1 Te Festus agai Pol dali, gasa kalabus bidi dabe dali te Itali tǫba moni gebadu pabo po dodolali, te Sisar pageba pomainu yali. Tama gavman tobolu bidi me badu augwaligo bidi me deli dąį ilali, te bidi nogi Julius da, augwali tonaluabo bidi dąį ilali. Te bidi Julius agai te ami enesigi bidi a naga bidi nogo sągą sese silama, tonalubo tobolu bidi da. Tama aga te umabo ami enesigi bidi hani me deli tomode bidibo bidi da, te hani nogi ‘Rom gavman moni tobolu bidigo enesigi bidi hani da.’ 2 Tama da moni geba me deli tomoba pali, te geba Esia tǫ nabisde elalubo bulu tigidali bilibo geba da. Te geba page bidi aga bulu nogi Adramitium be nani da, te Esia tǫde. Tama te bidi me nogi Aristarkus aga da dali asali. Agai page bulu nogi Tesalonaika, te Masedonia provins tǫde. Tama da te Sisaria bulu taga pali, te moni gebadu, te tamu ąį daide pali. 3 Tama pelama, do kigamu geba tuagasabo pesageba sabolali, te bulu nogi Saidon. Te ami tobolu bidi Julius agai Polbolo dwagi yai kolesaga yali. Agai Pol tagala palama, Pol aga abagi dabe sugi pelama, augwaligo agabolo tubo nai dabe mani. 4 Tama nosali dago te Saidon bulu tagalama, ma pelama, te moni bomai wali da pabo guni badu asobaso, dago geba guni tubo bidigo te tamu ąį tomode dwasianu bulu elalubo, te bulu nogi Saiprus, teba guni dodolali. Te tǫ pąde moni wali meni yai. 5 Tama te Saiprus tǫ ela soali, da te moni tamu ąį tomodu pali, te gebadu. Pelama, te bulu si ela pali, te nabis sesegede, te bulu si nogi me Silisia tǫ, me Pamfilia tǫ da. Tama te nabis sesegede bulu meba sabolali, te be nani nogi Maira, te Lisia tǫde, tama dago geba tede gebelali. 6 Tama tede dago te geba tagalama, te da tonalubo amigo geba me kegegi suali. Te geba te Aleksandria bulu bidigo geba, augwaligo Romba pai hagede ebo suali. Tama te ami bidi dabe augwaligo da te gebadu selasa pali.

7 Te moni geba mudu da Maira tagalama, ma pelama, dua dua tama pali. Magi basowe? Moni bomai waligo da bomonama sela sąbaso. Tama da hauwa sogonu tamu ąįdu bilali, te Nidas buluba polo sabalobeo. Tialima, te waligo naga dago pabo tų ma sinia sali. Tama da te tamu ąį tomode bulu me elalubo, te bulu nogi Krit, te bulu pąba sabolama, tamu ąį sesege badu pali, tede te moni wali meni baso. Tedu pelama, Salmone tǫ dugulidu bobegegi pali. 8 Tama da te moni tamu ąį sesegedu pali, tama te bulu sesegedu pali, te geba guni tubo bidigo moni sę mu elama, geba tubo pesageba tugi pali. Tama augwaligo te ‘dwagi yai geba tubo pesage dao’ nogi wabo dao. Te geba tugi pabo pesage Lasia be nani pąde da.

9 Te da tede olo dali bidibadi, hauwa sogo mu tama bidali. Tama tede bidibadi, tamu ąį bǫį holobo sogo pąde yagasali. Te poluade tama moni wali asobo dao. Te kibu be yabo pąde yagasali, te Juda dabe augwaligo Godibolo nai ula mabo moni lotu wabo sogo silai dao. Godigo augwa dwai kolesaga yai sela sąmainu, te moni nogi elalubo lotu po wabo side dao, te sogo augwa tubo nai osogo gisilai dao. 10 Tama tebo sogo silibaso, te moni wali asobo sogo pąde yagasobaso, Pol agai te bidi dabe tau selama, bobelabo po wali, “Abagi dedeo, da moni gebadu tedu peyu da, te dwali, te da moni waligo geba dolama, da me, walu dabe tigidali me, da tamu ąį tomode dolama, isilaibao,” wali. “Da ede bolo me bidinao,” wali. 11 Tiali goli te sogo augwaligo Polgo wali po odama, te moni geba page bidi me, te moni geba tobolu bidi me, augwali sigo Polgo po sela sąyani. Tama te ami tobolu bidi agai Polgo wali po tagalama, te bidi sigo wali po wali pali. 12 Tama augwaligo umabo po wali, tama bidi dabe me badu augwaligo homugo ‘E bulu taga pelama, gasa bulu dwagi yai geba tugi pabo pesage te bulu Finiks badu pinao,’ wali, ‘Krit tǫba.’ ‘E geba tubo pesagede moni wali asobo sogo bugagia bidigobeo. Tama tibaso, dago geba te Finiks buluba selasa pinao, te dwagi yai geba tubo pesage giliga pabo badu elalubo dao. Te pesagede wali aselama, geba dolobo menio,’ wali. ‘Te moni wali asobo sogo da pelama, te buluba bidigi pinao,’ wali.

13 Te tialima, dwasianu dwagi yai wali me deli te saut badu tamu ąįdu asali, te geba tudi badu. Te geba tomode sę ebo bidi dabe augwaligo homugo ‘E waligo da te Finiks buluba sela paibao,’ homu yali. Tama tibaso, pomai hagede, augwaligo te geba dąų walobo moni sęgę yai ain dili tiwai nai tamu ąį pudu ugwaba guduama, geba daiba munama, tama augwa te bulu pąde tamu ąį sesegedu pali, te bulu nogi Kritba. 14 Tiali goli, tama pelama goli, moni wali mu polo asali, te Krit tǫba pedai badu asali. Augwaligo te tobage moni wali mu nogi ‘te giliga asoboba polobadu pobase nogo pedai badu asobo wali dao,’ nogi wabo da. 15 Tama te wali polo aselama, te geba bomo elama pogolama sabilali. Tama dago te wali asoboba geba guni dodolai hagede, sę bomo yali. Tiali goli, dago usu ebe. Tama te geba te waligo selasa pomai hagede tagalali. 16-17 Tama da te dwasianu bulu me nogi Kauda tǫ pąba asali, te tamu ąį tomode elalubo tǫ. Tama da uba pedai badu te bomai wali meni yai madigi pali. Tama te dwasianu geba moni gebade bono polobadu gebelama, kegasa asobo dao. Tama te moni gebade sę ebo bidi dabe augwaligo homugo ‘Te dwasianu geba hagaidali weyu, dago selama, moni gebaba muinao,’ wali. Tama augwaligo te dwasianu geba kegebo moni sę mu yali. Tama augwaligo te dwasianu geba kegelama, moni geba daiba munama, tama bonogo bugagia kęani. Te kęna silama, tama gasa bono me selama, te bono ąįba sąnama, a dologo badu solama, te bono gąų yai naigo selama, te moni gebade kęani, te geba dilide dąų olama, kęani. Te moni geba bomo te tiwai munama, da ma pali. Te moni gebade sę ebo bidi dabe augwali te waligo geba te Libia buluba pobogolo pobaso, augwali moni wi mu yali. Te nabis bulu dwai nagame yai kemi ebo pesagedu painu ebaso, wi mu yali. Tama tibaso, augwaligo te moni ugwa aiyaba dagala muani, te moni geba waligo naga tamu ąįdu olo dali sabilimainu tagalali. 18 Tama te moni wali mu asiyu, ąį bǫį me kisu mu dela pali. Tama tibaso, do te moni gebade sę ebo bidi dabe augwaligo te walu dabe me badu tama ąįba sąbo gagalali, te geba yadala pomainu yali. 19 Tama te sogo ma te gebade sę ebo bidi augwaligo te gebade muani ni me, te bono me, te nami ugwa me augwaligo nogogo selama, sąyani. 20 Tama da te moni tamu ąįde hauwa sogo bidali, te tulubage me, te pǫ me kisu dali, dago dagalu sube. Tama dago te giliga me, hǫ me hauwa sogo sube, te hǫgo dago bulu te badu elaluba homu ebe. Tama te moni wali agai te moni ąį bǫį hodolali. Tama tibaso, da gisiga bidibe. Dago te homu yali, ‘Da tigidali e gebade tamadi isilaibao,’ homu yali.

21 Te da nai hauwa sogo tube. Tama nosali Pol agai te geba tomode sę ebo bidi augwalibolo i olama, te po wali, “Te bidi hauwa, dagego odao. Dagego eno polobadu wali po sela sąyanio. Dagego eno po odama, te bulu Kritde bidigi sogo da, teda usu egi dao. Tama da e tiwai sę egi menio. Tiali goli duga eno po sela sąyanigo da, nai hauwa bage te hagela silali dao. 22 Tiali goli, megi eno homugo dage dąų walobe dao. Dagego wi elama, moni homu egio. Magu menio. Da bidi da me isigobeo. Tiali goli, te moni geba naga dolaibao,” wali. “Eno koneanio, te po mu dao. Magu menio. 23 Megi piali hulide Godigo enabolo po me olama, todalio. Te God eno agabolo lotu weyu, eno agai sę eyu ebo da. Te Godigo enabolo agai ensel bidi me deli ena pageba tagala palali. 24 Tama agai enabolo tama wali, ‘Pol, nage wi egio. Nage te moni Rom gavman tobolu bidi agai gedude dolalu, naga po wao. Tama odao. God da, te dwagi yai bidi mu dao. Tama tibaso, Godigo nagebolo dwagi yai sę elama, tau selama, tama te moni gebade nage dali bidibo bidi me deli isigobeo,’ te ensel mobo bidigo enabolo tama wali. 25 Tama tilama, abagi, dage noma sigio. Magu menio. Eno homu Godiba mubaso, agai dwagi yai kolesaga dabolo yaibao, tama agai dagalude sę ebo ensel bidigo enabolo te tiwai po wai dao. 26 Tiali goli, te moni geba te tamu ąį tomode elalubo bulude sabalobadi, tede dolaibao,” Pol agai te po wali.

27 Te moni waligo da selasa pelama, te tamu ąį nogi Adria tomode bilibadi, Sarere si silali. Te sogo huli tomode mu, te geba tomode sę ebo bidi dabe augwa homugo bulu me deli pąde elalubo homu yali. 28 Tama tibaso, augwaligo moni sęgę yai nai bobobage bonode gebelama, te tamu ąį tomoba sanama, augwaligo te tamu ąį degedu usu ni sali, te moni bobobage mu yali 40 mita. Tama da dwasianu pelagalama, te usu ma sali. 29 Tama te sogo, dwasianu pąde tama yali, 30 mita. Tama te sę elama, augwaligo koneani, te nabis me deli pąde elalubao homu yali. Tama augwaligo homugo masigiba taluama, doligi paibao homu eyu, augwali wi yali. Tama augwaligo moni sęgę yai ain me si me si nama bobobage bonode gebelama, deli deli te moni geba tudi badu tamu ąį degeduba tagala palali. Tama tilama, augwaligo homugo masigiba taluidali weyu, be posomainu augwaligo Godibolo po wali. 30 Tama Pol agai suali, te gebade sę ebo bidi augwaligo te dwasianu geba kęani bono pisaganama, te dwasianu geba tamu ąįba aiyaba tagalobo suali. Augwaligo homugo te moni geba taga peyu, te dwasianu gebadu buluba wi pinao. Tiali goli, augwaligo tibode ‘Moni geba gunide moni te sęgę yai ain walaibao,’ te tibo po tama wali. 31 Tama Pol agai koneyu agai te ami tobolu bidi me, te enesigi bidi dabebolo me, te po wali, “Te bidi augwali da dali bidisiąyu da, teda dage tigidali tamu ąįde isigi da. Te bidi dabe augwali wi po baso da, Godigo da tau sogobeo, agai wali po tiwai.” 32 Tama te po obaso, te ami bidi dabe augwaligo te dwasianu geba gebelali bono te ge hwągo togwali, te dwasianu geba te tamu ąįgo olo selasa pali.

33 Te be posobo pąde Pol agai augwalibolo “Nai selama, tuao” wali, tama augwalibolo po bomona wali, “Megi dagego moni homu edubadi, dagego nai tusiąma, Sarere si mu silali. 34 Tama tibaso, eno homugo dagebolo po bomonama obao, dage megi nai tuao. Magu menio. Te nai tubode dage bomo selama, dage bugagia bidaibao. Eno koneanio, da tigidali tama bugagia bidaibao, da me deli dwasianu dologobeo, selegobeo,” wali. 35 Tama te po olama, Pol agai te bret nai selama, te bidi dabe gesabidide Pol agai Godibolo nage usu da olama, te nai nogogo pebedama, tubo gagalali. 36 Tama te pogo augwaligo homu dąų olama, tama augwali tigidaligo me te nai tuali. 37 Tama da tigidali te moni gebade bidali bidi dabe hauwa mu da 276. 38 Tama dago te nai tuali, tabiali. Tama dago te tubo nai ge bek hauwa mu geba tabide muai te tigidali dago selama, tamu ąįba sąyani, te geba yadala pomainu yali.

39 Te be posobo si, te gebade sę ebo bidi augwaligo te nabis bulu tǫ sulama, te konebe. Tiali goli, augwaligo te bagu suai, te dwagi yai geba tubo gebabelede elalubo suali. Tama augwaligo te po wali, “Dago moni geba te bagudu dolo sela pabo usu sinao,” wali, “te geba te tǫ sesegeba dąų waligi pinao,” wali. 40 Tama pomai hagede, augwaligo te ain dilide gebelali bono dabe ge hwągo togolama, tamu ąį tomoba olo tagalali. Tama bidi me badu augwaligo te geba guni dodolobo habesege si bono kęani pisagana sąyani. Tama augwaligo te nami ugwa te geba gunide ma walali. Tama te nami ugwaba waligo sabilibode da nabisba odasa pomainu, tama tiali. 41 Tama tilama, dago geba te baguba pabo gagalali. Tiali goli, tamu ąįgo geba selasa pelama, te tamu ąį dologode dwasianu kemigo du elaluali. Tama te geba guni te kemi duba tųą paligi pabo si, te geba tudi badu tigidali pebeda pali. Magu menio. Moni tamu ąį bǫį dabe asiyu, te geba ni tologa sąyani.

42 Te ami bidi dabe augwa homugo te kalabus hani me ela muaibao homu yali. Magi basowe? Augwaligo te homu yali, augwaligo tamu ąįdu paubo pelama, te nabis buluba sabolama, duala sigi pelama wi dią paibao homu yali. 43 Tiali goli, te ami tobolu bidi agai te ami dabego yali homu tagalao wali. Magu meni. Agai homugo augwaligo Pol elidali. Tama agai da tigidali i olama, agai te po wali, “Tialima, duga tamu ąį paubo kone baso da, te duga samonama, paubo pelama, nabisba piąo,” wali. 44 “Tama duga me badu nogo ąį togobo konesiąbaso da, dage te ni nami dabe me selama, te moni geba nigai ni hodigi selama, dage nosali ąį pauluama, nabisba piąo,” te po wali. Tama dago tama tilama, da tigidali te nabis buluba bugagia sabola silali, da me dolobe.