1 Solgo te Filistia dabe pobeasa pelama, teda aga ma geasa aselama, te Devit ma gegagasali. Tialima, te bidi mebago agabolo te po wali, “Devit te tǫ wa pai bulu te Engedi pąde bidibao,” wali. 2 Tama tibaso, Solgo te wiegi yai Israel ami bidi dabe te 3,000 nigilama, tama augwali selama, pelama, te Devit dali, aga hani dali, gegegi pali. Augwali te dwai bulu padodu soali, augwa te bulu nogi poyu, te Dwai Uni Memego Bulu da po wai. 3 Augwali pelama, te genuai ola be me deli te sunumi sese bulu dude elaluai, tama te sipsip meba obo pąde elaluali. Tama Sol aga te di tabo homu ebaso, tama aga te ola be tomoba pali. Tiali goli, Devit dali, te aga bidi dabe dali, augwali te ola be tomode mu dulalu bidaludai.* Tib 57 Tobolu pode; Tib 142 Tobolu pode 4 Tialima, te Devitgo aga bidi dabego agabolo weyu, te po wali, “Te dao. Megi te nago wiegi yai sogo dao. Genuai Bidigo nagebolo waliyu, te agai te boi bidi nage mawaibao po wai, tama nago mena sę agade yainogo da, teda nago te sę yao. Megi da, te sę ebo sogo dao. Ae, nage pao.” Tialima, Devit te dua dua peyu, te Sol pąba pelama, tama te Solgo bobage ugwa aiyadu dwasianu pedainu togwa sali, tiali goli Solgo me konebeo. 5 Devitgo togwa selama, teda nosali agai te yali sęde aga homu kone palali, te dwai sę dao, te homu yali. 6 Tama aga bidi dabe bidibo madiba ma pelama, tama augwaliba te tiwai po walali, “Genuai Bidigo enabolo te eno king dolomainu ilibeo, magi baso meni, te Genuai Bidigo digi aga nigilama, tama aga te king munama bidali. Eno te Genuai Bidigo sa muani kingba dwai kolesaga deli me egobeo,” wali. 7 Tama Devitgo aga hani bidi dabeba wado po waliyu, tama augwaligo te Sol eligi pomainu ebeo. Tama Sol te di telama, tama aga hogodama peyu, tama te ola be tagalama, soalio.

8 Tialima, Devit te Sol pali tudi badu nosali aga te ola bedu buluba dia solama, tama Devitgo agaba i weyu, te tiwai po wali, “King Sol, eno genuai bidi dao!” Solgo te i wabo odama begelali, tama Devit kidu sugunama, tama tobolu tǫba pogulali, te Solba genuai nogi mayu tiali. 9 Tama Devitgo Solba te tiwai po wali, “Magi baso nago olo te bidi dabego wabo poba muyu, te eno nage dolaibao homu ebo dawe? 10 Megi da, nago koneani, e sogo naga nage te bulu du ola bede bidibadi, tama Genuai Bidigo nage eno nogoba muanio. Tama eno hani bagego nage elao po wali, tiali goli eno olo tau sabo wiegi yai homu kolesagago nage tau siyu, eno te po wali, eno nage me dologobeo, magi baso meni, Genuai Bidigo digi nage sa mubaso, tama nage te king pedelai dao. 11 Eno aya, suao, nago eno e tolalubo ugwa dage pedai bugagia suao. Eno te nago ugwade togwa sali, tiali goli eno nage me elibeo. Tama teyu, nago bugagia koneao, eno nageba dwai sę yabo homu me, te nage dolabo homu me elalubeo. Eno nagede hagoma eyu, nage dologode bidibo hagela homu ebeo. Eno tede sęgę sabeo. Eno dwai sę me deli nageba me ebe, tiali goli, nago ena gegebo sę eyu, te ena ela muainu ebao. 12 Genuai Bidigo digi te da sigo ebo kolesaga dagalama, tama dego te dwai sę yali sueibao. Agai nageba te dwai dene mayu, te nago ena dali yali dwai kolesaga wei ponoyu tiaibao. Tiali goli, eno digi eno te nageba dwai sę me iligobeo. 13 Te polobadu digi te wali po nago koneani, ‘Te bidi dwaigo naga te dwai kolesaga yaibao.’ Tiali goli, ena te bidi dwai meni tiyu, te eno dwai kolesaga nageba me egobeo. Mu menio. 14 Da Israelgo king, nago ena pobeasa biliba, agawe? Tiali goli, ena de dawe? Ena te isai yowi tiwai yai. Ena te nǫ me deli tiwai naga dao. 15 Tama tibaso, te da si tomode te dego dwai sę yali te Genuai Bidigo digi dagalumainu yaibao. Agai ena tau siyu, te po dodoliyu, te nago ena me dologobeo. Tama eyu, agai da sibolo ola mawaibao, eno nagede dwai sę me deli me ebeo,” wali.

16 Devitgo po ola silibo side, tama Solgo agabolo te po wali, “Devit, eno waio, nago digi enaba te po oba, agawe?” Tama Sol gela walio. 17 Tama agai Devitba te tiwai po wali, “Nage wiegi yai bidi, te ena da dwai bidi mu dao. Nago enaba wiegi yai kolesaga mu yali, tiali goli eno dwai kolesaga nage dali yalio. 18 Tama megi tama nago ena pusali, nago wiegi yai kolesaga enaba elama, tama ena nago nogoba te Genuai Bidigo muani sogo, nago ena me ela mubeo. 19 Eno koneani, te bidi me deligo aga boi bidi dolabo sunumi elalubaso da, teda agai te aga olo me tagala palogobeo. Tiali goli, nago te wiegi yai kolesaga megi enaba yaligo, tama tiyu eno homugo te Genuai Bidigo nage wiegi yai bugagia mu ilimainu yaibao. 20 Odao, eno mu koneani, te nage Israelde bomai king pedelaibao. 21 Tama tiyu, eno homugo nago te Genuai Bidigo nogide te bomai po dąų walu, te nage king pedalubo sogo, te nago eno hani munu me eligobe po wao. Tiyu, nago augwali elibaso, tama eno nogi dali, te eno hani dali, tigidali mu silidalio,” Solgo te po wali.

22 Tialima, Devitgo bomai po dąų walali. Tama Sol aga buluba ma geasa peyu, tama Devit aga bidi dabe dali te geme dualaluali pesageba ma geasa pai.