1 Te Atalia kwin we bidibadi kibu be te kibu be 7 wabode, pris Jehoiadago magi sę me yabo homu bomo mu yali. Tama tialima agai te nogo a naga ofisa bidi dabe dali po minama, tama aga tau sabo po dąų wali. Te ofisa dabe augwaligo nogi e tama dao, Asaria te Jerohamgo ogwa, me Jehohanango ogwa Ismael, me Obetgo ogwa Asaria, me Adaiago ogwa Masea, me Sikrigo ogwa Elisafat dao. 2 Tama tialima te ofisa dabe augwali Juda bulude tigidali taunba dabe pelama, tama augwaligo te Livai dabe me deli deli wąį hanigo tobolu bidi dabe me augwali odasa asali, te Jerusalemba. * 2 Sml 7:12

3 Tigidali te bidi dabe augwali Godigo tempel beba sisinama, augwaligo te king Joas dologode bidaiba po olama, po dąų wali. Tama te Jehoiadago augwalibolo e tama po walali, “Dagego Joas suao. Aga te king Ahasiago ogwa dao, tama aga king bidimainao. Magi baso meni, Genuai Bidigo te po wai dao, tigidali sogo king te Devitgo hani bage naga king bidimainao po wai dao. 4 Tama tialima, megi da eno dage dali mena sę me deli yabo po waibao. Te dage te pris dabe me Livai dabe dage Sabat side sęba asiyu da, dage bidi hani sela peda piąo. Te bidi hani me deli, dage te Godigo tempel be sunumi badu tonaluiąo. 5 Me te namba tu bidi hani, dagego te kingo bede no munaluao, te Joas aga bidibo madi. Tama namba tri bidi hani, augwali te sunumi augwaligo Jesot nogi wabo, te sunumide no muao. Tama tigidali gasa bidi dabe, augwali te Genuai Bidigo tempel be mesalo, te genuai sisinibo pesage, tede sisinao. 6 Te pris dabe dali Livai dabe augwaligo te pris dabe tau sabo sę elalubao. Augwali naga te Genuai Bidigo be tomoba pabo usu yaibao. Magi baso meni, Godigo augwali naga sa muai dao, te bede agai sę emainu. Tiali goli me olo we bidi augwali te bulu badu bidimainao, te Genuai Bidi aga digi wali gilama. 7 Te Livai dabe augwaligo te bainat hwą selama tolaluyu, king bugagia tonaluiąo, te king bagualuyu. Tialima king aga gasa madi me painu ebaso da, teda augwali aga dali peyu yao. Tialima bidi me Godigo be tomoba tula asobaso da, teda Livai dabe augwaligo aga elama isilao,” Jehoiadago te po wali.

8 Tialima te Livai dabe me te Juda bidi augwaligo te Jehoiadago po wali pali, tama te dei Sabatde te ofisa dabe augwaligo te sę silama toma tuainu soabo bidi dabe siyu, me augwali hasegelama sęba painu ebo bidi dabe me siyu, tama augwaligo te bage sese tama odasa asali. Magi baso meni. Jehoiadago augwali te sę silama toma tuainu me pelamo po wai. 9 Tama tialima Jehoiadago king Devitgo ene dabe siyu, me sabele ni name pedai genuai me dwasianu sese selama, te ofisa dabebolo mani. Te nai dabe te Godigo tempel be tomode munalubo dao. 10 Tama Jehoiadago te bidi dabebolo walama, augwali te Genuai Bidigo tempel be obo sesegeba tigidali badu dolalugi piąo po wali, te saut badu gagalama not badu tagaligi piąo po wali. Tama augwali alta pąde dolaluyu, Genuai Bidigo be pąde bainat hwą tolalu bugagia tonaluyu no munaluali. 11 Augwali polo dola selama no munalubadi da, teda te pris Jehoiadago te Joas buluba odasa aselama, kingo wiegi yai madi Joasgo toboluba madi bulali. Tama me agai agabolo te augwalibolo dodolama dąų wali bomai po elalubo buku me mani. Tama nosali Jehoiada aga ogwa dabe dali augwaligo oliv wel me selama, agai toboluba gelali, te king pedelemainogo. Tama te we bidi augwaligo hae olama, e tama po wali, “Joas aga bobobage sogo king bidimainao,” wali.

12 Te kwin Ataliago te we bidigo genuai po kulukulu wabo odali, te kingde wiegi yai homu iyu udula biliyu ugwa eda ebo po odali. Tama agai aga be tagalama, Genuai Bidigo tempel beba pali, te we bidi sisalubo madi pali. 13 Aga saboligi pelama, tama agai suali, gesi king me te Genuai Bidigo be gesabidi badu ni pos pagede dolalubo suali. Te king dabego ebo tiwai elalubo suali. Tama agai te ofisa dabe me te biugel bu wabo bidi dabe king pąde bidibo agai suali. Tama me agai te we bidi dabe wiegi yai homu pemene ebo suali, tama te we bidi meba augwaligo biugel bu wabo suali. Tama me te Godigo bede wiegi yai musik elebo bidi dabe augwaligo wiegi yai musik mu elebo agai suali, te we bidi wiegi yai homu pemene emainu yali. Tama tibaso, Atalia aga ugwa pisąyali, magi baso meni, aga tabi dwai ebaso. Tama agai po weyu e tama po wali, “Dage bidi dwai dabe, dagego dwai kolesaga elama, ena aiyaba elaluainu yalio,” wali. 14 Jehoiada agai homugo augwaligo Atalia te Genuai Bidigo tempel be mesalo pąde elebo hagela yali. Tama tibaso, agai te ami ofisa dabe i olama, te po wali, “Te Atalia nogo tulama, tama aga bolo ami bidi dabe tomodu pelama, Genuai Bidigo be mesalo tomodu buluba pao,” po wali. “Tama tialima, bidi mego aga wali pobaso da, teda dagego aga elama isilao,” po wali. 15 Tama tialima, augwaligo Atalia toulama, tama augwaligo aga kingo be obo tomodu osa pali, te augwaligo Hos Dabego Sunumi wabo, te sunumide odasa pali. Tama augwaligo aga tomoba odasa pelama, aga elama isilali.

16 Te pris Jehoiadago te king Joas me te we bidi augwaligo aga dali po dąų wao po wali, te augwali Genuai Bidigo we bidi naga bidimainu. 17 Tama nosali te we bidigo te tibo god Balba lotu po wabo be hųgigi pali. Tama augwaligo te god Balgo alta me piksa dabe tologogi pali. Tama me augwaligo Matan elama isilali, te Balgo pris bidi, te alta pąde. 18 Tama Jehoiadago te Livai dabede pris meba me Livai dabe meba augwali te Genuai Bidigo tempel be tomode sę yabo tonaluabo bidi meba sa muani. Te bidi hani si augwaligo te polobadu king Devitgo augwa wąį dabebolo polobadu yao wali sę tiwai yao wali. Tama augwaligo Genuai Bidibolo isigo mu dela silibo ofa uluyu yao wali, te Mosesgo bomai pode wali gilama tama tiao wali. Tama me augwaligo te ofa ebo side musik eliyu tęąbi po wabo bidi dabe me tonaluyu yao wali, te Devitgo wali gilama. 19 Tama Jehoiadago te Genuai Bidigo tempel be sunumide tonaluabo Livai dabe meba sa muani. Te we bidi Genuai Bidigo gedude dolo isąwai we bidi tomoba pidali weyu, te Livai dabe augwaligo bugagia tonalumainu.

20 Tama tialima Jehoiadago te ami ofisa dabe siyu, me genuai bidi dabe siyu, me tobolu bidi dabe siyu, me te gasa we bidi dabe siyu elama, augwaligo king te Genuai Bidigo tempel bede oda selama, kingo beba odasa pali. Tama augwali te sunumi augwaligo te Ugwadu Elalubo Sunumi wabo, te sunumidu pali. Tama augwaligo king te sia kingde duamainu odasa pali. 21 Tama te we bidi augwali wiegi yai homu pemene genuai mu yali. Tama me augwali homu tegaluama Jerusalemde bugagia bidali. Magi basi meni, te ami bidi dabego te we Atalia polo ela muaibaso.