1 Godigo te po wai, 2 “Ena digi ena Genuai Bidi Yawe, ena dagego God dao. Eno dage Isipde sali, te bulude kalabus sę ebadi, tama eno dage selama, odasa asai.”

3 “Nago ena deli naga wali asao. Nago te tibo god me wali pelamo dao.”

4 “Nago tibo god me nigigio, tama nago te dagalude me, te tǫde me, ma te wę tomode elalubo naigo me, te tǫ dologode elalubo naigo te gasa nai piksa noma me deli munu me nigilamo dao. 5 Nago te tibo godiba, me te noma bidiba kidu sugunama, lotu me wagimio, magi basowe, ena Genuai Bidi Yawe te ena nago God, tama ena te tibo godigo hasegelemainogo ebo usu me egobeo. Mu menio. Tede eno hagela homu mu ebo dao. Tama ena hagela mu homu ebo we bidi dabe, augwaligo te naide magi sę yai elalubaso, te eno augwali dene iliyu, tama augwaligo wai hani sela, me me si me si nosali pedelabo hani, augwalibolo me te mabo dene tiwai ilaibao. * Sai 34:17; Prs 19:4; 26:1; Bom 4:15-18; 27:15 6 Tiali goli, ena godolo homu elama, tama eno bomai po tigidali wali pabo we bidi bidibaso, teda eno augwali me godolo eyu, te augwaligo wai dabe hauwa 1,000 mu nosali pedalobo hani me, te eno augwali dali wiegi yai homu eyu, augwali eno godolo mu yaibao, tama te kolesaga ebo siligobeo.” * Sai 34:6-7; Nam 14:18; Bom 7:9-10

7 “Nago eno nogi God dwai odolali nogi egio, te nago Genuai Bidi dao. Magi baso meni, ena nogi olo nogi ebo we bidi te eno augwali dene ilaibao.” * Prs 19:12

8 “Nago te Sabat side bugagia homugo koneama, te eno bodolu muani side dao. Te side te gasagi yai tedali elalumainao. * Sai 16:23-30; 31:12-14 9 Nago te Sarere deli tomode te sę ebo side te nogo a naga olama me badu nogo kibisa deli, te tama sogo sę ebo si elalubao. 10 Tialima, te a naga olama me badu nogo si wali, te me deli sogo te nago Genuai Bidi, God eno side dao. Te olo bidibo Sabat side nago sę me igio, tama nago ogwa dabe me, wegi dabe me, sę ebo we bidi dabe me, te nago sę ebo kibu dabe me, te nage dali bidibo gasa bulu tǫ bidi dabe me, dage tigidaligo te side sę me igimio. * Sai 23:12; 31:15; 34:21; 35:2; Prs 23:3 11 Nago te tama tiao, te magi baso meni, te a naga olama me badu nogo kibisa deli sogo naga Genuai Bidi eno te tǫ dagalu, me te tamu ąį, me te tigidali elalubo nai nigai. Tiali goli, te a naga olama me badu nogo si wali, te me deli sogo eno olo bidiyu, toma tuai dao. Tama tibaso, Genuai Bidi eno te Sabat side te gasagi yai side te me tedali mu ilai. Tama te side te eno bodolu dolo mu dao.” * Gag 2:1-3; Sai 31:17

12 “Nago naga aya ida dologode bidama, tama augwaligo po wali pao. Nago tama tiyu da, te nage polo me isigobeo. Menio, te nage hauwa sogo te tǫde bidimainogo te God eno nago Genuai Bidi eno nage mawainogo homu ebo tǫde bidagameo.” * [Bom 27:16; Mat 15:4; 19:19; Mk 7:10; 10:19; Lu 18:20; Ef 6:2, 3]

13 “Nago we bidi ela mugio.” † [Gag 9:6; Prs 24:17; Mat 5:21; 19:18; Mk 10:19; Lu 18:20; Ro 13:9; Je 2:11]

14 “Nago bidigo sai we dali, me ma te we sai bidi dali, me dwai sę me igio.” ‡ [Prs 20:10; Mat 5:27; 19:18; Mk 10:19; Lu 18:20; Ro 13:9; Je 2:11]

15 “Nago nai wi sigio.” § [Prs 20:10; Mat 5:27; 19:18; Mk 10:19; Lu 18:20; Ro 13:9; Je 2:11] [Prs 19:11; Mat 19:18; Mk 10:19; Lu 18:20; Ro 13:9]

16 “Nago tibo po olama, tama gasa we bidi olo po tų ela magio.” ** [Sai 23:1; Mat 19:18; Mk 10:19; Lu 18:20]

17 “Nago gasa bidigo be sulama, pesą eyu, godolo igio. Tama nago gasa bidigo we dali gedu igio. Tama aga sę ebo bidi, me te sę ebo we, me te bulmakau, me bidi duabo donki, me te agai tigidali gasa nai dabe me, te nago godolo eyu, sabo homu me igio.” * Rom 7:7; 13:9

18 Te we bidi augwaligo te pǫ kulukulu wabo, me te bu wabo nai biugel gela wabo me odai. Tama augwaligo te be sele te pǫ ula ebo ugwaba peyu, eda asiyu eyu, tama genuai hano te bulu dude pedalobo sulama, tama augwali wi mu yai. Tama augwali kilasa ma pelama, te bulu du digibulu gana dolalugi pai. 19 Tama augwaligo Mosesbolo te po wai, “Nago digi te po dabolo wabo, te dago te po odaibao. Tiyu Godigo po dabolo wabo si, te da isidalio,” wali. * Hib 12:18-19

20 Tama Mosesgo augwalibolo te po wai, “Dage wibo, tagalao. Godigo dage usu naga sagasiyu asali, te dage aga dologoba pelama bidiyu, tama dagego dwai sę ma idali weyu, tiwai sę yai.”

21 Tiali goli, te we bidi dabe augwali digibulu digi dolalubadi, Moses agaduba deli naga te genuai husugu yai pǫ pąba, te God bidibo digi pai.

22 Tama Genuai Bidigo po Mosesbolo olama, tama agai te Israel dabe augwalibolo te po omainogo yai. Tama Genuai Bidigo te po wai, “Dagego koneani te tiwai, te ena dagalude bidiyu, te eno po dage dali miai dao. 23 Odiąo, dagego te tibo god dabe te gol me silvago nigilama, tama te nai dabeba lotu po me wagio. Dagego ena delibolo naga lotu po wao. 24 Tama dagego tǫ meba selama, tama eno alta nigao. Tama te altade dagego te sipsip dabe me, bulmakau me, te tigidali siaba ulama, siago dabo te ofa dali, te we bidi augwaligo ena dali dedeli homu yabo te ofa me yao. Tama dagego te tigidali bulude te dagego enabolo lotu omainogo, eno te sa mubo bulude dagego tama tibaso da, te ena aselama, dage bugagia wiegi yai mu ilaibao. 25 Dagego masigigo te alta me deli nigiyu da, teda dagego te bidigo togwali masigi sigio. Magi baso meni, dagego te sę yai ain tulgo te masigi togoyu da, tama te tiwai masigigo eno sę ebo te dolo egobeo. * Bom 27:5-7; Jos 8:31 26 Tama dagego te ugwadu daide te alta nigigio, te dagego ofa yainogo ugwaba holabo togobili nigigio. Tiyu yaide, dage te togobilidu ugwaba holobadi, tama augwaligo dagego hale hanialubo suidalio,” te po wai.