55
Godigo aga we bidi wiegi yai ilainu yali po
1 Genuai Bidigo te po wai,
“Tega, dage te ąį nogonego sabo we bidi dabe,
dage enaba aselama, dage wę tuagasao.
Dage te mone meni yani hani dabe, dage enaba aselama,
te dage nai sela tuagasao,
te aselama te ąį wain
me hasa bulmakaugo ame pę ąį sagasao,
te monego me abeligobeo. * Ped 21:6; 22:17
2 Magi baso dagego te duga mone
te dage tau sisąyabo nai dabede odolali silama,
te dage nai sili bidaiwe?
Magi baso dagego te tubo nai sabo sę dene elama,
tama tede sabo monego magi baso
te dwai olo nai naga abelebo dawe?
Te eno poba bugagia olo muao,
te eno wabo po tiwai gilama yao,
te dagede eno mabo haniani nai mu pągąnalueibao.
Awe, dagego homugo tede wiegi yai pemene mu yaibao.”
3 “Odao, dage eno we bidi dabe dao.
Dage bugagia bidimainu eyu, enaba asiąo.
Te eno dage dali bomo yai po dąų walama,
tama te dąų wali bomai po sesemane elalueibao.
Te sesemane sogo eno dage godolo homu mu elama,
te dageba wiegi yai sę yaibao.
Te polobadu eno te bomo yai po te king Devitba
dąų wali tiwai gilama yaibao wali. * Tpi 13:34
4 Konea sao, eno aga genuai bidi pedalumainu ilama,
te agai gasa bulu tǫ kantri tonalumainu yai.
Te agade, te eno bomo augwaliba ola mawai dao.
5 Mu tama, te dagego polobadu konesiąwai te bulu tǫ
kantri we bidi dabe augwali i wabo sogo,
te augwaligo me dage me konesiąwai,
te augwali dageba polo udada asaibao.
Magi baso meni, ena Genuai Bidi, dage Israelgo God,
ena te Wiegi Yai Doloba Pai Kolesaga Mu Ebo God,
eno dage te genuai nogi dali bomo dali si
mu elalumainu ebao,” Genuai Bidigo te po wali.
6 Megi da, Genuai Bidi te dage pąde bidiyu, dage
tonalubao,
tama megi sogo te dagego agaba gedu haluasa po
weyu, te aga pąba pabo sogo dao.
7 Te dwai kolesaga ebo we bidi dabego
te augwa ebo dwai kolesaga tagalama,
tama augwa te kolesaga me yabo
homu kone me paligio.
Te augwali augwa Genuai Bidiba ma asiąo.
Agai te agaba ma asobo bidi dabeba
te olo mu tau mabo wiegi yai
kolesaga umabo mu yaibao.
Awe, Godigo augwaligo dwai sęgę
tigidali mu sela sąwaibao.
8 Genuai Bidigo te po wai,
“Eno homu kolesaga te dagego homu
kolesaga tiwai elalubeo.
Te eno kolesaga te dagego kolesaga tiwai meni,
te gasa tedali mu elalubo dao.
9 Te tǫ aiyadu elalubode te dagalu ugwadu mu elalubao,
te tiwai naga te eno homu de eno homu kolesagago
te dagego kolesaga me homu kolesaga te aiyaba mu
elaluai dao.”
10 “Te dagaludu tulubo tulubage, aga odolali
te dagaluba ugwaba ma hologobeo. Menio.
Agai te tǫba ąį mayu, te gide nai holomainogo elama,
te bidi dabego saibao.
Me badu augwa tuyu, me badu wai selama,
ma buluyu ebo dao. * 2 Ko 9:10
11 Te tiwai naga eno po me te enaba
odolali ma asogobeo. Menio.
Agai te eno wali po tiwai gilama pedelaibao.
Te agai eno homugo pedalumainogo homu yali sę
pedalubo dao.”
12 “Te dage wiegi yai pemene elama,
Babilon taga somainu elama, te dage eno odasa
asiyu,
te dage wi ilabo magi sę deli me pedalugobeo.
Te bulu du dabego wiegi yai pemene ebo tęąbi po weyu,
te ni dabego pemene homu elama,
augwa nogo elaibao.
13 Te ni wuli dabe te megi dwai ni dabe
elalubo madi pedelaibao.
Te gasa sawi yai dwasianu ni dabe
te megi sesane bono elalubo pesagede pedelaibao.
Tama sesemane sogo te tobage ni dabe te pesagede
pedelama,
te sesemane sogo te dąį ilali tiwai
te we bidi dabego sulama,
te Genuai Bidi, eno yali bomai sę homu kone
palomainu yaibao,” wali.