1 Te Amasia aga isibo si, te Juda dabe augwaligo aga ogwa sali, te Usia sali, tama augwaligo aga king bidimainu sa muani, te aga ayago pesage selama bidimainogo. Usia aga king pedelali sogo agai kibu be 16 tama elaluali. 2 Aga king bidama, nosali agai boi hwįgi pelama, agai te taun Elat te boi bidi dabego nogode ma sigi pali. Tama agai te taun dolali madi ma dodolali.

3 Te Usia aga king pedelali sogo, agai kibu be 16 kibu be elaluali, tama aga Jerusalemde king bidibadi kibu be 52 yali. Aga ida te Jekolia dao, te taun Jerusalem we me deli dao. 4-5 Te Usia aga king bidibadi, bidi me nogi Sekaraiago Usia aga gedu haluasa po wabo ola mayu, me God Genuai Bidi dologode bidibo kolesaga ola maduali. Tama Sekaraia aga isisąbadi da, king Usiago Godigo homu kolesaga wali pabo homu bomo elama mu elaluali, tama agai wiegi yai kolesaga Genuai Bidigo gedude eyu yali, te aga aya Amasiago yali gilama tama yali. Te Usiago Godigo homu kolesaga wali pabo homu bomo elalubadi da, teda Godigo aga tau siyu, tama Usiago ebo sę dabe tigidali wiegi yai naga iduali.

6 Tialima king Usia hogodama, tama te Filistia dabe dali hwįgi pali. Tama agai augwali aiyaba elaluama, tama agai te taun Get, me taun Japne, me taun Asdot obo aluali. Tama agai gesi taun dabe te Asdot dabego tǫde geseliyu, me te meba kantri Filistia tǫde nigiyu yali. 7 Godigo aga tau selama, tama agai te Filistia dabe, me Meun dabe, me te Arebia dabe te taun Gurbal dabe aiyaba elaluali. 8 Aga bomai king mu pedelali, tama te we bidi te kantri dabe te elalua pabo dabe me pelama, Isipba saboligi pali bagego agai genuai nogi po odali. Tama te Amon dabego agabolo takis mone mayu yali, te agabolo te augwali aga dologode bidiba weyu, te ola mayu te takis mani.

9 Tama Jerusalemde Usia agai te e tama taun obo dabe dodolobo sę yali. Agai te Konago Sunumide agai be sę yani, me te Odogo Malu Bulu Sunumide me, tama augwaligo te Sapela Kona wabo te sunumi badu me be te obo daide sę yani. Te ami bidi dabe tede bidiyu, te boi bidi asobo no munalu yabo. 10 Usiago kau kibu hani hauwa me sipsip kibu hauwa mu te giliga dega sabo bulu badu te malu tǫde me te bulu du dabede hauwa mu elaluali. Tama tialima, agai te bidi meni yai kala sili bulu badu agai te sigi be taua me badu geselali, magi baso meni, te agai sę bidi dabe mebago tede bidiyu, te agai hasa dabe bugagia tonalubo usu mu yali. Tama me agai te hasa dabego tuabo wę ulu hauwa mu geselali. Tama me ma Usia aga didiman sę ebo godolo mu ebo bidi dao. Tama tibaso, agai te we bidi dabebolo te wain gi hauwa buluyu, me gasa nai dabe te wiegi yai tǫ ili hauwa elalubo tǫde bulao po wali, te bulu du yali madi me nai bulao po wali.

11 Usia agai ami hani te hauwa mu elaluali, tama augwali te wiagila hwįbo bage dao. Tama Jeiel te kingo kuskus me deli dao, me Masea te ami bidi dabe nedama, te mena tama bidi te deli deli ami hani tomode bidabo sa mubo bidi. Tama Hanania te kingo polalubo ofisa me deli dao, te sę ebo bugagia tonalubo bidi. 12 Usia agai 2,600 polalubo bidi dabe elaluali, te deli deli ayago togali Juda wąį te agai ami tomode bidibo bidi dabe tonaluabo bidi dabe, agai te bomai ami dabe tonaluabo bage. 13 Tama te ami bidi dabego namba te 307,000 bidi tama elaluali, tama augwaligo bomo elama mu hwįnama, tama king tau selama, boi bidi aiyaba elaluabo usu yali. 14 Tama Usia agai hwįbo nai dabe tigidali dodolama elaluali, te ene, me ni name dage te sabele, me kapa hadi, me hwįyu gudubo ugwa, me enesigi dabe, me masigi du dabe te katapel te gumi enesigigo enabo me dodolama elaluali. 15 Tama me agai kolesaga koneai bidi meba Jerusalemde elaluali, tama augwaligo te masin dabe geselali, tama augwaligo te masin munama elaluali. Tama te hwįbo si asobaso da, augwaligo te taun obo nogo habuba te masin dabe ugwa sela pelama, me te ami bidi dabe bidiyu, te boi bidi dabe asobo no munaluyu tonaluyu bidibo te tauaba sela holiyu elama, tama augwaligo te masin selama, te ene enebo sę eyu me genuai masigi selama te boi bidi dabe bidiboba eneyu yabo masin elaluali.

Te Usiago yali sę dabe tigidali te Godigo aga bugagia mu tau sali. Tama tialima aga bomai king mu pedelali, tama digibulu we bidigo agai genuai nogi po odali.

16 Tialima te Usia aga boma pelama, tama agai nogi genuai ugwadu mu pedalo si, da, agai homugo aga bomai king mu dao te homu yali. Tama tialigo aga dolali. Aga God aga Genuai Bidigo po wali pabe, tama aga digi te Genuai Bidigo tempel be tomode alta elalubo madi pelama, tama aga digi te wiegi yai denami ebo te pauda ulainogo pali. 17 Tiali goli pris Asariago aga tomoba tula pabo suali, tama agai Genuai Bidigo pris bidi 80 te wi meni yai pris sali. Tama augwali te king wali te Genuai Bidigo tempel be tomoba pali. 18 Augwaligo aga sesanama, tama agabolo te po wali, “Usia, nago odao. Te wiegi yai denami ebo pauda Genuai Bidibolo ulubo te nago sę menio. Te menio. Genuai Bidigo te Arongo hani pris bidi dabego te ofa emainogo sa muai dao. Nage polo tama te e tedali gasagi yai be habu taga pao. Magi baso meni, nago God dali dwai sę genuai mu yali dao. Tama tialima, God Genuai Bidigo nage dali wiegi yai haliga me egobeo,” augwaligo te kingbolo te po wali. * Sai 30:7-8; Nam 3:10

19 Usiago te wiegi yai denami ebo pauda ulubo plet nogo tolaluyu, tama aga te wiegi yai denami ebo pauda ulubo alta pagede dolaluali. Agai te pris dabego po odama, tama agai augwali dali sębę genuai mu yali. Tialima polo tama te oyabe gasi agai gesabidide mu yali, te kingo gesabidide, te Genuai Bidi aga tempel be tomode digi. 20 Te hetpris Asaria me te meba pris dabe dali augwaligo te oyabe gasi te kingo gesabidide elalubo suali, tama augwali noma mu selama, augwaligo aga buluba sela sąyani, te Genuai Bidigo bedu buluba sela sąyani. Tama aga digi me polo pali. Magi baso meni, agai polo koneani, Genuai Bidigo agai tigide te gasi pedelemainu ilama, aga dene mawainogo ebaso.

21 Te oyabe gasi te king Usia tigide yali te silabo usu meni yai. Tama tibaso, aga Genuai Bidigo tempel be ma pabo usu ebe. Tama me ma Usiago te kingo be tagalama, tama aga gasa be meba bidigi pali. Tama aga ogwa Jotamgo te king sę tolaluyu, te kingo be tonaluali, me agai te kantri tonalubadi te king Usia isiboba usu nigi pali.

22 Te king Usiago yali sę po dabe aga te king pedelali sogo gagalama aga isali sogoba usu nagasali po te buku profet Aisaia te Amosgo ogwago asęani bukude te elalubao. 23 Te Usia isibo si, augwaligo aga te aga wąį dabego gų pagede pubulali. Tiali goli augwaligo aga te meba king dabego gų page digibulu gana pubulali, magi baso meni, aga oyabe gasi yaibaso. Tama aga ogwa Jotamgo agai sę selama, tama aga king pedelama king mu bidali. * Ais 6:1