2
Devit te Juda dabego king pedelali
1 Te Sol de Jonatan si isai madi, tama nosali Devitgo Genuai Bidiba te tama po hanalu wali, “Ena pelama, te Juda dabego taun me deliba duagi pelama bidibaso, usu yaibawe?” Tama Genuai Bidigo te po wali, “Nage pao.” Tialima, Devitgo agaba ma hanalu wali, “Te ena mena taunba duagi pelama bidigowe?” Tama Genuai Bidigo agaba te tiwai po wei ponani, “Nage pelama, te Hebron taunba bidigi pao,” wai.
2 Tama tialima, Devitgo aga we si, te Ahinoam te Jesril bulu we, me te Karmel bulu we Abigel badi selama, tama augwali pelama, te Hebronba bidigi pai. Polobadu u Abigel te Nabalgo we da, tiali goli Nabal isibaso, tama Devitgo aga sali. * 1 Sml 25:42-43 3 Devitgo hani bidi te aga sibi dabe dali, augwali te Devit dali pelama, tama augwali te Hebronde bidiyu, tama te Hebron pąde elalubo bulude bidiyu yai. 4 Tialima, te Juda hani bidi dabe te Hebronba aselama, tama augwaligo te Devit toboluba wel gelama, te augwa king pedalumainu yalio.
Devit te king pedalubo si da, teda agai te tiwai po odali, te Jabes taun bage, te Gilgal tǫ bidi dabego te Sol tigi pubulali po walio. * 1 Sml 31:11-13 5 Tama tialima, te aga bidi meba tagala palama, te Jabes dabeba te tama po wagi pomainu yali, “Genuai Bidigo te dage wiegi yai bugagia ilimainao, magi baso meni, dagego wiegi yai homu ebo kolesaga te Solba ola mayu, te duga kingba tiali, tama dagego aga tigi pubulali dao. 6 Tama megi da, eno homugo te Genuai Bidigo dage bugagia tonalu, tama dage dali sesemane sogo bidimainao. Tama eno me te dageba wiegi yai kolesaga eyu, te dagego wiegi yai kolesaga te Solba yali te wei ponoyu, te tiwai ebo dao. 7 Mu tama Sol, te dagego king, isalio, tiali goli te Juda hanigo ena te augwa king pedalumainu yai. Tama tibaso, dage bomo elama dolalu, tama dage te magi nai me delide te wi me elamu dao,” wali.
Te Israel dabego te Isboset te augwa king sa munama pedelali
8 Te Filistia dabego te Sol elali sogo, Apner, te Nergo ogwago, te Isboset oda sali, te Solgo ogwa da, tama augwa peyu, te wę Jordan nogelama, tama te taun Mahanaimba sabolai. Apner te Solgo amide te polaluali ofisa bidi dao. 9 Augwali te Mahanaimde bidalu, tama Apnergo te Isboset te Gileat tǫ, me Aser, me Jesril, me Efraim, me Benjamin, me te Israel tǫ tigidali tǫ gasa badu, te tama bulu bage bidigo king bidi pedalumainu nigilali. 10 Isbosetgo kibu be bidi sese si, te 40 bidai elalubadi, tama augwaligo aga te king nigilali. Tama aga te king bidali te kibu be si naga bidai. Tiali goli, te Juda hani dabego te Devit wali pelama, 11 tama aga te augwa king nigilama bidali. Tama aga te Hebron taunde bidali kibu be te 7, te polua a naga, me badu nogo kibisa deli, te tama sogo bidalio.
Te Israel dabego te Juda hani dabe dali hwįani
12 Apner dali te Isbosetgo ami dabe hogodama, augwa te Mahanaim taun taga soyu, tama te Gibeon taunba sabolali. 13 Tialima, Joap te Devitgo ami bidi dabe dali asiyu, augwali te Gibeon sigi ąį pąba te augwali deliba gesabidi sisinanio. Te Isbosetgo hani te sigi wę sesege e badu bidalu, te Devitgo hani dabe te ąį sesege u badu bidalu yali. Te Joap aga ida te Seruia dao.
14 Tialima, Apnergo te tiwai po te Joapba hanalu wali, “Te da hwįbo usu si yaibawe? Nago te naga gesi ogwa bidi ami meba tagala palu, tama eno ami bidi meba te tagala palu elama, te augwali dali hwįbo usu somainu inao,” wali. Tama Joapgo te po wali, “Te usu da, dago tama tibo dao.”
15 Tialima, te Benjamin hanigo te nogo si olama, sągągo si bidi, te Isbosetgo ami bidi dabe, augwali aselama, te Devitgo ami bidi nogo si olama, sągągo si bidi dabe dali te hwįbo ususu si yagasalio. Tama te Devitgo ami bidi deli deligo te Isbosetgo ami bidi deli deli dali tedali hwį hwį palio. 16 Tama augwali te hwįbo ususu si yali sogo, te deli deli bidigo aga boi bidi te tobolu tola sesa pelama, tama aga boi bidi te tigi me badu te bainat hwągo enani. Tama te bidi sese deli olama, me si me si, te 24 bidi tigidali degasa dulu, tama isalio. Te bidi dabego te tiali pesage bulu nogi poyu, “Te Bainat Dabego Pesage Dao,” wai. 17 Tama te sogo te genuai wąbi te hani si tomode hodolama, hwįanio. Tama Devitgo hanigo te Apnergo hani, me te Israel hani dabe aiyaba elaluai dao.
18 Te Devit aga abe Seruiago ogwa sela, te Joap, me Abisai, me Asahel, augwali me te hwįbode bidali. Asahelgo udabo te bulu uni hasago bomo elama, mu udabo te tiwai yai dao. 19 Tama tialima, te Israel dabe wi tedela pabo side, tama Asahel hogodama, tama te Apner dolo udulama, tama aga pobeasa pali. 20 Tialima, Apnergo begelama, ma tonobadi, tama te Asahelgo aga pobeasa asobo sę ebo subaso, tama agaba hanalu wali, “Asahel, te nage tama da, agawe?” Tama Asahelgo te po wai, “Awe, ena tama dao.”
21 Tialima, Apnergo te po wali, “Nago ena me pobeasa aselamuo. Nago te gesi ogwa bidi me deli pobeasa pelama, tama aga pageabi elama, tama agai doado bage dabe sao.” Tiali goli, Asahelgo te Apnergo po me odobeo. Menio. Agai te Apner pobeasa pabo sę idubadi geani.
22 Tialima, Apnergo agabolo ma wali, “Ena sula tagalao. Nago homugo te eno nage ela mumainu eba, agawe? Tiali goli, te eno nage ela mubaso da, teda ena te nago ama Joap gedude te dwai hale mu yaibao,” wali.
23 Tiali goli, Asahelgo aga sula me tagalubeo. Tama tialima, Apnergo sesemone ene te tudiba pogolali digi, tama te ene page poa pali tego te Asahel haligade dolama, tama me badu pedelalio. Tama Asahel degasa dulama, tama isalio. Tama te gasa ami bidi dabe te Asahel tigi munalubo pesageba pedelali sogo, te augwali doligi pelama naga tononaluali.
24 Tiali goli Joap de Abisai sigo Apner pobeasa pali, tama te be pio ebode mu augwali si te bulu du Ama te giliga pedalubo badu te Gia bulu te Gibeonde pabo tǫ wa pai sunumi elalubo te badu pedaiba sabolalio. 25 Tama augwali sigo suali, te Benjamin hani bidi dabe dali, Apner dali, te dwasianu bulu du bagede deliba ma muna selama, tama hwįainu elaluai. 26 Te Apnergo augwali si subo si da, agai aba Joapba te tiwai i wali, “Magi yaliwe? Te hwįani siligobe da, agawe? Te kolesagago te daba genuai sęgę maiabo, te nago konesiąyu eba, agawe? Da te deli kaneme dao. Mena sogo te nago te naga bidi dabeba waliyu, te augwaligo da munu me pobeasa pelamuo po waibawe?” wali.
27 Joapgo te tama wabo po odama, tama agai te tama po wei ponani, “Te Sesemane Sogo Bidada Pabo Godigo nogide, eno mu po nagebolo obao. Nago te tama po me wagi menigi sogo da, te eno hani bidi dabego dage pobeasa pidubadi te do kigamu be posoboba usu nigi pigi dao,” wali. 28 Joapgo te po ola siminama, tama agai te biugel bu wali, te aga ami bidi dabego te Israel dabe ma pobeasa pidali weyu, paliali. Tama tibaso, te wąbi hwįani silalio.
29 Apner te aga ami bidi hani dali augwa te bulu tagalama, tama te Jordan odogo malu buluba pali. Tama te hulide augwali te odogo buludu pelama, tama te wę Jordan nogealio. Tama augwali pelama, tama te giliga tomo yagasobadi, te belode augwali te taun Mahanaimba sabolali.
30 Te Apner aga ami bidi dabe dali pai madi, teda Joapgo aga ami bidi hani dabe sisinama nedali. Tama agai nedalama koneani, te aga ami bidi dabe te 19 bidi isai yalio. Tama Asahel me isai. 31 Tiali goli, te Devitgo hanigo te Benjamingo hani bidi dabe te 360 bidi elai, te Apnergo hani dabe dao. 32 Tialima, Joap te aga bidi dabe dali augwa te Asahel tigi sela pelama, te Betlehemba pubaligi pali, te aga ayago gų pageba. Augwaligo aga pubulama da, teda augwali hulide pelama, tama augwali te Hebronba be posobadi sabolalio.