1 Pablú ne, īto ña ñaꞌa san méꞌñū juntá ne, kakaꞌan ña:

—Ēní, nté ntūvi da káku ú un tsi nté vevií ne, kade ntaá u é kākaꞌan Xúva kō. Ñá kākutuní ko te kīni kaa é kade u —kaꞌan ña.

2 Kidáā ne, tóꞌō dutu, ñá nani Anāniá ne, kakaꞌan ñá nī ña ntáñɨ étsin san é kātú nuu ña xuꞌu Pablu. 3 Pablú ne, kakaꞌan ña:

—¡Kuān koo vií Xuva ko ni o, xōꞌon é kāden uvi nuu i! ¿Nté kui iꞌa tuvín kaxntēkún kūꞌven iñá ko vatā ó kakaꞌan leí san ne, xōꞌón ne, kaidon ntítan leí san é kākaꞌan te kaꞌní ña ko? —kaꞌan ña.

4 Ña ntáñɨ étsin sán ne, ntákaꞌan ñá nī Pablu:

—¿Ña káuꞌvī ntú o te dóo kini o kākaꞌan ni tóꞌō dutu Xúva kō? —kaꞌan ña.

5 —Ēní, ñá ni īní u te tóꞌō dutu ña. Tsí uve naꞌā Túꞌun Xuva kō é ña kuvi kaꞌan kíni o īña ñá odo nūú ñuu ko —kaꞌan ña.

6 Kidáā né, kūtuní Pablu tsí dava ña ntáde juntá san ne, ntántīkɨn ñá nchuꞌún ña saduceu; dava ña ne, ntántīkɨn ñá nchuꞌún ña fariseu. Ne, un ntii tsi kākaꞌan ña:

—Ēní, xuꞌú ne, ña fariseú u, tsí ña fariseu úvā kó dɨ. Dɨvi tsi nuu ī é ntáxntēkú kuꞌvē ntó iñá ko vevii. Tsí kakuintiꞌxe ko tsí ntoto xtúku o tē xiꞌi o —kaꞌan ña.

7 Duꞌva ō kaꞌan ñá ne, ura tsí i eni ntuꞌū ña fariseú san ntánaa núu ña nī ña saduceú san. Uun ito tsi teꞌnte núu juntá san. 8 Tsí ña saduceú san ne, ñá ntákuintiꞌxe ña te ntoto xtuku o tē xiꞌi ó, ntē ña ntákuintiꞌxe ña te īó ánjē. Ntē ña ntákuintiꞌxe ña te īó nima ko. Ntá tsi ña fariseú san ne, ntákuintiꞌxe ña é un ntɨꞌɨ nuū i sáꞌa. 9 Un tsi vāntiñɨ ñaꞌa san, ntánaa núu ña. Īó mastru lei ñá fariseú ne, nākuiñɨ ña, ntánantiko koō ña é ntákaꞌan ña saduceú san, ntákaꞌan ña:

—Ñatīí saꞌá ne, ña túvi nee nuu i ni idé ña. Te kākaꞌan ntíꞌxe ánje ni ñā ne, ña kúvi naa núu o ni Xuva kō —kaꞌan ña.

10 Uun ito tsi kúdiin kuéꞌēn ñaꞌa san, ntánaa núu ña. Tōꞌó sntadún san ne, úꞌvī ñá te niꞌi kuiꞌi Pablu. Dukuān ne, táxnūu ña sntadún san é kūnatáva ña Pablu méꞌñū juntá san ne, da ntíxnteka ña ña, nakunuu váꞌa ña iní i mí ntoo sntadún kān.

11 Kuáa ūtén san ne, ntitsí Tóꞌo ko Jesūcristu díñɨ Pablu, kakáꞌan ñá ni ñā:

—Ñá ku dē kuení o, Pablu, tsí kuan tsī koo kaꞌan kuénta iñá ko ñuú Roma váta tsī ó é kākaꞌan kuénta iñá ko ñuú Jerusaleén a —kaꞌan ña.

12 Tévāá san ne, uun tɨɨ̄n ña Israeé san nátee taꞌan ña xuꞌu ña, ntukū nuu iní ña nté koo kaꞌní ña Pablu, ntákaꞌan ña:

—Xoꞌō ne, ña koꞌo o, ña káꞌxi o tē ña káꞌni o Pablu. Na taꞌxi Xuva kō é ntoꞌo ko tē ña kuan koo víi o —kaꞌan ña.

13 Ñá te da ūvi díko ñatīi, ñá xeꞌé xuꞌu i é kuān koo vií ña. 14 Kuéꞌen ña, kūkoto ña tóꞌō dutu ni ñátā san, ntákaꞌan ña:

—Ntɨꞌɨ́ ne, e xéꞌē ntɨ́ xuꞌu ntɨ é ña kaꞌxí kueꞌén ntɨ da nté kūví kaꞌní ntɨ Pablu. 15 Dɨvi nto ni ūn ntɨɨ́ ntɨ̄ɨ́ ñatā, ña ntáde juntá san ne, kákan nto ntāꞌa tóꞌō sntadun te teváa nāntixntéka ña Pablu méꞌñū juntá san vata koo é tsixeꞌē ká nto ña. Ntá tsi ntɨꞌɨ́ ne, koo túꞌve ntɨ é kāꞌní ntɨ ña ítsi kān diꞌna dá xēe ña mí ntoo nto —kaꞌan ña.

16 Ntá tsi téku a kuetsi Pablu é ntákaꞌan ña nté koo vií ña. Kidáā ne, kuéꞌen na vīꞌi mí ntoo sntadún san, xéꞌe nā é kūtuní Pablu tsí ntántukū nuu iní ña Israeé san nté koo kaꞌní ña ña. 17 Pablú ne, kāna ña sntadun ñá odo nūu, kakaꞌan ña:

—Kuēꞌen niꞌi nto ná kudií sa ntāꞌa tóꞌo ntō, tsi íō é kāꞌan ná ni ñā —kaꞌan ña.

18 Kueꞌen níꞌi ña na mí tuví tóꞌō sntadún san, kakaꞌan ña:

—Ñá nuu kutū, ñá nanī Pablú ne, kāna ña kó, kakaꞌan ñá tē kɨꞌɨn niꞌí u na kudií sa mí tuví nto, tsi íō nuu i é kāꞌan ná ni ntō —kaꞌan ña.

19 Tōꞌó sntadún san ne, írkāa ña ntaꞌa na, kuéꞌen xio ña ni nā né, katsixeꞌe ñā:

—¿Neé ntu ncho kaꞌan ní ko? —kaꞌan ña.

20 Ne, kakaꞌan na:

—Ña Israeé ne, é xiō ntaa iní ña é kakān ñá ntaꞌa nto te kīntéka nto Pablu teváa méꞌñū junta san é tsixeꞌē ká ña ña. 21 Ntá tsi ña ku kuintíꞌxe nto é ntákaꞌan ña, tsí ña te nuu é ntaā i. Tsí ña te da uvi díko ñaꞌa ñatīi ntántīꞌu ñá itsi kān. É xēꞌé ña xuꞌu ña ntaꞌa Xuva kō tsí ña kóꞌo, ña káꞌxi ña da nté kūví kaꞌní ña Pablu. Vevií ne, da mii tsī e ntántétu ña nté koo kaꞌan nto —kaꞌan na.

22 Kidáā ne, nantíi tóꞌō sntadún san na, kúnūꞌú na ne, kakaꞌan ñá ni nā:

—Ñá ku kāꞌan ni ñaꞌa te kakáꞌan ní ko —kaꞌan ña.

23 Kidáā né, kāna tóꞌō sntadún san uvi ñaꞌá sntadun ñá odo nūu, kakaꞌan ñá ni ñā:

—Nākoo túꞌvē ntó uvi sientú sntadun, ni ūni díko uꞌxi sntadun, ñá ntántodó idu, ni ūví sientu ñá odō kaa, tsí kaeku ɨɨn níñu ve kɨꞌɨn ntó ni ña ñūú Cesarea. 24 Nākoo túꞌvē ntó idú dɨ é kuntēkú Pablu, vata koo é vāꞌá koo xee ñá ntaꞌa ña tsiñu kaꞌnu i Feli —kaꞌan ña.

25 Kidáā ne, de váꞌa ña tutú táxnūu ña ntaꞌa ña tsiñu kaꞌnu i san, kakaꞌan ña:

26 “Xuꞌú, Claudiu Lisia, táxnūú u ntiusi nto. 27 Sáꞌa tsī é kāꞌán u ni ntō: Tsí ña Israeé san ne, é tɨɨn ña ña sāꞌa é ncho kaꞌní ña ña. Ntá tsi dá kutuní ko tsí ña ñuú Roma ñá ne, ñéꞌē ú ni sntādún ko é nakākú ntɨ ña. 28 Ntio kó kutuní ko nee núu i é ntátsiꞌi kuétsi ña ña. Dukuān ne, ñeꞌe níꞌī ú ña méꞌñū junta íña ñá Israeé san. 29 Ntá tsi kūdii iña lei íña mii ña é ntátsiꞌi kuétsi ña ña. Ña túvi nēe nuu i é kāꞌní o ñā. Ntē ña tuví nee nuu i é kunuu kutu ñā. 30 Ntá tsi é kūtuní ko tsí ña Israeé san ne, ntántukū nuu iní ña nté koo kaꞌní ña ña. Dukuān ne, ntada ú ña kuenta ntáꞌa nto. Ne, é kākaꞌán u nī ña Israeé san tē kíkaꞌan ñá ni nto te nēe nuu i é ntátsiꞌi kuétsi ña. Sáꞌa tsī é kāꞌán u ni ntō”, kaꞌán tóꞌō sntadún san ini tutú san.

31 Niñú sāꞌá ne, kuéꞌēn sntadún san, kueꞌen niꞌi ñá Pablu. Xee ñá ñuú Antipatri. 32 Tévāá san ne, ntīko koo ntɨɨ́ ntɨ̄ɨ́ sntadún san, ntaíka ña dɨ́ꞌɨn ña, kūnúꞌu ña viꞌi sntadún san. Mii tsī sntadun, ñá ntántōdó idú san ne, kuéꞌēn ká ña nī Pablu. 33 Dā xee ñá ñuú Cesareá ne, xéꞌe ñā tutú san ntaꞌa ña tsiñu kaꞌnu i san ne, dā ntáda ña Pablu kuénta ntáꞌa ña. 34 Dā kúvi nakuaꞌa ña tsiñu kaꞌnu i san tutú san ne, tsixeꞌe ñā Pablu míꞌi ñuū ña. Dā kaꞌan ñá tsi ñuú Ciliciá ne, 35 kakaꞌan ñá tsiñu kaꞌnu i san:

—Kini ú nee é ntákaꞌan ña íña nto tē xee ña ntátsiꞌi kuétsi nto —kaꞌan ña.

Kidáā ne, kakaꞌan ñá te kunuu kutū Pablu má viꞌī kaꞌnu iña rei Heródē.