya, eno aya. Nage bomai bidi mu dao, te Israel bage tau sali bidi mu dao. Tama nage te hauwa hwįbo nai te kibu hos me te karis, nage te tiwai dao,” wali. Elaija te dagaluba polo paide te Elisa agai munu ma sube, tama tibaso, te Elisa aga haligade moni homu sęgę mu eyu, te aga te bobobage bulubo ugwa tomode si peda sąyani. Te page e tiwai, aga homu dene ebo page ola mani. [2 Kin 13:14]

13 Te sogo te Elaija Godigo te dagaluba selasa holali sogo, te aga bobobage holobo ugwa te agai te tǫba tula palali. Awe, tama tibaso, Elisa agai te Elaijago te holobo ugwa selama, te Jordan ąįba geasa pelama, tama aga te Jordan ąį sanide dolaluali. 14 Tama te Elisa agai te Elaijago bobobage holobo ugwa selama, tama agai te Elaijago yali kolesaga tiwai elama, te agai te holobo ugwa selama, te ąįba elali. Tama agai te węba elali sogo agai te po wai, “God, nage Elaijago Genuai Bidio, nage mena bidibawe?” Tama te po obadi yaide, te ąį tomode si buga pali, tama tibo si, te Elisa te ąį tomodu pelama, te ąį u badu pedaiba sabaligi pali.

15 Te 50 profet bidi dabe te augwali te Jeriko bulude bidibo bidi dabe da, tama augwali te bulude me bidaluali. Te bidali bage magi baso meni, augwaligo homugo te Elisago ebo sę page suainu bidaluali. Tama augwaligo te po wai, “Suao. Te bomo te polobadu te Godigo Elaijabolo mawai bomo dao, te bomo megi te Elisa dali bidibao,” wali. Tama augwali asama, tama aga tiąba aselama, augwaligo kidu sugunama, tama augwaligo tobolu me tǫba naga basilali, tilama augwaligo te Elisa genuai nogi mani. 16 Tama augwaligo te Elisabolo e tiwai po wai, “Dago hanigo te bidi sese si olama, te nogo si bomai bidi dabe bidibo,” wali. “Tama dago homugo te bomai bidi dabe augwaligo te nago genuai bidi Elaija gegegi pomainao,” wali. “Genuai Bidigo Mobogo aga selasa pelama, tama te aga bulu du me, bulu odogode me, aga tede tagalama, bidi badi bogo,” wali.

Tiali goli, te Elisago augwalibolo te po wai, “O tegio,” wali. “Dagego te bage tagala palama, aga gegegi pigio,” wali.

17 Tiali goli, te profet bage augwaligo bomo mu yali, tama augwaligo te Elisa aga hanalubo sę bomo mu yali, tama tibaso, Elisa agai homugo te augwali pogobeo olama, agai augwali dąų wagobeo homu elama, tama agai te po wai, “Awe, usu dao,” wali, “dagego te augwali tagala palao,” wali. Tama augwaligo te bidi sese si olama, te nogo si, 50 bidi augwali pelama, tama te Elaija gegedubadi yaide, te sela sogo hodolai, tiali goli augwaligo aga me sube. 18 Elisa aga te Jerikode bidiyu, tama augwali asobo tonaluali. Tama augwali ma geasa asobo sogo, Elisa agai te profet bagebolo e tiwai po tama wai, “Eno magi po waidawe? Tialima, dagego homugo eno wali po dagego odobeo,” wali.

19 Elisa te Jeriko taunde me bidibadi yaide, tama te taun bidi dabe augwali aselama, Elisa agabolo e tiwai po wali, “Genuai bidio, nago suao, te e taun te dwagi yai mu dao,” wali. “Tiali goli, wę digi dwagi yai menio. Tama te we dabe augwali wai haliga elalubo sogo augwaligo te wę naga tubo dao,” wali, “tama augwaligo te wai polo ame nabo, tama augwaligo te wai dabe te haligade genuai isąbadi ame nabo dao, tama teyu, augwaligo te wai dabe polo isibo dao,” wali.

20 Tama te Elisago augwalibolo e tiwai po tama wali, “Dage pelama, te gesi pou dis me deli selama, tama te poude te sol tamu munama, selasa asao,” wali. Awe, tama augwaligo te Elisago wali po wali pelama, tama tiali. 21 Tama te Elisa aga te ulu ąįba pelama, te ulu ąįba te tamu gelali, tama agai te po wai, “Genuai Bidi Godigo e tiwai po tama wai, ‘Ena Genuai Bidi, eno e wę ma dwagi yai ma ilibao. Tama te e węgo bidi te munu ma isibo sę egobeo, tama te we dabego polobadu yaliga te we dabego wai ame nabode te haligade genuai isąwai augwaligo ame neyu yai, te yali tiwai ma egobeo,’ ” wali. 22 Awe, tama te ąį ma dwagi yai pedalali, tama te Elisago wali yali gilama, tama bidada asali yali gilama, tama megi eba usu nagasobao.

23 Tama nosali te Elisa Jeriko taun tagalama, tama te Betel buluba pali. Tama te umabo ogomani te taunde bidibo ogomani te taun bulu badu bidalubadi yaide, te augwaligo Elisa soabo suali, tama augwaligo te Elisa posoyu, e tiwai po olama, tama posoyu yai, “E, nage tobolu wane yai bidio, nage gedao,” wali, “nage te pesagede bidigio, nage gedao,” wali.

24 Elisa aga ma begelama, tama agai te ogomani bomo mu elama tama tonaluyu, agai te augwaliba e tiwai po agai wali, “Eno mu po tama obao, Genuai Bidigo dage dolaibao.” Elisago te po wabo si, te bomo yai genuai uni kibu tiwai kibu sou si nogi bea, te kibu te dwai tǫdi gagawai kibu da, te kibu bea si aselama, te bidi sese si olama, me si, 42 ogomani te kibu sigo ela muna silali, tama te augwali tigi minama mu silai. 25 Tama Elisago te bulu tagalama, te Karmel bulu duba pai, tama nosali aga te Karmel bulu du tagalama, tama te aga te Samaria buluba ma begasa pai.