1 Te king Solomongo te Genuai Bidigo lotu be tempel te bulu du nogi Moria tede te be sę ebo sę gagalali, te Jerusalemde. Tiali te bulu dude Genuai Bidi Devitba polobadu pedelagasai dao, te Solomon aga aya. Polobadu te bidi Arauna te bulu dude te wit nai ge bo sela sąbo sę te bulu dude yai dao. Te Arauna da, te Jebus hani bidi me deli dao. Tama Devitgo te Araunago te sę iduali te pesage sa munama, tama agai te pesagede te Genuai Bidigo be sę yaibao wali. 2 Solomon te king pedelama, tama aga namba 4 wabo te kibu bede te polua namba 2 wabo polua silama, tama te sogo agai te sę gagalali. 3 Te Genuai Bidigo tempel be palibo be daga te king Solomongo usu siyu magi yali. Te tama tiwai, aga bobobage te 27 mita usu nama, tama aga genuai te 9 mita usu nama magi yali. 4 Tama te be gesabidi badu te rum me deli elaluali, te moni be mabo tiwai da, tama agai genuai te 9 mita usu nama elaluali, te Genuai Bidi aga tempel be magi tiwai si tama. Tama te be mabo be ugwa badu da te 54 mita usu nama elaluali, te genuai sigi be mu dao. Tama augwaligo te wiegi yai gol selama, tama augwaligo te be paiyai daga tomo badu munama, te be daga sese tama halua silali. 5 Tama augwaligo te ni pain name selama, tama augwaligo te Genuai Bidigo Tedali Gasagi Yai Be Habu badu papali pelama silali. Augwaligo te nel enene pelama silali. Tama augwaligo wiegi yai gol selama, te ni name dabe haluali. Tama te gol daide augwaligo ni det piksa noma togwalama, tama augwaligo au te sen tiwai yali. 6 Kingo te wiegi yai gol dabe te kantri Parvaimde sai dao. Tama agai te masigi dabe te bidigo abelainogo te genuai prais elalubo sawi yai masigi dabe selama, te be au ilali, te Genuai Bidigo tempel be. 7 Agai te bidi dabebolo te po wali, tama augwaligo te gol dabe selama, tama te be tigidali badu halua silao po wali. Teda te be punali daga ni, me te soiame ni, me te wala wala ni, me te sunumi dabe me te sunumidu aiyadu elalubo ni name dabe te gol selama mesegelali. Tama augwaligo ensel bidigo piksa te be daga nide togoali.

8 Tama Solomongo augwalibolo obaso, augwaligo te Tedali Gasagi Yai Mu Be Habu togali, te habugo genuai te 9 mita usu nama togwali. Te be aga magi dolo e tiwai tama togoali. Tama te be aga bobobage te deli tiwai magi naga yali, te 9 mita usu nama tama yali. Tama augwaligo wiegi yai gol selama, tama augwaligo te Tedali Gasagi Yai Mu Be Habu tomo badu be daga dabe te golgo mesegelali. Te golgo sęgę te 20,000 kilogram sęgę edelali. [Sai 26:33-34] 9 Tama augwaligo te hap kilogram sęgę yai gol selama, tama augwaligo te nel hagalu pali. Tama me augwaligo te gol selama, augwaligo ugwadu elalubo be habu dabego daga dabe te golgo halua silali.

10 Tama te kingo sę bidi dabego ensel bidigo noma si nigali, tama augwaligo gol dabe selama, tama augwaligo te piksa noma si halua silali. Tama augwaligo te piksa noma si te Tedali Gasagi Yai Mu Be Habude dodolali. 11-13 Te piksa noma si tama te Tedali Gasagi Yai Mu Be Habuba gesabidi elama elaluali. Te augwali sigo bogo si dinigilama tama dolo mu tama elaluali, tama deli deli bogogo bobobage te 2 mita usu nama elaluali tama 25 sentimita elaluali. Tama te ensel me te dolo nogo badu dolaluyu, tama aga bogo me te dolo nogo badu be daga nide dagana sai elaluali. Tama te ensel me te pobase nogo badu dolaluyu, tama agai bogo me te pobase nogo badu be daga niba dagana sai elaluali. Tama augwali sigo me badu bogo si da te be habu tomoba talua sagasai elaluali. Te ensel sigo bogo bobobage si te 9 mita usu nama elaluali. [Sai 25:18-20] 14 Tama te sę ebo bidi dabe augwaligo sisi ugwa name me bedeba ugwa name siyu, me wiegi yai tedela name ugwa siyu elama hobolama, augwaligo te Tedali Gasagi Yai Mu Be Habuba tula pabo sunumi paliali. Tama me augwaligo te ensel dabego piksa noma te name ugwa dabe daide hobolali. Tama augwaligo te moni name ugwa walama, te be sunumi tula pabo digi paliali. [Sai 26:31]

15 Kingo po obaso, augwaligo pos bobobage si togolama, tama augwaligo Genuai Bidigo tempel be gesabidi badu dodolabo pos si dodolali. Te pos bobobage si tamago usu da te 16 mita usu nama elaluali, tama me augwaligo te pos si daide ugwadu augwaligo pos si guni nigilama tama te pos si daide muani. Tama te pos ugwadu daide muani au yabo guni naigo bobobage te 2 mita me 20 sentimita usu nama nigilama, te pos si daide ugwadu muani. 16 Nosali augwaligo sen dabe nigali tama te pos si ugwadude walali. Tama augwaligo te 100 pomigranetgo du piksa noma te brasgo nigilama, te sende wawalo pali.

17 Augwaligo te sę dabe ela silama, tama augwaligo te pos si te Genuai Bidigo tempel be gesabidi badu dodolali. Te pos me te u badu saut badu dodolali, me te not badu dodolali. Kingo te saut badu dodolai pos nogi te Jakin mani, tama agai te not badu dodolali posbolo agai nogi Boas polali. * Te Hibru pogo te nogi Jakin page e tiwai dao, “Godigo e nai pedelabo sę yali dao.” Tama te nogi Boasgo page e tiwai, “Te Godigo bomogo yali,” tama wabo.