1 Dago te daba pedalobo haniani sęgę tede moni homu me ebo menio. Magi baso meni. Dago te tiwai koneanio: te da e tǫde megi elalubo tigi da, te dena osogo bidabo be tiwai dao, te nami ugwa be tiwai dao. Tama te osogo bidabo be hųgibaso da, teda Godigo da maiabo be me deli elalubao. Te be bidigo nogogo me sę ebeo. Te dagalude elalubo, tama te be sesemane sogo elalua peyu, elalua paibao, te be gamonaibao. 2 Megi da e tǫde tigi elalubadi, te haniani sęgę toloyu, tama dago te hagela homu eyu me sogo gela weyu bidibao. Magi baso meni. Dago dena te dagalude elalubo be, te dago gesi tigi, tego te da tigi te gudubo ugwago mesega sabo tiwai emainu godolo ebo dao. 3 Dago tigide te gudali da, teda da tigi bolu olo tiwai me bidibo augwaligo sugobeo. 4 Awe, da e osogo bidabo ugwa bede me bidaludu, tama da sęgę siyu gela weyu bidibao. Te dago poloba tigi tagalainogo homu eyu me wabeo. Menio. Dago homugo dago gesi tigi mubode, te gesi ugwa tiwai elama, teda te isibo tigi te aga bidibo ula somainogo ebo dao. 5 Godigo digi dago te gamonabo tigi somainogo dabolo sisi ilai dao. Tama agai Tedali Mobo Bidi dabolo mani. Te Godigo me badu nai dabolo nosali mawainogo te agai hasia podolali nai te Tedali Mobo Bidi dabolo mani, tama dago e tama koneai: mu tama te agai tigidali nai dabolo maiabo homu yai, tama mu mawaibao.

6 Tama tego dago homu sesemane sogo dąų waliyu ebao. Dago tede bomo elalubao. Dago koneani, megi te dago tigi te dena bidibo be tiwai elalubao. Tama megi e sogo da ede me bididubadi, da Genuai Bidigo bulude aga dali me bidibeo. 7 Menio. Tama megi da e tǫde bididubadi, dago dena homu tigidali agaba muyu tama aga dali bilibo dao. Dago gedugo aga susiąbadi tama tibo dao. 8 Tiali digi, dago homu sesemane sogo dąų waliyu elama dago bomo elalubao. Dago homugo e elalubo tigi tagalama tama Genuai Bidi dali hodobo bugagia mu bidigi pabo homu godolo ebo dao. 9 Tama da dena tigide me bididubadi, ma tigi tagalama gasaba bidigi pai, te magigo menio. Sesemane sogo dago homu bomo elama, te Genuai Bidigo godolo yabo kolesaga tigidali naga inao homu ebo dao. 10 Magi baso meni. Dago koneani, da tigidali te Kraisgo po tųde hania hanilama pedalaibao. Tama da megi e bidibo tigi dali bidiyu tama wiegi yai kolesaga ebaso, ma dago dwai kolesaga eyu me yali da, teda da tigidali deli deli te dena yali kolesagade usu nama tama dago te tiwai saibao. * Rom 14:10

11 Te da tigidali te moni po tųde pedalaibao homu ebaso, da Genuai Bidide wi eyu, tama te bidi dabe augwaligo te da Godigo po sela pabo bidi dabe mu dao te hania konemainogo eyu, dago augwalibolo homu bega sabo po weyu bidibao. Godigo da gisiga koneani. Tama eno homu te dage me, dage deli deli duga te dwai sę dali dwagi yai sę dali dagalabo homugo ena hania koneai, te ena homu mu eyu te Godigo sę ebo bidi bidibao. 12 Te dagego homugo da wiegi yai bidi da homu emainogo, dena digi dena nogi ugwaba siyu te po me wabeo. Menio. Dage tomode bidi meba hagoma homu eyu, augwa nogide naga olo wiegi yai homu pemene ebo bidi dabe bidibao, augwa ebo kolesagade wiegi yai homu pemene me isąbo bage dao. Tama bidiyu, augwaligo da Godigo po sela pabo bagede nogi posobo po wabo dao. Tama te ena te homu mu eyu Godigo sę ebo bidi bidibao po, dago te po asęna tolali, te u tobage bidigo gedude dagego da dali wiegi yai homu pemene emainogo ebao. Dago homugo dagego te bidi dabego wabo ena nogi posobo po te po wei ponabo usu yaibao homu yali. 13 Eno te Godigo sę bomo ebadi, tama gasa bidi dabe augwaligo ena dene mabo dao. Tama ena dali boi bidi homu ebo bage augwaligo te sę sulama tama “Te bidi Pol aga polobo bidi mu dao,” augwaligo enade te po obao. Te usu dao, eno Godigo sę me yaibao. Me ma, da Godigo sę ebo bage, da homu dolo elaluyu bidibaso, teda tama bidiyu, dena sę eyu, tama tebogo dage tau sabo da, te dage tobade te sę ebo dao. 14 Magi baso meni. Te Kraisgo da dali dwagi yai homu eyu godolo ebogo, tebogo naga da homu hodolama tama dago Godigo sę ebo dao. Magi baso meni, dago homugo bugagia kone palama, tama te tiwai homu koneanio: bidi deligo da tigidali hasegelama tama da tobade aga isalio, tama tede da tigidali isai tiwai yai dao. 15 Tama agai da tigidali hasegelama isalio, te agai tama tibaso, da bidibo ula dali bidibo we bidi dago dena digi homu koneama munu me biligobeo. Menio. Te da tobade hasegeleyu isama tama ma hodaluali bidi, te dago aga homu naga wali peyu tama aga sę eyu bilao.

16 Tama tibaso, megi dena digi te poloba te tǫde bidi dabego ebo homu kolesaga wali me pisąma tama bidi me deligo kolesaga me dagalogobeo. Mu tama, polobadu dago te tǫde poloba homu kolesaga wali peyu tama Krais dagaloyu tiwai. Tiali goli megi dago aga te dagalabo kolesagade me dagalobeo. 17 Tama tibaso niwai bidi Kraisba wadolobo si da, teda Godigo aga gesi noma bidi mu ilama pedalaibao. Bugagia odao. Megi te bidigo ebo poloba kolesaga tigidali silalio, tama gesi kolesaga pedalai dao. 18 God aga digi te tigidali hasegelebo sę page bidi dao. Polobadu da agade boi bidi bidali, tiali goli Kraisgo yali sęde Godigo da aga dali deli homu ilama, tama da aga abagi hani pedalai. Tama agai te sę dabolo mani, te aga tau selama te aga dali boi bidi homu ebo bidi dabe augwaligo aga dali abagi homu pedalomainogo ilibo sę dabolo mani. 19 Dago pusubo po e tama tiwai: God agai te Kraisgo yali sęgo te tigidali we bidigo te boi bidi sę ebo kolesaga tagalama, tama aga dali abagi homu pedalomainogo yai. Agai te augwaligo yali dwai sęde homu kone ma ebeo. Tama agai dabolo te boi bidi dabe aga dali abagi homu ilabo po pusubo sę dabolo mawai dao. 20 Tama tibaso, dago te Kraisgo pedauwalide po selama tama agai po pusubao. Te tiwai God aga digi te tigidali bidi dago pedauwaligo i obao. Dago Kraisde digi te po tigidali we bidibolo pusubao, tama dago te tiwai po augwalibolo obao, “Te dagego boi bidi homu ebo kolesaga tagalama, God dali abagi homu ebo kolesaga mu yao,” dago te po pusubo dao. 21 Te bidi Krais agai dwai sę me isąwai, tiali goli da tobade Godigo dago dwai sę yali sęgę tigidali agaba sisinama, tama aga te dwai sęgę sai bidi tiwai mu pedalai. Agai tama tiali te da Kraisde wadolomainogo yali, tama agai bomogo da te Godigo gedude doloba pai we bidi pedalomainogo yai dao.