1 Te gasa bidi dabe augwaligo eno nogi dolobo po dage dali olama, tama dagego ena tau sabo po wei ponosiąbaso, ena digi ena nogi ugwaba sobao. Te gasa tų me elalubeo. Mu tama, te kolesagago da tau me sisąbo usu me isąwani. Tiali goli tagalama, te dago Genuai Bidigo enabolo te ną yali me, te geme dualali po meba mani, tede eno po megi waibao. 2 Ena te Kraisgo bidi bidiyu, tama kibu be nogo si olama sągągo me si me si polobadu Godigo ena te dagalu sela wali sigi mu teba ugwaba sela holali. Te ena teba pobadi ena tigi dali bidaliwe, ma ena tigi tagalama te eno noma bidi naga teba paliwe, te eno me konebeo. Godigo naga koneanio. 3-4 Tama Godigo ena te Paradais teba sela holali. Te ena tigi dali bidaliwe, ma eno tigi tagalama eno noma bidi naga teba paliwe, te eno me konebeo. Godigo koneani. Tede eno te bidigo me pusubo usu isiąbo tobage po odama, tama te po bidigo me pusidali weyu habu selali dao. 5 Godigo ena dali te yali kolesaga, tede eno homu pemene yaibao. Tiali goli ena digi ena nogi ugwaba me sogobe. Ena bomo meni yani po ena olama, tama tede naga ena nogi ugwaba sabo dao. 6 Mu tama, ena digi ena nogi ugwaba sigi sogo da, teda ena konesiąwai bidi tiwai me egi menigi dao. Menio. Te eno mu po naga wagi da. Tiali goli ena digi ena nogi ugwaba me sogobeo. Magi baso meni, eno homugo te bidi me deligo te po odolama tama agai homugo ena te wiegi yai bidi mu da homu idali. Eno homugo dagego eno ebo kolesaga sulama, tama dagego eno Godigo po pusubo po odolama, tama te si naga osola sulama, tama dagego tiwai homu dolo enaba emainogo ebo dao.

7 Te po hauwa Godigo enabolo te dagalude ola mani, te genuai wiegi yai nai mu dao. Tama tede ena digi ena ugwaba sabo te Godigo godolo me ebe, tama agai te dene mabo sesani ena tigiba enebo nai tiwai nai me deli enabolo mani. Te dene mabo nai te Satango sę ebo bidi tiwai dao, te ena elidumainogo ebao. Te ena aiyaba elaluama tama te eno te dagalude suali naide ena digi ena ugwaba me sidali olama tibo dao. 8 Sela sogo eno dago Genuai Bidibolo hanaluyu po wali, te dene mabo nai agai enade sela sąmainogo yai. 9 Tiali goli agai te po enabolo wai, “Woo, te eno olo tau sabo wiegi yai kolesaga nagede usu yai elalubao. Magi baso meni, te bomo meni yai bidide eno bomo hania mu pedalobo dao,” Genuai Bidigo te po wai. Tama ena bomo meni yai da te homu sęgę munu me egobeo. Menio. Ena wiegi yai homu pemene mu tede ebo dao, te Kraisgo bomo enade elalumainogo ebao. 10 Tama tibaso, Krais tobade ena bomo meniama, tama te bidi dabego enade nogi dwai posobo po weyu, enabolo dwai sę ilama, tama haniani sęgęgo ena siyu, tama bidi dabe augwaligo ena doloyu dwai sogo enaba pedalobaso da, teda eno wiegi yai homu tede ebo dao. Awe, te ena digi bomo meni ebo sogo, te sogo naga eno homu Kraisba tialuyu, tama aga bomo eno sabo dao.

11 Te eno te ena digi nogi ugwaba sali po tamadi weyu, te eno te kolesaga meni yai bidi tiwai yali. Tiali goli dage, dagego ena hodolobaso tama eno te po wali. Te duga digi eno nogi ugwaba sigi sogo da, te doloba pai kolesaga egi da. Tiali goli tama me tibeo. Mu tama, ena te olo nai tiwai dao. Tama te gasa bidi dabe augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo augwa sęde te homu ebo dao. Tiali goli ena dali augwali dali si usu siyu da, teda augwaligo ena te dwasianu sę me delide ena aiyaba elalugobeo. Mu menio. 12 Ena dage tomode bidibadi, te gasa bagego enabolo mani sęgę tigidali eno bugagia toloyu, tama dage tomode sę hauwa elama, tama ena da, te Godigo po sela pabo bidi mu da ola mabo bomai sę eno nogode pedalali. Te e dao: te haniani bidigo isąwai bomai sę dage tomode pedalali, te Godigo sę sa munama, tama bidi dodola midigi selama, tama Godigo bomo sumainogo yalio. 13 Eno te deli tiwai kolesaga te gasa Godigo po odobo we bidi hanibolo yali, te dagebolo yali tiwai sę yali. Eno dage tau sabo sę mede sǫą mu pabeo. Deli sęde naga eno dage dali te gasa Godigo po odobo we bidi hani dali tiwai si ebe. Augwaligo augwa masigigo ena tau sali goli, eno digi dagebolo duga masigigo ena tau sao po munu me wabeo. Tede dagego homu eno sęgę sali homu eyu da, eno homugo dagego te eno sali sęgę sela sąyao! Tiali goli eno koneani, eno tede sęgę me sabeo.

14 Megi ena sela sogo dage bidibo madi asabo sisi ebao, tama dagego nai eno anoma eyu sainogo tama dagego duga masigigo ena tau sao po me wagobeo. Te menio. Odao, eno dagego nai me sogobeo. Menio. Eno dage naga sabo homu ebao, eno dage Kraisbolo momainogo ebao. Dagego koneani, te wai dabe augwaligo te nai dabe gegebo sę elama te aya de ida si tau sabo sę me egobeo. Menio. Te aya ida augwaligo naga te wai dabe augwali tau sabo sę yaibao. Tama ena da dagego aya tiwai dao. 15 Tama dwagi yai homu eyu, dage tobade eno ena nai tigidali maiabo homu elama, tama ena bidibo ula me maiabo homu ebao, te dage tau sabo homu ebao. Eno dage dali dwagi yai homu eyu godolo mu ebo kolesaga genuai mu ebaso, tama te dagego magi baso ena dali homugo dwasianu naga kone palobowe?

16 Tiali goli dage tomode meba augwaligo enade te tiwai po waibao, “Mu tama, agai digi dago masigi hania hanilama me sabe, tiali goli agai te po bebegelebo bidi tibo sę ela mabo bidi, tama te tibo po wabo kolesagago agai te da muma menama, tama gasa bagego nogode te dago masigi sai dao,” augwaligo te po wai. 17 Tialima, eno bidi meba dageba tagala palidu geai. Magi yaliwe? Te augwali me deli augwali nogode eno tibo po olama tama dagego nai anoma elama me sai da, agawe? Te menio. 18 Eno te Taitus hodolama, tama aga dage bidibo madi asali, tama eno te gasa ama me deli aga dali hodobo tagala palali. Tama te Taitusgo ili po olama dagego nai anoma elama me saliwe? Menio. Ma dagego homu te ena dali Taitus si da te Tedali Mobo Bidi deligo bomode naga me bidibo meni, dagego da si dali te homu ebawe? Da si te tų delide naga me bilibo meni, dagego te homu ebawe? Edao. Dagego te tobage homu da si dali eyu da, teda duga homu hasegelao, te da sigo ebo kolesagade bugagia homugo koneao.

19 Dagego eno tamadi asęani po tigidali tede homugo kone palama, tama tede dagego e tiwai homu idubadi bogo, ‘Te wali pogo te Pol agai aga nogi tau sabo sę naga ebao.’ Tiali goli te mu menio. Dagego da dali po tų eyu, tama dena yali sę osola suabo bidi dabe meni. Abagi mu dede, da Krais dali wadolama tama Godigo gedude dolalubadi, dago te po tigidali dagebolo asęna tolobao. Tama tiyu dage tau somainogo eyu dago te po dagebolo asęna tolobao. 20 Eno e homu ebao: ena dageba asama, tama dagego ebo kolesaga sulama te eno suainogo homu yali tiwai we bidi me bidibo sugobe homu yaibao, dagego gasagi yai kolesaga ebo eno sueibao. Tama tiyu, eno te dagego ebo kolesaga subaso, tama eno dage dali dodolobo sę ebo tede dagego hagela homu yaibao. Polobadu eno dage dali sę hauwa yali, tiali goli megi ena wi dwasianu eyu homu si dagede ebao. Eno homu ena dageba asama, tama eno dage tomode duga hasi e tiwai haniani dwai kolesaga ebo eno sueibao: konila po wabo me, te amabolo aga elalubo naide dwai homu ebo me, tama sębę elama wado po wabo me, tama nai yogo kolesaga ebo me, dwai nogi posobo po wabo me, bidi geme posobo po wabo me, te hagoma ebo me, te Godigo po odobo we bidi hani pedaloyu dolobo kolesaga me, te tobage dwai kolesaga ebo eno dage tomode te sueibao, eno te homu ebao. 21 Eno e homu me ebao, ena dage bidiboba ma asobo si tama ena God agai ena te dagego gesabidide aiyaba elaluaibao. Tiyu eno dage hauwade gela waibao. Magi baso meni, te we bidi polobadu augwaligo te dwai sę yali te tagalama tama homu begelama, tama te meda yai kolesaga me, te penani ebo kolesaga me, te hale isąbo dwai dwai sę subigila ebo kolesaga, te augwaligo polobadu yali te dwai kolesaga tudiba me mube. Tama tede eno dage dali yabo sęde homu eyu tama homu sęgę elalubao.