3
Jerusalem bulu we bidi bidibo page dwaibao
1 Odao. Tamadi tama God, Tigidali Bomo Elalubo
Bidigo
te we bidi dabe ugwaba sagualu
tonalubo nai dabe sela sąwaibao.
Te Jerusalem me Juda bulu we bidi dabe
bidibo wiegi yai ilibo nai dabe,
te agai tigidali nai me, wę me, sese silaibao.
2 Agai te hwįbo bomai bidi dabe,
me olo ami bidi dabe, me po tų odobo bidi dabe,
me profet bidi dabe, me sogo yesi bidi dabe,
me hanude genuai bidi dabe, agai sela sąwaibao.
3 Tama me, agai te ami ofisa,
me gavman ofisa bidi dabe,
me tuni bidibolo wiegi yai kolesaga
mabo bidi dabe me, agai sela sąwaibao.
Tama me, agai te bidi dabe haniani
nai dabe nigibo koneai bidi dabe me
agai sela sąwaibao, me te bidi dabe te haniani sogo
yesi pobi koneai bidi dabe me, agai sela sąwaibao.
4 Tama Genuai Bidigo te olo ogwa dabe
te Juda bulu me Jerusalem bulude
genuai bidi dabe nigimainu sula tagalaibao.
Awe, te wai dabe augwa homugo digi
te bulu tonaluaibao.
Tama haniani kolesaga dabe yaibao.
5 Te tigidali bidi dabego aga hasi me
aiyaba elaluainu sę bomo yaibao.
Te gesi ogomani wegi manigo
te augwa bolo monu dabego
po obaso, sela sąnama, dagą waibao.
Tama dwai kolesaga homu pągąna pai bidi dabego
te dwagi yai homu kolesaga yai
bidi dabego po sela sąwaibao.
6 Tama te sogo bidi dabe augwali
augwa ama mu deli me bidibo digi pelama,
tama agabolo te po waibao,
“Nago deli naga te gudabo ugwa te elalubao.
Te nage dago genuai bidi nigilama,
tama da e dwai sogo nago tau sao,” waibao.
7 Tiali goli, agai te po waibao,
“Eno dage tau sabo sunumi menio.
Ena me ena nai me ugwa menio.
Dagego ena dagego genuai bidi nigimainu dagego
ena sa mugimio,” te po waibao.
8 Jerusalem de Juda si te dwai sogoba
sabolama, tulalubo gagalali.
Magi baso meni. Augwaligo tigidali pogo me, sęgo me,
augwaligo Genuai Bidigo nogi aiyaba elalubo dao.
Augwaligo te dwai kolesaga agai gedude ma ebo dao.
9 Te po tų odobode augwaligo augwa
godolo ebo bidi dabe naga tau sabo dao,
tama gasa bidi dabe aiyaba elalubo dao.
Tama te kolesagago augwa digi augwa
ma po tų ela mabo dao.
Augwali te we bidi dabego gedude
dwai sę ebode augwali hale me ebeo,
te Sodom bagego polobadu yali gilama.
Augwali dolaibao. Augwa dagede augwa dolaibao.
10 Te dwagi yai doloba pai kolesaga ebo we bidibolo
te dwagi yai homu yao po walao.
Magi baso meni, augwali dwagi yai
pe saibao, augwa yali dwagi yai sęde.
11 Tiali goli, dwai bidi dabe da, dolaibao.
Augwali te dwai pe te augwa yali dwai sęde saibao.
12 Hobede mu da, dage eno we bidi dabe.
Te gesi we bidigo dage te tonalubao.
Te tobolu bidi dabego dage halubaso,
tama dagego augwaligo dwai
sunumidu dage wali te pobao.
13 Genuai Bidigo tigidali we bidigo
po tų odainu no sealuba.
14 Agai aga we bidi dabego tobolu bidi
me genuai bidi dabe po tų ela mani.
Tama agai te po wali, “Te we bidi dabe
te eno wain gi tiwai dao.
Tiali goli, dage da, dagego tama te gi dolama,
tama te gide elaluali nai dabe dagego wi salio.
Dagego bidi nai dabe habuge yai
bidi dabe dagego hobede ebo menio.
Mu menio. Dagego augwaligo
dwasianu nai dabe kegelama,
tama duga bede pesage holobo dao.
15 Dego dagebolo obaso, dagego eno we bidi agalama,
tama nai meni yai bidi dabe dolaliwe?
Ena Genuai Tigidali Bomo Elalubo Bidi,
eno dagebolo dolo obao.
Dagego dwai kolesaga mu yali.”
Te Jerusalemde dwai kolesaga ebo we dabe dwai dene saibao
16 Genuai Bidigo te po wali,
“Jerusalem we dabe, suiąo.
Augwaligo homugo augwali dwagi yai
mu dao homu eyu, hagoma homu ebao.
Te augwali bilibo sogo, augwaligo augwa sągą aulama,
tama augwa sągąde hǫą omainu ebo dao.
Augwaligo augwa tobolu sagolama,
augwa dogoni dodolobo dao.
Tama augwaligo gedu subigila bidi gedu tonobo dao.
17 Tama tibaso, ena Genuai Bidi eno
te Saion hanu we dabe dene mawaibao.
Eno augwaligo tobolude keni pągąna pomainu yaibao.
Tama augwaligo tobolu nisi ma menia saibao,” wali.
18-19 Tama te sogo Genuai Bidigo te Jerusalem we dabego dwagi yai aubo nai dabe sela sąwaibao. Agai te sągąde, me nogode, me dogonide, me olode aubo nai dabe agai sela sąwaibao. Me te tobolu aubo nai dabe me, me te tobolu halubo ugwa dage dabe me sela sąwaibao. 20 Agai te tobolu nisi dųbo mǫ, me tobolu nisi tomagebo name ugwa, me te ugwa pedai te kukulu gudubo ąǫ ebo nai, me te dwasianu paus augwaligo sanda wel me te pobi nai dabe te dogonide kebo nai agai sela sąwaibao. 21 Agai te nogo danide me gunide mubo ring agai sela sąwaibao. 22-23 Agai te sawi yai ugwa dabe sela sąyu, me agai augwaligo haniani dwagi yai ugwa dabego nigai gudubo ugwa dabe me, paus dabe me, hankasip dabe me, agai sela sąwaibao.
24 Tama te sogo te Jerusalem
we dabego polobadu auwali tiai me egobeo.
Te augwaligo sanda wel meniama,
tama augwaligo tigi kugumini dwai mu yaibao.
Te augwaligo sawi yai ugwa me,
ugwa name me augwaligo kukulu
gudabo ugwa name menia saibao.
Tama tibaso, augwali dwai ugwa dabe gudama,
tama dwai bonogo augwaligo ugwa dąų walaibao,
te bono te kukulu gudubo ąǫ yaibao.
Te augwaligo augwa tobolu au me
iligobeo. Magi baso meni.
Te boi bidi dabego augwaligo tobolu nisi
sese poala sąnama,
tama augwaligo tobolu wane yaibao.
Tama me augwaligo sawi gesabidide da,
te boi bidi dabego kalabus bagego
magi augwaligo gesabidide togaibao.
25 Jerusalem, boi bidi dabego nago
bomai ami bidi dabe hwįbode ela muaibao,
me gasa olo bidi dabe ela silaibao.
26 Tama augwaligo nago nai tigidali saibao.
Nage te we me augwaligo agai ugwa
dabe sese sela sąwai tiwai yaibao.
Tama aga tǫde habu olo dulalubo tiwai yaibao.
Tama te obo sunumi dabego te nai dabe
nage tigide pedalobo sulama,
tama augwali hobede elama, gela waibao.