1 Te kigamu mu te genuai pris dabe dali, te tobolu bidi dabe me, te bomai po page koneai bidi dabe me, te tigidali kaunsil dabe badi, te augwaligo po me deli miani. Tama augwaligo Jisas te bonogo nogo si dunama, tama augwaligo aga selama, tama aga te Rom gavman polalubo tuni bidi Pailat agabolo mawai dao. 2 Tama Pailatgo agabolo hanalu wali, “Nage te Juda dabego tuni bidi da, agawe?” Jisasgo po wei ponani, “Naga digi nago te tiwai po obao.” 3 Tama te genuai pris bidi dabe augwaligo agaba te po hauwa kisilama wali. 4 Tama tibaso, Pailatgo agaba ma hanalu wali, “Nago te po me deli wei me ponosiąma, ebawe? Odao, augwaligo te po hauwa nageba kisilama obao,” te po wai. 5 Tiali goli Jisasgo te po deli wei me ponobeo. Tama tibaso, te Pailat aga noma mu sali.

6 Te tigidali kibu bede te Juda dabego te Pasova olo bidiyu toma nabo side, te gavman bidi Pailat agai te kalabus bidi me deli te olo tagala palu yai. Te Juda we bidi augwa digi te bidi me deli nogi nogi ilama tagala palumainu i obaso da, teda Pailatgo te bidi augwaliba tagala palu yai. 7 Tama te sogo te bidi me deli te kalabuside bidai, te aga nogi Barabas. Aga te gavman bidi dabe dali wąbi hwįai bidi dabe augwali dali kalabus yai bidai. Te hani augwaligo te wąbi hwįnama, tama augwaligo te bidi meba ela muai. 8 Tialima, te we bidi augwali sabalu, tama augwaligo te Pailatba i waliyu, te agai polobadu te augwalibolo ebo tiwai te emainu i wai. 9 Tama Pailatgo po wei augwaliba ponoyu, te po wai, “Te dagego homugo eno te dage Juda dabego tuni bidi Jisas te dageba tagala palumainu homu ebawe?” 10 Magi baso meni. Agai koneani, te genuai pris bidi dabego te homu dwai Jisas dali naga elama, tama augwaligo aga te po tųba odasa asai.

11 Tiali goli te genuai pris bidi dabego te we bidi dabe augwaligo homu hodoloyu, te augwaligo Pailatba i waliyu, te Barabas augwaliba tagala palao po wai. 12 Tama Pailatgo po augwaliba ma wali, “Tama dage te Juda dabego tuni bidi nogi ebo, eno te bidi aga magi yaibawe?” 13 Augwaligo te i ma wai, “Aga te ni pedaide elao!” 14 Tama Pailatgo augwalibolo te po wai, “Magi basowe? Agai magi dwai sę yaliwe?” Tiali goli te we bidi augwaligo po dagą weyu i bomonama wai, “Te aga ni pedaide elao,” wali. 15 Tama Pailatgo homugo te we bidi augwaligo aga dali dwagi yai homu emainao homu yali. Tama tibaso agai te kalabus bidi Barabas te augwaliba tagala palali. Tama agai Jisas te ami bidi dabe augwali nogoba menama, te augwaligo aga dene mayu, dwai bigo eliyu elama, tama aga te ni pedaide elimainu yai.

16 Te Rom ami bidi dabe augwaligo Jisas te gavman bidi Pailatgo be obo bagulali tomoba odasa pelama, tama te be mesalode augwaligo te tigidali ami bidi dabe asomainu i wai. 17 Augwaligo te mama yai nami ugwa me deli selama, te Jisasba gudulali. Tama augwaligo te sesani yai bono me deligo te madi nigilama, tama augwaligo te Jisas toboluba muai. 18 Tama augwali hodalu, doligulama, tama agaba nogo dodoloyu, te po wai, “Giligade dao, te Juda dabego tuni bidi dao!” 19 Tama augwaligo aga toboluba te wawi yai sigi dili me deligo elali. Tama augwaligo agaba pesa sąwai. Tama augwaligo kidu sugunu gulama, tama augwaligo tibo po naga weyu, te aga genuai bidibolo ebo kolesaga tiwai yali. 20 Augwaligo te gisugu mabo sę me te dwai posobo po dabe aga dali ola silibo si da, teda augwaligo agaba te gudulali mama ugwa te augwa peda selama, tama augwaligo aga ugwa te agaba ma gudulali. Tama augwaligo aga te ni pedaiba walainu selasa palio.

21 Bidi me deli, Saimon te Sairini bulu bidi, te Aleksander me Rufus sigo aya, aga aselama, tama te Jerusalem hanu tomoba painu soali. Tama te ami bidi dabe augwaligo agade bomo eyu, agai te Jisas elabo ni pedai te agai tolao wai. Tama agai te ni pedai tolasa pabo gagalali. 22 Tama peyu, augwaligo Jisas te bulu du me deli teba sela pali, te aga nogi Golgota. Te nogi page te e tiwai dao, te tobolu dili tiwai bulu du dao. 23 Augwaligo te Jisasbolo te wain ąį dali taluali marasin ąį mawainu yai, te aga tigi dene silabo marasin tiwai elalubao. Tiali goli agai me tubeo. 24 Tialima, augwaligo aga te ni pedaide ela daganama, tama te ami bidi dabe augwaligo te agai gudali ugwa tigidali te augwa dobola sai. Augwaligo te satu gagali elama, dego te mena ugwa te dąį elama sainu tiali. 25 Te giliga ula dąį ebo kigamu tama, te augwaligo aga te ni pedaide daganama walali. 26 Tama te ni pedaide ugwadu te augwaligo aga po tų ilali po asęai. Augwaligo e tiwai po asęai dao, “Te Juda dabego tuni bidi dao,” te po asęnama te ni pedaide elaluali. 27 Te Jisas walali ni pedai pąde augwaligo te nai wi sai te dwai sę yai bidi augwali si te gasa ni pedai side walali. Augwaligo te bidi me aga te dolo nogo badu waliyu, tama me agai pobase nogo badu waliyu yai. 28 [Tama tialima te Godigo po bukude asęani po me deli te mu pedalai. Te e tiwai po wai dao, “Augwaligo aga dali te dwai bidi dabe dali nedali.”]

29 Tama te augwali eda soyu, ugwa peyu ebo we bidi augwaligo dwai posobo po agabolo weyu yai. Augwaligo tobolu pemeyu, tama po wai, “Ia, nago te Moni Lotu Be tempel aluama tama te sela sogo naga ma sę yaiba wali bidi dao. Behede! * Tib 22:7; 109:25; Mak 14:58; Jon 2:19 30 Megi da, naga digi naga tau sao. Nage te ni pedaide daganalubo tagalama, tama nage aiyaba dulao,” te po wali. 31 Te genuai pris bidi dabe dali te Juda dabego bomai po page koneai bidi dabe, augwaligo me te dwai posobo po wai. Augwaligo te augwa hasi tomode digi te tiwai po wai, “Agai te gasa we bidi dabe tau sali, tiali goli aga digi aga tau sabo usu ebe. 32 Te bidi Krais wabo, te da Israel dabego tuni bidi, aga te ni pedaide daganalubo tagalama tama te tǫba aiya dulubaso, tama dago sulama, tama dago agade konealubo po dąų waibao,” genuai bage augwaligo te po wai. Te bidi si augwaligo te Jisas pąde te ni pedaide walali, te bidi me deligo me te dwai posobo po agabolo wai.

33 Te nai tubo belo wabo giliga tomode, te tigidali tǫ badu be huli si ela selama, te giliga dega sigi painu ebo teba usu nani. 34 Tama te giliga dega sainu ebode te Jisasgo po dagą bomonama weyu, te po wai, “Eloi, Eloi, lama sabaktani?” E tiwai po wai, “Eno God, eno God, magi baso nago ena tagalubawe?” 35 Tama te pąde dodolaluali bidi meba augwaligo te po odama, tama augwaligo te po wali, “Odiąo, agai te Elaija i obao.” 36 Tama bidi me deli udada pelama, tama te wawi yai bola tiwai nai selama, tama te nai te olo wain ąį te naiba gelama, tama te sigi dili me delide munama, tama Jisas agabolo te tumainu ugwaba mawai. Tama te bidigo te po wai, “Meo, dago suyu bolo yaibao. Te bidi Elaija asama, aga te tǫba aiya sela dulaiba homu egowe, ma meni egowe?” te po wai.

37 Tama Jisasgo po dagą bomonama mu olama, tama aga isalio.

38 Te sogo naga tama te Moni Lotu Be tempel tomode dąį tiwai walalobo genuai nami ugwa, te ugwa te ugadu pedasa dulali te aiyaba sabolali, tama te moni nami ugwa pedai si pedelai. 39 Tama te ami bidi dabe augwa genuai bidi aga te Jisas pąde dolalubadi aga te tiwai elama isibo suali. Tama agai te po wai, “Mu tama, te bidi aga te Godigo Ogwa dao.”

40 Te we dabe meba me te digibulu gana dwasianu dodolalu, tama augwaligo me tononaluali. Te augwali tomode bidali we me deli te Makdala moni tǫ we Maria dao. Tama we me deli te Maria, te nogi sabi si wali, te bidi Jems me Joses tega sigo ida. Te bidi Jems aga nogi me Gesi Bidi dao. Tama we me deli aga te Salome dao. 41 Polobadu Jisas te Galili tǫde bidibadi, tama te we dabe augwali aga wali biliyu, tama aga tau sai. Tama te gasa we dabe hauwa me bidali, augwali te moni hanu Jerusalemba Jisas dali asai dao.

42 Te be pio ebode te Arimatea tǫ bidi nogi Josep aga asali. Aga te Juda dabego genuai kaunsil hani bidi me deli, tama agai nogi wiegi yai elaluali. Agai me te Godigo we bidi tonaluabo sogo asobo tonaluyu bidali. 43 Do tama da wabo side te Sabat sogo pedelabo elalubaso, tama megi pio te haniani nai sisi ebo sogo elaluali. Tama tibaso Josep aga te Pailat bidibo be tomoba pelama, te aga gesabidiba doligi pelama, tama aga wi me ebeo. Menio. Agai te Jisasgo tigi sabo po agabolo hanalu wali. 44 Te pode Pailat aga noma sali, tama te po wai, “Aga polo isai dawe?” Tama agai te ami polalubo bidi kepten i olama asobo side, tama agabolo hanalu wali, “Te Jisas isaliwe, ma meniwe?” 45 Agai te ami tuni bidi keptengo po odama, teda agai Josepbolo te po wai, agai te tigi somainao. 46 Tama Josepgo te tedela moni nami ugwa abelama, tama agai Jisas tigi te ni pedaide daganaluali te aiyaba sela dulai. Tama agai aga te tedela ugwago bebe pelama, tama aga te gų page me deli tomoba muai. Augwaligo te gų page te genuai ola be masigi tomode nigai. Tama Josepgo te moni masigi me deli hogogo bele pelama, tama te ola be gų page dedage elalubo te paniai. 47 Te Maria Makdala tǫ we me te gasa we Maria dali, te Josesgo ida, augwali sigo tononaluali, tama augwaligo te Jisas mubo pesage augwali sigo suali.