Elifasgo po si sogo ma wai
15
(Dąį 15)
Bidi dwai dabe dwai dene saibao
1 Jopgo po ola silibo si, te bidi Elifas, te Teman hanu bidigo po wei ponoyu, e tama wali.
2 “Jop, nage koneai bidi,
tama nage dwagi yai kolesaga elalubo bidi dao.
Tiali goli, nago magi baso po hauwa
olama, wali asobo tiwai elama,
pedauwalidu po hauwa dogia pobawe?
3 Nago pogo hwįhwį pabo.
Tiali goli, nago po dwagi yai menio.
Tama tego bidi me tau sogobeo. Menio.
4 Te tobage pogo te we bidigo kolesaga dolama,
tama augwali God dologode me elalugobeo,
tama aga me kone egobeo.
5 Nago dwai sę yali.
Nago te tobage pogo naga yali dwai sę
aiyaba mesegelainu elama, halubo po tiwai te obao.
Nago po te ili po wabo bidigo po tiwai.
6 Eno nage po tų ela magobeo. Meni.
Naga pogo digi naga ma po tų ela mayu,
tama nago dwai sę polo yai dao olama, te ola mobao.
7 Mena tama tialiwe?
Nago homugo bidi me hasia pedalisiąbadi,
tama nage ame nani homu eba, agawe?
Godigo te bulu du nigisąma ebadi,
naga idago nage ame nai yali bogo. Tega?
8 Nage te Godigo te sę dabe yaiba obadi,
nage te sogo me nage tede bidai dawe?
Nagaduba deli naga dwagi yai kolesaga elalubawe?
Tega? Mu menio.
9 Nago kolesagago dago kolesaga me edelebeo.
Nago koneani nai me, dago me koneanisei, te nai.
10 Da tomode ili nisi yai monu dabe bidibo.
Tama augwaligo kibu bego nago ayago
kibu be me edelai dao,” wali.
11 “Jop, Godigo homugo nago dene osola sulama,
tama nage homu nagame elama, dua bidimainu
yaibao.
Tama me ma, dago po doanu olama,
tama nagebolo dwagi yai po wai dao.
Tiali goli, nago homugo Godigo
te yainu ebo sę te olo da, te homu ebawe?
12-13 Nage noma selama hodaluyu,
God dali wado ebogo nage gedu pę te ebao.
Tama nago haniani dwai po agabolo te obao.
Tiali goli, magi baso nago te tobage kolesaga ebawe?
14 We me, bidi me, Godigo gedude doloba pai me
elalubeo.
15 Te ensel dabego bidi edelali.
Tiali goli, Godigo augwaligo me badu
kolesaga doloba pai subo menio.
Tama dagalude nai dabe me Godigo
agai gedude dwagi yai menio.
16 Tiali goli, da tǫde bidi da,
da dwagi yai mu menio.
Dago kolesaga da, damua pai mu dao.
Dago dwai sę yabo homu godolo naga ebo dao,
dogoni wa pai bidigo wę gegebo tiwai dao,” wali.
17 “Megi da, Jop, nago eno poba bugagia olo muao.
Eno sulama yali sę nagebolo ola mawaibao.
18 Eno te kolesaga te dwagi yai homu kolesaga yai
bidi dabede konea sai dao.
Augwaligo te kolesaga augwa ayade digi sai dao.
Tama augwaligo ena ola mani sogo,
te po me duala sabeo.
Augwaligo tigidali mu pusalio.
19 Te hani augwali augwa bulude bidibo.
Tama subigila bilai bidi dabe augwali bidiboba aselama,
augwaligo kolesaga dolai menio.”
20 “Eno po e tama dao. Bidi dwai dabe da,
dene sesa pidubadi, augwali isibo
sogoba usu nagasaibao. Magi baso meni.
Augwaligo gasa we bidi aiyaba ilama, dolobo dao.
21 Augwaligo haniani kulukulu odobo si,
augwali wi mu ebo dao.
Augwaligo homugo dwai naigo augwali
dolainu asobao wabo dao.
Tama augwaligo homugo augwali
bugagia bidibao homu ebode da,
teda bidi dabe aselama, augwali dolama,
augwaligo nai dabe wi sagasobo dao.
22 Augwaligo po koneani.
Dwai nai dabe augwaliba sabolama, te hulia siyu,
tǫ mesegela sabo tiwai augwali
mesega saiba homu ebo dao.
Tama augwaligo konebo dao.
Augwali te dwai sęde augwali geda mugobe
homu ebo dao.
Tama augwaligo koneani,
te boi bidi dabego augwali bobobage
kągo hwągo ela muaiba homu ebo dao.
23 Augwali nai gege biliyu, bilibo dao.
Tiali goli, nai meni yai subo dao.
Tama augwaligo konebo dao,
pąde dwai sogo augwaliba pedalama, tama be
huliyu,
tǫ mesega sabo tiwai mesega saiba homu ebo dao.
24 Augwaligo homu kolesaga dolo meniama,
tama dwai homu elama, augwali wi mu yaibao.
Tama tego augwaligo homu kolesaga dolama
mesegelaibao,
te kingo aga boi bidi dolobo tiwai yaibao,” wali.
25 “Te dwai sogo te dwai bidi dabeba
pedalaibao. Magi baso meni.
Augwaligo homugo God tigidali bomo
elalubo bidide genina mu da homu yaibao.
Tama augwaligo tobolu gagea pelama,
Godigo bomo usu sabo dao,
26 te hwįbo ugwa guduyu,
te hwįbo ni name sabele tola selama,
God aga dali hwįgi pabo tiwai.
27 Megi da, augwali bugagia bidiyu,
augwaligo tigi genuai elama,
tama nai dabe hauwa elalubao.
28 Tiali goli, augwali bidibo hanu dolama,
tama be dabe te pobelebage pesage
tiwai elama, bidi tede me bidigobeo.
29 Tama augwaligo moni nai dabe tigidali
hagala silaibao.
30 Augwali te dolobo sęde geda mugobe.
Teda augwali te hulia siyu,
tǫ mesega sabo tiwai yaibao.
God agai sębę e tiwai yaibao, isigo ni delama,
waligo agai yabe da gasaba subigila sela pabo ąǫ yaibao.
31 Augwaligo dwai tibo kolesaga dąų wala selama,
augwali homugo tego augwali
dwagi yai mone sesaiba homu ebo dao.
Tiali goli, meni.
Augwaligo dwagi yai nai sabo me usu egobeo.
Augwa tibo kolesaga mu da,
teda augwaligo sabo masigi tiwai.
32 Tama augwali kibu be hauwa isiąbadi,
polo isila paibao,
te sagane ni bidigo gelai tiwai yaibao.
33 Te tobage bidi dabego sę hauwa mu ebo dao.
Tiali goli, te sę dwagi yai pedalobo menio.
Augwali e tiwai dao,
ni waingo wain du walobo tiwai.
Tiali goli, augwali tau isiąbadi,
polo telega pabo tiwai dao.
Tama augwali te ni oliv duduli hauwa walobo tiwai.
Tiali goli, te duduli tulaluama, nedu du menia tiwai dao.
34 Te bidi hani Godigo po wali pisąma
ebo bidi hani da, olo bidaibao.
Augwali wai bǫų meni yaibao.
Tama te doloba pai kolesaga isąma
mone sali bidi dabego be isi ulaibao.
35 Te dwai dwai ili po olama, tibo po wabo
homu kolesaga
te bidigo haliga tomode te we sibigo
wai haligade pedalobo tiwai ebo dao.
Augwaligo homu kolesaga dali, augwali haliga dali si
te dwai kolesaga yabo homu pągąnalubo dao.
Tama tiyu, augwaligo haniani dwai sę ebo dao.”
Te Teman hanu bidi Elifasgo te po Jopbolo wali.