1 Te e lista te deli deli hanigo polalubo bidi dabego nogi elalubo lista dao. Te da te ena Esra dali Babilonde bidama, ena dali Jerusalemba ma pali bage, te Artaserksis king bidali sogo dao. Te bagego nogi e dao. 2-3 Gersom, te Finiasgo hani, tama Daniel, te Itamargo hani, tama Hatus, te Sekaniago ogwa te Devitgo hani da, tama Sekaraia, te Parosgo hani bidi da. Tama aga hani te 150 bidi te Sekaraia dali palio. Augwaligo te augwa wąį nǫų dabego nogi asęani elalubo buku me deli te augwa tolaluai dao. 4 Tama Elioenai, te Serahiago ogwa, te Pahatmoap hani bidi da. Tama aga hani te 200 bidi aga dali pai dao. 5 Tama Sekaniai, te Jahasielgo ogwa te Satu hani bidi da. Tama aga hani bidi te 300 bidi te aga dali pali. 6 Tama Ebet, te Jonatango ogwa, te Adin hani bidi. Tama te 50 bidi hani aga dali pai dao. 7 Tama Jesaia, te Ataliago ogwa, te Elam hani bidi da. Tama aga dali te 70 bidi hani pai. 8 Tama Sebadaia, te Maikelgo ogwa, te Sefatia hani da. Tama aga dali te 80 bidi hani pai dao. 9 Tama Obadia, te Jehielgo ogwa, te Joap hani bidi da. Tama te 218 hani bidi te aga dali palio. 10 Tama Selomit, te Josifiago ogwa te Bani hani bidi dao. Tama 160 bidi dabe te aga dali pai dao. 11 Tama Sekaraia, te Bebaigo ogwa te Bebai hani bidi dao. Tama te 28 hani bidi aga dali palio. 12 Tama Johanan, te Hakatango ogwa te Asgat bidi hani da. Tama 110 aga hani bidi aga dali palio. 13 Tama Elifelet, me Juel, me Semaia, te Adonikam hani bidi dao. Tama te bidi sese sela, te 60 hani bidi te bidi sela dali pepelawalio. Tiali goli, augwali te sogo da dali asobeo, augwali te nosali asai dao. 14 Tama Utai me Sakur te Bikvai hani bidi da. Tama te Bikvaigo hani bidi 70 te augwali si dali palio.

15 Ena Esra, eno te bidi hani tigidali te taun Ahavaba aiya dulubo genuai wę gamia sesegeba sisinama, tama dago bidibo pesage nigilama, tama tede sela sogo bidai. Tama hanide te pris bidi meba bidibo eno suali, tiali goli, te Livai hani me deli elalubo me subeo. 16 Tama tialima, eno te polalubo bidi dabe te a naga olama, me si me si te asa olama i wali. Augwa nogi e tiwai dao, Elieser, me Ariel, me Semaia, me Elnatan, Jarip, tama te gasa Elnatan, me Natan, me Sekaraia, me Mesulam. Tama eno te wiegi yai homu kolesaga koneai bidi si me asomainu i walio. Augwali si nogi te Joiarip me Elnatan dao. 17 Tama eno augwali tagala palali, te augwali Ido sugi pao wali, aga te Godigo bede sę ebo hani bidi me deli da, tama te bulu tobolu bidi te Kasifia bidai. Tama eno augwaliba weyu, te agaba me te aga dali deli sę ebo bageba hanalu wao po wali, te bidi meba da dali te Godigo bede sę emainu tagala palao po hanalu wao po wai dao. 18 Godigo dabolo te olo mu tau mabo wiegi yai kolesaga eyu, tama tialima, agai te Livai me deli tagala palali. Aga nogi te Serebia, te Mali hani dao. Aga te wiegi yai sę ebo bidi da. Tama aga te ogwa dabe me, aga ama dede dali, te 18 bidi te tigidali augwali te aga dali asali. 19 Tama Idogo te Hasabia me Jesaia te Merari hani dali, te augwa si deli kaneme bidi te bidi sese deli, te 20 bidi tagala palai dao. 20 Tama agai te Godigo tempel bede sę yabo sę bidi hanide me te 220 bidi tagala palali. Polobadu te king Devit dali, aga ofisa dabego dali, te hani wąį nǫų dabe sę bidigo te Livai dabe tau somainu nogo tų ilama, sa muai. Tama te 220 sę bidigo nogi asęani te buku me delide elaluai dao.

21 Da te wę Ahava pąde bidalu, tama te tigidali sę bidibolo eno te tiwai po wai, “Dago te nai habu selama, tama dena God gedude dena digi aiyaba elaluinao,” po wai. “Tama dago agabolo hanalu, te da tau somainu eyu, tama da me te dago wai dabe tonalumainu eyu, te dago doado bage dabe dali, te da Jerusalemba pabo sogode me tonalumainu ebo dao,” wai. 22 Eno te tama po augwaliba wai, magi baso meni, eno te kingba hanalu obaso, te tǫdu asobo ami bidi dabe me te hosdu dualasa asobo ami bidi dabe, te da dali asiyu, te da sunumidu asobadi, te tonalua asidali weyu te eno kingba hanalubo te ena hagela ebao wali. Te ena king dali bidali sogo, eno agabolo te tiwai po walali, “Dago Godigo te aga wali pabo we bidi tigidali te bugagia tonalubo dao,” wali. “Tiali goli, agai te aga tudiba mubo we bidi tigidaliba te haliga sębę eyu, tama agai dwai dene te augwaliba mawaibao.” Eno te tama po kingba wali, tama eno agaba te ami hani dabe po hanalubo te ena hale yali. 23 Tialima, dago te osogo nai gisilama tama gedu haluasa po bomo elama, Godiba weyu, te agai da te sunumidu pabo tonalumainu emainao, tama agai dago te gedu haluasa po wali odolama, tama agai da bugagia tonaluali.

24 Eno te Serebia, me Hasabia, me tama te gasa nogo si te pris tonalubo bidi dabe te augwali asiąo olama, i wai. 25 King dali, te agaba wiegi yai homu kolesaga mabo bidi dabe me, te aga ofisa dabe me, te Israel we bidigo dali, te Godigo bede sę yabo te wiegi yai nai dabe mawai. Tama eno te nai dabe selama, te dobolama, tama te pris dabeba menama, tonalumainogo yai dao. 26 Te eno augwaliba mani nai dabego sęgę e tiwai yai. Silvago sęgę te 22,000 kilogram, tama golgo sęgę te 3,400 kilogram, tama te 100 dis pou silva, te augwaligo te sęgę 34 kilogram teba usu nai dao. 27 Tama te gol dis pou bidi sese deli 20 elaluai, te augwaligo sęgę usu nama te 8 kilogram me 400 gram, tama te bras dis pou si elaluali, augwaligo te wiegi yai mu nigai, tama te nai sigo mone te gol dis pou sigo mone sabo tiwai ususi pedelali. 28 Eno te nai dabe te nogo si olama, sągągo si pris dabebolo mayu, tama eno augwaliba te po wai, “Odao. Dage da, te tedali gasagi yai bidi dabe da, te Godigo sę ebo bidi dabe, te dena wąį nǫų dabego Genuai Bidi dao. Tama te dis pou dabe me te Genuai Bidigo nai mu da. Tama te gol me silva te augwaligo augwa homu wali peyu, Genuai Bidiba te olo mabo nai mu dao. 29 Te nai dabe te bugagia tonalua peyu, te dage Godigo beba sabaligi paboba usu nigi piąo. Tama dage sabaligi pabo sogo da, dagego te tigidali gol me silva me tigidali dis pou ma dodolama, te pris dabego polalubo bidi dabeba, me Livai dabebolo te Israel tobolu bidi te Jerusalemde bidibo bidi dabeba maiąo,” po wai dao. 30 Eno po wali dao, tialima te pris dabe me Livai dabego te tigidali silva me gol me dis pou salio, te da dali dago te Jerusalemba da pabo sogo selasa painu yai dao.

31 Tialima, te namba wan polua, dei 12, tede dago te wę Ahava tagalama, tama te Jerusalemba pabo sunumi wali palio. Tama God da dali bidiyu, tama da bugagia tonaluai. Tama tialima, te boi bidi dabego daba hwįagasu me ebe, tama te nai wi sabo bidi dabe te sunumi pąba geme me duala sagaselama, te daba samonagaselama tama te dago doado bage wi me sagasobeo. 32 Da digibulu mu pelama, tama nosali te Jerusalemba sabolama, tama da sela sogo toma neyu bidai dao. 33 Tama te dei namba 4 tede dago te silva me gol me dis pou me tigidali selama, tama te Godigo beba selasa pelama, tama te nai dabego sęgę dagalali. Dagala silama da, teda dago te nai tigidali te pris Meremotbolo mawai, te Uriago ogwa dali, te pris Eleasar, te Finiasgo ogwabolo manio, tama te Livai sibolo me, Josabat, te Jesuago ogwabolo, me te Noadia, te Binuigo ogwa, te tama bidi dabeba te nai dabe mawai dao. 34 Tialima, augwaligo te tigidali nai nedelama, tama bugagia dagalama, tama tigidali nai munaluali. Tama augwaligo te namba me te nai augwaligo sęgę dabe te buku me delide asęani. 35 Te hani bidi dabego te Babilon tagalama, te Jerusalemba ma soali sogo da, teda augwaligo te kibu hasa dabe meba selama, tama te Godiba ofa yainu sela pali, te Israel dago Genuai Bidi dao. Augwaligo te nogo si olama, sągągo si omai bulmakau te Israel 12 hani sa muyu, te ofa ilali, tama augwaligo te 96 omai kibu sipsip, me 77 sipsip kibu wai, te tama ofa yali. Tama augwaligo te augwa sęgę sela sąyu, te 12 meme omai te ofa yainu sela palio. Te tigidali kibu dabe te ofa eyu, te siaba tigidali ulabo nai dao. 36 Tama eno te kingo enabolo mani pas te selama, tama eno te polalubo gavmanba me te wę Yufretis e badu tǫ pedaide bidibo te gasa ofisa dabeba me, te pas tolali. Augwaligo te pas selama, teda augwaligo daba wiegi yai homu bugagia eyu, tama te Godigo be sę ebo tau salio.