1 Te me sogo Sabatde Jisas te bomai po odobo lotu be tomoba ma pali. Tama bidi me deli bididuali, te aga nogo me deli dwai elaluai. Te aga nogo penelama, te wa pai tiwai elaluai. 2 Tama augwaligo Jisasba tonaluali. Augwaligo koneainogo, agai te bidi te Sabatde te wiegi yai ilibowe, ma meni ebowe naga sueinogo yai. Augwaligo te Jisasgo te sę ebode te po tų ilainogo homu yali. 3 Tama Jisasgo te nogo penelali bidibolo te po wai, “Nage eba asao, te we bidi gesabidide dolaluagasao.” 4 Aga pąba asama, tama Jisasgo augwalibolo te po wai, “Te eno dagebolo hanalu obao, te dago te Sabat sogo te wiegi yai kolesaga yabo homu yaibawe, ma dago dwai kolesaga yaibawe? Dago te Sabat sogo te bidi dabe bugagia bidimainu tau sabo sę yaibawe, ma dago te bidi ela mumainogo eyu yaibawe? Dago bomo yai pogo tede magi po elalubawe?” Tiali goli augwali sagia siyu, po me wabeo. 5 Tama agai augwaliba tonono bilama, tama augwaligo te nogo dwai bidi homu dene esiąbaso, aga sębę yali. Tama agai augwaligo tabi dagana sabo sulama, tama aga tede homu sęgę yali. Tama agai po te bidibolo wali, “Nage nogo debelao.” Tibaso, aga nogo debelali, tama nogo wiegi yai ma pedalali. 6 Tama te Farisi dabego te tebo sulama, tama polo te augwali hogodosa pelama, tama augwali te Herodion hani dali deliba sisinigi pali. Augwali tigidaligo po miyu, tama Jisas elabo po miani.

7 Te Jisas dali aga wali pabo bidi dabe augwali te bidali bulu tagalama, tama augwali te Galili sigi ąį saneba pali. Tama te genuai hani we bidi augwali aga wali asali. Augwali te Galili tǫ we bidi me, te Judia tǫ me, 8 te Jerusalem moni hanu me, te Idumea tǫ we bidi dabe me, te Jordan pabo ąį pedai u badu bidibo we bidi me, te moni hanu si Tair dali Saidon side bidibo we bidi, te genuai hani we bidi dabe augwaligo te Jisasgo ebo sę po odama, tama augwali agaba asali. 9 Tama Jisasgo aga wali pabo bidi dabebolo te po wai, “Te genuai we bidi hani mu bidalubao. Tiyu augwaligo ena gea sidali, dagego te moni geba me deli dodolama muao. Ena teba holama, tama bugagia bidaibao,” agai te po wali. 10 Magi baso meni. Agai te gasi yai we bidi hauwa wiegi yai ma ilali, tama tibaso te gasa gasi yai we bidi dabego agaba bomonama kęą sai elaluai. Augwaligo agaba nogo muainogo homu yai. 11 Te dwai haubo noma bidi elaluali bidi dabego aga subaso da, teda augwaligo agaba kidu sugunama, tama augwali i bomonama weyu te po wali, “Nage Godigo Ogwa dao,” wali. 12 Tiali goli agai po bomonama augwaliba wali, augwaligo te aga nogi hanilama munu me wagio wai.

13 Jisas te bulu du daiba holai. Agai te bidi meba sa muainogo yai. Tama agai te bidi dabe i olama, tama augwali agaba asali. 14 Tama agai nogo si olama sągągo si bidi sa munama, te augwali aga dali bidimainu yai. Agai augwali te wiegi yai po pusigi pomainogo tagala palabo homu elama, 15 tama agai augwalibolo te dwai haubo noma bidi sela sąbo bomo mawainogo yai. 16 Agai te nogo si olama sągągo si sa muani bidi dabego nogi e dao: te me Saimon, Jisasgo agabolo gasa nogi Pita mawai. 17 Tama Jems, te Sebedigo ogwa, te aga ama Jon dali, te agai gasa nogi Boanerges mani. Te nogigo page te e tama tiwai dao: te be kulukulu wabo dagalugo ogwa dao wali. 18 Tama gasa sa muani bidi dabego nogi Andru, me Filip, me Bartolomyu, me Matyu, me Tomas, me Jems te Alfiusgo ogwa, me Tadius, me Saimon te Kenan tǫ bidi, 19 tama Judas te Keriot bulu bidi, te bidigo nosali te Jisas dali boi ebo bidi dabego nogoba muai dao.

20 Jisas te beba pai. Tama te genuai we bidi hani augwali ma sisinani, tama te Jisas aga wali pabo bidi dabe dali augwaligo te we bidi tau sabo sę hauwa elalubaso, augwali te nai tuabo sogo meni yani. 21 Te Jisas aga deli kaneme bage augwaligo te po odama, tama augwaligo aga sagasainogo asai. Magi baso meni, te olo we bidi dabego “Aga te wabo palio” po wabo augwaligo odali.

22 Te Juda dabego bomai po page koneani bidi dabe augwali te Jerusalemde bidaluali tama meba edaba dulama, tama augwaligo Jisasde te po wai, “Te dwai haubo noma bidi dabego tobolu bidi nogi Belsebul, tego Jisasde dagana siyu bididubao. Tama te Belsebulgo agabolo mani bomogo Jisasgo te dwai haubo noma bidi dabe sela sąbo dao,” augwaligo te po wai.

23 Tama te po obaso, Jisasgo augwali aga pąba asomainogo i olama, tama agai te po meba habu sugunama te po begelama wali. Agai te po wai, “Te magi ilama tama te Satango te Satan aga digi te sela sąwainogo ebo usu yaibawe? Woo, te Satango aga digi me sela sagobeo. 24 Te genuai tǫde bidi me deligo bomo tomode bidibo bidi dabe augwa hasi te hani si bugulama tama hwįbaso da, teda te bomo elaluali te usu me elalugobeo, te moni hani tulaluaibao. 25 Tama te deli bede bidaluali bidi hani te augwa hasi bugulama, tama augwali hwįbaso da, teda te bede bidali bage te bomo elama me bidigobeo, te pebeda paibao. 26 Tama te tiwai me, te Satan agaba digi boi bidi elama, tama aga hani te peda siyu da, teda aga bomo elama bidabo te usu me elalugobeo. Menio. Te aga sia saibao. 27 Me ma, te bidi me deli aga olo tama te bomai bidi me deligo beba pelama, tama agai nai selama dobawainogo ebo te usu me egobeo. Menio. Agai te bomai bidibolo hasia te nogo sągą duaibao. Agai tama tilama, tama agai te bidigo bede elaluali doado bage tigidali dobola selama selasa paibao,” wali.

28 Tama Jisasgo te po olama, po me weyu agai te po wai, “Eno mu po dagebolo obao. Te we bidigo magi magi dwai sę ebo, ma augwaligo magi dwai posobo po Godibolo wabo, te tigidali dwai dwai kolesaga te God agai sela sąbo bomogo sela sąbo usu mu yaibao. 29 Tiali goli bidigo dwai posobo po te Godigo Tedali Mobo Bidi dali obaso da, teda Godigo agai te sęgę me sela sąsiąma elaludu, te megi me nosali me te munu me sela sągobeo. Menio. Te sęgę agade me tama elalua pidu pidubadi geaibao,” Jisasgo augwalibolo te tama po wai. 30 Magi baso meni. Augwaligo aga dali te po wai, “Te agade dwai haubo noma bidi elalubao,” wali.

31 Te po wabo silama, tama te sogo te Jisasgo ida me ama dede dabe dali augwali sabolali. Augwali te be bulu badu dodolalu, tama augwaligo po agaba ola tolali. Augwaligo homugo te aga augwaliba asomainu homu yai. 32 Tama genuai we bidi hani duada solama, te aga bagulama tomode bidibaso, tama augwaligo te po agabolo wali, “Odao, te naga ida me ama dede badi, te augwali bulu badu bidaluagaselama, te augwaligo nage i obao,” wali.

33 Tama agai te po wei augwaliba ponani, “De dede te eno ida me ama me dawe?” 34 Agai te aga bagulama duada pali we bidiba tonono bilama, tama agai te po wai, “Te eno ida dede, ama dede dabe ena dali bidalubo suiąo,” wai. 35 “Te bidigo te Godigo homu kolesaga wali pabo bidi bidibaso da, aga te eno ama abe me ida dao,” Jisasgo te po wai.