1 Пал ода о Рай іскіндя авер ефтавардеш сікаден і бічадя лен по дувджяне анґлал Песте андро сако єкг фоврос те о ґав, кай Ов Коркоро камелас те джян. 2 Ов пгендя ленґє:

— Увліпе баро, а бувтякєрен фріма. Важ ода манґєн ле увліпнакєре Хулаєс, гой Ов мі бічавел ле бувтякєрен те іскіден Пескєро увліпе.

3 Джян! Ме бічавав тумен, сар бакрорен машкар о рува. 4 На лен пега ані тарца, ані ташка, ані камашлі і пало дром нікаскє на палікєрен. 5 Кана тумен заджяна андро кгєр, акор анґлал пгенен авка: «Мірос одале кгєрескє!» 6 Те одя джівел о мануш міроскєро, акор тумаро мірос ачела пре лесте; те наа, акор ов вісальола кє туменде. 7 Ачен андро ода кгєр; хан і пієн ода са, со кє ленде гін. Бувтякєро засовґалінел, гой лескє те потінен. На преджян андал єкг кгєр андро авер.

8 Те тумен заджяна андро фоврос і оне тумен оде прелена, хан одя саворо, со оне туменґє дена. 9 Сасарен ленґєре насвален, і вакєрен ленґє: «Краліпе Девлескєро іма пашес кє туменде!» 10 А те тумен заджяна андре варесаво фоврос і одя тумен на прелена, акор джян пало фовроскєре уці і пгенен: 11 «Минґ о прахос тумаро фовроскєро, со захундяпес амаре піндрендар, амен разінас пре туменде. Та джянен: Краліпе Девлескєро іма пашес!» 12 Пгенав туменґє, со андро ода дівес Содомоскє ейла ловкєдер, сар адале фовроскє.

13 Біда тукє, Хоразін! Біда тукє, Віфсаїда! Бо те андро Тір те андро Сідон увлянас сікаде чудєса, саве есас сікаде кє туменде, то оне чірла покаїндянаспес, і урдянас пре песте лепеди, і бешлянас андро прахос. 14 Та Тіроскє те ле Сідоноскє ейла ловкєдер про судос, сар туменґє. 15 А ту, Капернаум, думінес, со ейга ваздно ко нєбос? Наа, ту ейга чідо андро адос!

16 Ко тумен шунел — Ман шунел, і ко на прелел тумен — Ман на прелел, а ко на прелел Ман — на прелел Бічадес Ман!

17 Ефтавардеш сікаде вісаліле ко Ісус ле радишаґога і пгенде:

— Раєя, минґ те о дємони аменґє покорне, кана амен преказінас ленґє Тийре навега!

18 Ісус ленґє отпгендя:

— Ме дикгльом ле сатана, саво, сар кана перумос, пейля пало нєбос! 19 Ме диньом туменґє влада те тердьон про сапа те про скарпіони, те пре саворі врагоскєрі зор, і ніч туменґє на анела чкода. 20 Но радисальон на одалескє, кай туменґє духі подчініненпес, а одалескє, со тумаре нава запісіме про нєбос.

21 Андре оди овра Ісус радисаліля андро Свентно Духос і пгендя:

— Ашарав Тут, Даде, Рай ле нєбоскєро і ле пгувакєро! Ту таґадиндял ода ле ґодяверендар те аврі сікадендар, а пгутердял цікноре чаворенґє. Га, Дадея, ода есас Тийрі лачі воля! 22 Мійро Дад саворо прединя Манґє. Ніко на джянел, ко гіно о Ча, чак єкг о Дад. І ніко на джянел, ко гіно о Дад, чак єкг Лескєро Ча і ода, каскє о Ча закамела те пгутерен Лес.

23 Паліш Ов вісаліля ко Пескєре сікаде і пгендя ленґє авка, гой чак оне те шунен:

— Бахтале якга, кай дикгєн ода, со тумен дикгєн! 24 Пгенав туменґє, бут пророка те о краля каменас те дикгєн ода, со тумен дикгєн, та на дикгле, те шунен ода, со тумен шунен, та на шунде.

25 Аде ушіля єкг танітов Законоскєро і задиня ле Ісусоскє пгучібе, гой Лес те пробалінен аврі:

— Танітов, со манґє те кєрен, гой те худав вечно джівіпе?

26 Ісус лескє отпгендя:

— Андро Законос со пісіме? Сар еґєнес?

27 Ов отпгендя:

— «Кам ле Раєс, Девлес пескєрес, саворе тийре їлега, савора тийра вовдяга, савора тийра зорага і савора тийра ґовдяга», і «пашунес тийрес авка, сар коркоро пес».

28 Ісус лескє пгендя:

— Міште ту пгендял. Авка кєр, і акор джівега.

29 Та о танітов Законоскєро камля те оправдиненпес і важ ода пгучля Ісусостар:

— Ко гіно манґє пашуно?

30 Акор Ісус лескє отпгендя:

— Єкг мануш джялас андал Єрусалім андро фоврос Єріхон. Пало дром хутіле пре лесте жівана, саве розкінде лес, ізмарде, про єпаш мувлес мукле лес і ґейле гет. 31 Обачіляпес авка, со пало ода дром преджялас о рашай. Ов дикгля одалес манушес і обґейля лес пало дуйто дромескєрі сийра. 32 Авка кєрдя те о лєвіт. Сар подавля ко ода тган, дикгля ле ізмардес, ов обґейля лес ле сийрага. 33 Пало ода дром преджялас і єкг самарянос. Ов дикгля одалес чорес і іґєн лес посаїндя. 34 Ов подґейля, премордя лескєре рані олєйога і ле моляга, перепганкєрдя лен. А паліш тгодя лес про пескєро сомаріс, андя лес андре гостіно двовра і додикгєлас дуредер пал лесте. 35 Про дуйто дівес, сар джялас одарік дуредер, іля аврі дуй дінарія, диня ле хулаєскє і пгендя: «Дикг пал лесте, а те розкєрега бутередер, та акор, сар вісалювава пале, вісарава тукє». 36 Сар ту думінес, ко ачіля пашуно одале трінендар одалескє, саво попейляпес ле жіваненґє?

37 Танітов Законоскєро отпгендя:

— Ода, саво есас кє лесте їлескєро!

Акор о Ісус пгендя лескє:

— Джя, а те ту авка кєр.

38 Пало дром Ісус авля сікаденца андро єкг ґав. Одя есас єкг ромні про нав Марфа, саві преіля Лес андре пескєро кгєр. 39 Ла есас пгєнь, сава вічіненас Марія. Ой бешелас пажо піндре ле Раєскє і шунелас, со Ов вакєрелас. 40 А Марфа есас занято одалега, гой федер те кєрен о дийлос. Ой подґейля ко Ісус і пгендя Лескє:

— Раєя, Тут на ердекєлінел, со мійрі пгєнь мукля саворі бувті пре манде єкга? Пген лакє, мі поможінел манґє!

41 Та о Рай лакє отпгендя:

— Марфо, Марфо, ту старінестут бут сога і холярестут, 42 а кампел чак єкг. Марія іскіндя ода, со єкг федер, і ода на одлелапес латар.