PSALMS
LABU
Labu Sung Thu Umdan
Hiche lekhabu hin na lungthim sunga giltah’a thu asei ding ahi. Ajeh chu kipana, lunghemna, chamna, lunggimna chule kinepna hihen kinepnabei hijongleh hiche Labu’a kon hi, kitilkhouna le lung kipana thei namudoh tei ding ahi. Khang masa laiya Labu’a thucheng kijih hohi, tukhang kipana le dinmun ho tohjong akitoh in ahi. Labu’a um thucheng phabep hi, taona thutoh akilhon in, vahchoi tothoa kipana’a dim, chule kisihna neija chonset phondohna le khat le khat Pathen henga kitaopeh tona thudol ho aseijin ahi.
Phat phatah napeh’a nasim’a ahileh hiche lekhabu hin bukimsel-a aman aleding ahi. Labu hi avel vel-a nasim’a ahileh athah beh-a houlim pina nachan ding, hichu tule phat sottah’a ding ahi. Lunglut tah in sim in, ajeh chu Hebrew La toh kisai hohi, La dang hotoh akikhehna um ahi.
Chule hetdinga pha chu, Labu hi la-lam toh kisai ahin, houlam tahsan-dan toh kisai lou ahi. Labu jih ho hin, alhangpia amaho lungthim sunga kon ho hilchetna apeh-u ahin, Tahsan thudol-a Pathen thu adihtah ahilchet-u ahipoi. Labu sung thu umdan ho phatah in vele chun—Pathen le mihemte kiguijopna thudol jeng ahi. Hijeh chun La toh kisaija thucheng kijih hohin, lunglut tah le na hinkho sunga taona tothoa sim jing ding in nakouve.
Lekhabu Jih Ho Chule Akijina Lo
Israel Leng David chun Labu som sagi le thum ajih in ahi. Chule Labu som nga hi koipen in anajih ham, ti hetdoh ahahsan;ahinlah Labu adangse hi Asaph, Korah chihlhah te, Solomon, Mose le Ethan kiti Ezrahite amaho cheng hin anajih-u ahi.
Chule phabep chun, Pathen henga taona le Ama vahchoina thudol-a Labu hi anajih-u ahi. Hinlah adang phabepma chun, kipun khom’a Pathen hou toh kisaijin anajih un, ama ama cheh thiljih-a kon hin, lhagao lam kitilkhouna ahiti, aki muchen in chule Labu hohi aboncha Thangvahna, Taona chule Pathen kilam hilsahna jeng ahi.
1
BU KHATNA
Pathen Adia Mipha Leh Migilou
1 Migiloute thuhil jom louva, michonse ho lamlhah dunga jong dingle lou; chule Pathen ginglou ho kikhop na dunga jong toukhompilou mi chu anunnom ahi. 2 Hitobang mihochun Pakai Danthua bou lunglhaina anei’un, Pakai Dan thu chu sun le jan in angaito jing jeng ui. 3 Hitobang mi hochu twi lonna luipanga kiphut, aphat cha hung gaji adojong gopjilou thingphung tobang ahi; hitobang miho jong chu atohna lam lam’uva alolhing jiuve. ✡ Jeremiah 17:8 4 Pakai ginglouho vang chutobang ahipoi: huilhoh mangle changvai tobangbep ahiuve. 5 Hijeh a chu Pakai gingloute chu thutan nikho tengleh themmo changdiu, michonse hon jong midih ho lah’a mun aneiloudiu ahi. 6 Ajeh chu Pakai in michonpha ho lamlhah ahetpeh jing in, Pakai ginglou ho lampi vang manthahna’a lut diu ahi.
DRAFT COPY