92
Te God nogi ugwaba sabo tęąbi po dao
1 Genuai Bidi, nage Ugwadu Mu Bidibo God
da, te eno nageba usu da wabo te wiegi yai da,
tama te nago nogi ugwaba sabo tęąbi dabe waibao.
2 Tama te tigidali kigamude te eno nageba
te nago ena wei ebo po hanilama
wabo, te wiegi yai ebao,
tama tigidali sogo hulide te nago ena bugagia
tonalubo da po hanilama, nageba waibao.
3 Eno te wiegi yai musik te gitade weyu,
te nage nogi ugwaba saibao.
4 Eno te nago bomai sęba homu kone palama,
tama ena bugai haliga mu elama,
tama eno te wiegi yai homu
pemene ebo tęąbi ebo dao.
5 Genuai Bidi, nago te genuai sę mu ebo dao.
Nago homu kolesaga te genuai mu elalubao.
6 Te homu kolesaga meni yai bidi, te umawai bidigo,
te tama sę ebo dabe me koneainu
ebaso, usu me egobeo.
7 Te dwai bidi dabe te wiegi yai nosa
tiwai ma pedaliyu,
tama te dwai kolesaga ebo bidi dabego
te doado bage hauwa selama,
tama augwa bugagia bidaibao,
tiali goli, nago augwali mu dolaibao.
8 Magi baso meni, Genuai Bidi,
naga digi te sesemane king
bidada peyu, bidada paibao.
9 Dago koneai, te nageba boi bidi
ebo bidi dabe te augwali isaibao,
tama nago te dwai sę ebo bidi dabe
aiyaba elaluaibao.
10 Nago enaba genuai bomo mawai,
te uni bulmakau omaigo bomo tiwai mawai.
Nago enaba wiegi yai sę ebaso,
tama ena wiegi yai pemene mu ebo dao.
11 Eno te ena boi bidi dabe dolobo sulama,
tama eno te dwai bidi dabego gela wabo odali.
12 Te doloba pai kolesaga ebo we
bidi dabe te wiegi yai pedalu,
te nigo wiegi yai du walubo tiwai yaibao,
tama te genuai holama,
te Lebanonde te wiegi yai ni
sida dabe tiwai yaibao.
13 Augwali te Genuai Bidigo bede
bulai ni dabe tiwai yaibao.
Augwali te dena Godigo be tomode
te wiegi yai mu pedalubo tiwai dao.
14 Te augwali monu dabe pedalubo sogo,
te augwa nai du me waludaibao.
Augwali te bomo elalu, tama augwali me sasia pabeo.
Te augwa yabe te ni yabe gesi sogo
elalubo tiwai sesemane elaluaibao.
15 Te kolesaga augwaligo te we bidi
augwaliba ola mabo dao,
Genuai Bidi te mu doloba pai dao.
Agai te ena seselalubo bomo elalu,
tama agade dwai sę ebo me elalubeo.
Mu menio.