11
Juda dabego te Genuai Bidigo bomai po bolali po
1 Genuai Bidigo ena Jeremaiabolo te tiwai po wali, 2 “Te eno dąų wabo bomo yai poba olo bugagia muao. Tama nage pelama, te Juda me Jerusalem we bidi dabeba te tiwai po 3 wagi pao. ‘Ena Genuai Bidi, eno duga Israelgo God, eno te po obao, mena bidigo eno bomai dąų wabo po me wali pisąbaso da, teda aga dolaibao. 4 Te dąų wabo bomai po te eno duga wąį nǫų dabe te Isipdu odasa asali sogo mawai dao. Augwaligo te Isip taga soali sogo, te sia posolo tiwai mu yali bulu, te eno augwaliba te tama po wali, “Dagego eno po tigidali wali pobaso da, teda dage eno we bidi hani bidiyu, te ena dagego God bidaibao. 5 Tama eno te duga wąį nǫų dabe dali dąų wali po wali peyu, usu naibao. Eno te dagego wąį nǫų augwaliba te wiegi yai tǫ me deli mawaibao po wali, te ili hauwa elalubo tǫ da,” wali. Tama megi dage te tǫde bidibao.’ ” Genuai Bidigo po walio, tialima, eno te tiwai po wei ponai, “Mu tamao, Genuai Bidi, nago wabo po gilama tama tiagameo.”
6 Tialima, Genuai Bidigo enabolo te tama po wali, “Nage te Juda dabego taun dabeba pelama, me te Jerusalem sunumi tulumage dabeba pelama, eno te tigidali po pususu pao. Eno po e tama dao. Dage we bidi dabe, te eno dąų wali bomo yai po odama, wali piąo,” te po wai. 7 “Te eno duga wąį nǫų dabe te Isipde selama, odasa asali sogo, eno augwaliba bomai po mayu, te tiwai po wali, te eno po augwaligo wali pao wali. Te sesemane sogo eno te tobage deli po naga dagego hani dabeba udali, te megi e sogoba usu nagasobao. 8 Tiali goli, wąį nǫų dabego te po odama, wali me pabeo. Menio. Augwa te dwai homu kolesaga naga elaludu, te augwa hagoma elama, augwa homu kolesaga wali naga pali. Eno augwaliba te dąų wali bomo yai po wali piąo wali, tiali goli, augwa hagela homu yali. Tialima, eno augwaliba te dene mabo sę yali, te dąų wali bomo yai pode wali gilama te tama tiai dao,” wali.
9 Te Genuai Bidigo po enaba ma weyu, te tiwai po wali, “Te Juda dabego me, Jerusalemgo me, te Genuai Bidi, eno po sela sąyabo po mia sai yalio. 10 Augwaligo ena tagalama, te augwa wąį nǫų dabego dwai kolesaga wali ma pobao. Te augwaligo eno po sela sąyu, te augwa wąį nǫų dabego yali tiwai ebao. Te Israel hani me, Juda hanigo me, te tibo godiba lotu weyu, tama eno augwa wąį nǫų dabe dali dąų wali bomo yai po te bolobo dao. 11 Tama tibaso, ena Genuai Bidigo, eno po dolo tama obao, te eno augwali dwagilama mu dolaibao, te sę augwaliba ebo me ela soagobeo. Te augwaligo enaba i weyu, tau somainu yaibao, tiali goli, eno augwaligo i wabo me odogobeo. 12 Te Jerusalem dabe me te gasa Juda bage te augwa wiegi yai denami hano holobo ofa ebo tibo godiba paibao. Tama augwa te god dabeba i waibao, tialima, te god dabego augwaliba te dwai sę ebo sogo ebo side tau sainu ebaso, usu me egobe dao,” wali.
13 “Tegoba! Dage Judago, te dagego tibo godigo namba dabe te dagego taun dabego namba tobage tiwai elalubao. Te dagego wiegi yai denami yabo ofa te Balba yabo alta hauwa nigibao, te hale ebo god dao. Te alta dabego namba te Jerusalem sunumi dabego namba tiwai si elalubao. 14 Jeremaia, te we bidi dabe te dwai sęgo gegebaso, te augwaligo enaba i weyu, te eno augwali tau sao po waibao. Tialima, te eno augwaligo i wabo me odogobeo. Tama te augwali tau somainu te nago gedu haluasa po enabolo me olamuo. Te nago gela me weyu, te enaba bomonama i weyu, te eno augwaligo sęgę silao po me olamu dao,” te po wai.
15 “Dage eno we bidi dabe, eno dage godolo homu
mu ebao.
Tiali goli, duga te tobage dwai kolesaga ebao.
Tialima, magi baso dage te eno beba pabo dawe?
Dagego te kibu hasa dabe enaba ofa yainu sela pali,
te dagego homude te ebo ofago te dage tau siyu,
te dwai sogo ebo dagede ela somaina homu eyu
tebao.
Tiali goli, te menio.
Te dwai sogo dageba pedelaibao.
Te dage wiegi yai pemene yaibao homu eyu eba, agawe?
16 Polobadu eno te po wali, dage Israel dabe
te wiegi yai du walobo ni oliv me deli tiwai elalubao,
wali.
Tiali goli, megi da, eno dage dolaibao,
te dagalude bomonama kulukulu weyu,
te be sele eyu, te ni oliv doliyu, te siago dabo
tiwai elama, te nologo togwa pabo tiwai yaibao.
17 Ena Tigidali Bomo Elalubo Genuai Bidi dao,
eno te ni bulali,
tialima, megi eno te po obao, aga dolomainao.
Dage Israel hani dabe me Juda hanigo te god Balba
lotu weyu, te wiegi yai denami ebo ofa me ebao.
Dagego te dwai kolesagago te ena haliga sębę dwai mu
ilibo dao,” wali.
Te bidi dabego Jeremaia ela muainu yai
18 Ena Jeremaia, eno gedu haluasa po e tiwai wali, “Genuai Bidio, te bidi mebago enaba dwai sę yainu ebao, te augwaligo ena dali te sę yainogo ebaso, te enabolo nago te po pusali dao. 19 Hasia eno te sę yabo konesiąwai. Ena te sipsip wai me deli tiwai te bidi dabego selasa pelama, ena eligi pabo tiwai yaibao. Te bidi dabego te tiwai po mia salio,
‘Tegobao, dago megi tama ela muinao,
te bidigo te ni du walobadi togobo tiwai yaibao.
Dago aga mu silama, te bidi dabego aga homu kone
ma egobeo.’
Augwaligo tama po wali,
20 tiali goli, nage Tigidali Bomo Elalubo Genuai Bidi
dao,
nago te we bidi dabego haliga me homu kolesaga
dagalobo dao, te nago po tų dolo mu ebo dao.
Eno te sęgę nago nogoba mubao,
te eno homugo nago te bidi dabeba
dwai sę ebo dene mabo sueibao,” te po wali.
21 Te Anatot bidi dabego ena ela muaiba olama, enaba te tiwai po wali, “Nago te Genuai Bidigo nogide te profet po wagio,” wali. “Nago te tobage po obaso da, te dago nage ela mueibao,” wali. Tialima, Genuai Bidigo eno gedu haluasa po wali odama, agai enabolo te tiwai po wali, 22 “Ena Genuai Bidi Tigidali Bomo Elalubao, eno po dolo obao, eno te Anatot hani bidi dabeba dwai sę mu yaibao. Eno te boi bidi dabe tagala palama, te ogwa bidi dabe ela mumainu yaibao. Tama te sogo te Anatot dabe te nai menia selama, te augwa wai dabe isila paibao,” te po wali. 23 “Eno te Anatot dabe dolabo sogo bodolu muai. Eno te tama tebo sogo, te augwali deli me bidigobeo. Menio. Tigidali isaibao,” te po wai dao.