1 Nosali Jekopgo odali, te Isipde wit elalubo po odali. Tama agai te aga ogomanibolo weyu, bomonama, te po wai, “Magi baso dage olo bidalubawe? 2 Eno te po odali, augwaligo te Isipde wit elalubo po odai. Dagego te da tuabo te meba wit abeligi pao, tiyu da te nasigo isabuo,” wali. * Tpi 7:12

3 Tialima, te Josepgo ama dede nogo si bage pelama, te Isipba wit abeligi pali. 4 Tiali goli, Jekopgo te Josep aga deli idago ame nani ama mu, te Benjamin, te augwali dali pomainu me tagala palubeo. Te Jekop wi eyu, tama te Benjamin te dolidali homu yai. 5 Genuai nasi mu te Kenan tǫde pedalubaso, tama te Jekopgo ogwa dabe augwali te wit abeligi peyu, te gasa bidi dabe dali pai.

6 Te Josep aga te polalubo gavman bidi te Isipde bidali, tama tigidali Isip tǫ badu bidalubo bidi dabe te aga bidibo digi pelama, tama te wit abeligi pai. Tama te Josepgo ama dede te aga bidibo madi sabolama, tama augwali te aga gedude kidu sugunama, tama augwali te gesabidi te tǫba basi gulali. 7 Tama Josepgo aga ama dede sulama, tama polo agai augwali sulama, konea pali. Tiali goli, agai augwali dali po miani te agai augwali konesiąwai bage dali po mibo tiwai yai. Agai augwali dali po bomonama, tama te po wai, “Dage menadu asaliwe?”

Augwaligo te po wai, “Da te Kenandu aselama, tama da nai abelagasu asali,” wali.

8 Josepgo aga ama dede augwali sulama, konea pali, tiali goli augwaligo aga te sulama, konebe. 9 Agai te na yali dabe te aga ama dede dabe dali na polobadu yali te ma homugo kone palama, tama agai te po wai, “Dage te daba sa asobo bidi dabe dao. Dagego te dago tǫ pedai te mena badu mu te hwįbo bomo meniwe naga sueinu gege bilibao,” wali. * Gag 37:5-10

10 Tama augwaligo po wei ponani, “Mena, ąą, genuai bidi. Da te nago sę bidi dabe da, da te nai abelagasu asali. 11 Da tigidali te bidi deligo wai dabe dao. Dago te sa asobo bidi tiwai gilama me ebeo. Menio. Da te mu po wabo bidi dabe dao,” wali.

12 Tiali goli, Josepgo augwalibolo te po wali, “Menio! Dagego te dago tǫ hanu pedai mena badu te hwįbo bomo meniwe naga susa bilibao,” te po wai.

13 Tama augwaligo te po wali, “Genuai bidi, da te nogo si olama, sągągo si bidi da. Da te Kenan tǫde te bidi deligo ogwa dabe dao. Te dago ama gesi bidi mu te megi dago aya dali bidibo, tama dago ama gasa me te hagawai dao,” wali.

14 Tiali goli, Josepgo te po ma wali, “Te tiwai po eno wai dao. Dage te sa asobo bidi dabe dao. 15 Te eno dage te tiwai usu saibao, eno te Ferogo nogide mu po obao. Te dagego ama gesi bidi te asisąbaso, dage te duga buluba ma geasa me pogobeo. 16 Tama dage te kalabuside e bidibadi, te dage me deli tagala palama, tama duga amanu sigi pelama, odasa asao. Tama tiyu, te dago sulama koneainu, te dagego po te mu po we, ma tibo po we, te eno koneaibao. Te dagego po tigidali te mu po menibaso da, eno koneama, te dage sa asai bidi dabe da po waibao. Eno mu po mu te Ferogo nogide obao,” wali.

17 Agai te tiwai po tama olama, tialima agai augwali te kalabusiba munama, te sela sogo bidali. 18 Te sela sogo wabode Josepgo augwalibolo te po wali, “Dagego eno po wali pelama, tama dage bidibo ula elalubao, magi baso meni, eno lotu po te Godiba wabo dao. 19 Te dage mu po wabo bidi dabe da wida, teda dage me deli naga te dage kalabus bidali bede bidimainu yaibao. Tama dage gasa bage, te dage duga we wai dabe nasi ebaso, tau sainu abelali nai wit sela peyu, tama dage pagameo. 20 Tiali goli, dagego duga ama gesi bidi te enaba odasa asiąo, tama tiyu da, te eno koneama, tama dagego mu po wali homu eyu, tama dage me isimainu me egobeo.” Augwaligo te Josepgo po usu da po wai.

21 Tama Josep aga ama dede augwa hasi tomode po miyu, te po wali, “Mu tama, dena digi polobadu te dena ama dwai sę ilali. Dago aga gela wabo suali, tama dago aga tau somainu agai i wali, tiali goli dago agai i wabo me odobeo. Tama megi, da te tiali sęgę sobao,” wali.

22 Tama Rubengo te po wali, “Eno dagebolo weyu, te dagego dena ama doligio po wali, tiali goli dagego te po me odai meni. Tama megi te sęgę dago sabo, te aga isainu yali te wei ponobao,” te po wali. * Gag 37:5-10

23 Josepgo te augwa hasi tomode mibo po odoyu, te po page koneani, tiali goli te aga ama dedego te me konebe, magi baso meni, Josepgo te Isip pogo po weyu, tama te po begelebo bidigo te Josepgo wali po te augwaliba weyu yai.

24 Josepgo odama, tama augwali taga pelama, tama aga gela wagi pali. Aga gela wali silama, te aga ma aselama, tama augwali dali po miagasali. Tialima, agai Simeon nogo tų ilama, tama augwaligo Simeon te ama dede augwa gedude nogo tulama, bidali.

25 Nosali Josepgo te sę ebo bidi dabebolo olama, augwaligo te ama dedego begba te wit bulali, tama augwa beg deli deli tomoba te augwa mone ma bubulu pali, tama augwali te sunumidu peyu, tųdu pabo nai me te augwali tau siyu mawai. Tialima, augwaligo Josepgo wali po tiwai gilama yai. 26 Te ama dede augwaligo te augwa donki dabe daiba te wit beg dabe munama, tama augwali pai.

27 Te augwali pigi pali bulu te hulide te augwali pali, te ama mego te aga donki nai mawainu te begde nai tedali. Tama agai te aga mone te beg po tomode bulalubo suali. 28 Tama aga ama dedebolo i wali, “Suao! Augwaligo te eno mone ma te begba bulali! Te eno begde munalubo suai.” Augwaligo te po wabo odama, tama augwali dwai noma mu sali. Tama augwali wi mu elama, tama subigila po miyu, te po wali, “Godigo mena sę dabolo megi yaliwe?”

29 Augwali te Kenanba sabolama, tama augwaligo augwa aya Jekopbolo te augwaliba pedelali sę po tigidali pusali. 30 Augwaligo te tiwai po wai, “Te Isip polalubo gavman bidigo te bomai po dabolo weyu, tama dabolo te da sa asobo bidi dabe dao po wali. 31 Dago te tiwai po agabolo wali, ‘Da te mu po wabo bidi dabe dao,’ wali, ‘tama da te bulu sa asobo bidi dabe menio,’ wali. 32 ‘Da te ama dabe nogo si olama, sągągo si bidi, te bidi deligo wai dabe naga da. Te ama me deli te isai, tama dago ama gesi bidi mu te aga aya dali te Kenande bidibao.’ 33 Tialima, te gavman polalubo bidigo te po dabolo ma wali, ‘Te dage me deli ena dali bidibaso da, tama eno koneama, te dage mu po wabo bidi dabe da wainogo. Tama dage meba gasa te dage duga we wai nasi idali weyu maiabo nai wit sela peyu, tama duga piąo,’ te po wali. 34 ‘Tiali goli, dagego duga ama gesi ogwa bidi te odasa asao,’ wai. ‘Tama eno koneama, te dage bulu sa asisąwai bidi dabe da waibao, te dage mu po naga wabo bidi da po wainogo. Tialima, eno duga ama te dagebolo ma menama, tama duga e bulu tǫde bisnis sę iyagameo,’ te bidigo dabolo te po wai.”

35 Tigidaligo te augwa wit beg gegeli pelama, tama augwaligo mone gamugi dage te augwa beg deli deli tomode munalua pabo suai. Tama augwaligo te augwa aya dali augwaligo te mone gamugi dage elalubo sulama, tama augwali tigidali wi yai. 36 Tama Jekopgo augwalibolo te po wai, “Dagego eno ogwa si doligi pai. Josep te hagawai. Simeon me te hagawali. Tama megi dagego te Benjamin hagaligi painu obao. Te tama tebo sęgo te ena homu sęgę mawai!” wali.

37 Tialima, Rubengo te po aga ayabolo wai, “Te eno Benjamin te nageba ma odasa asisąbaso da, teda nago te eno ogwa si ela muagameo. Te eno aga tonalumainu emainao, tama eno aga te nage bidibo madi ma odasa asaibao,” wali.

38 Tiali goli, Jekopgo te po wali, “Te eno ogwa nage dali pomainogo me egobeo. Te aga ama isai dao. Tama agaduba deli naga megi bidibao. Ena monu dabe yai, tama aga te sunumide doloyu da, teda dagego ena te moni homu denego te ela mubo tiwai yaibao,” Jekopgo te po wai.